فوتو: تۋريزم جانە سپورت مينيسترلىگى
تۋريزم جانە سپورت مينيسترلىگىنىڭ حابارلاۋىنشا, مۋزىكالىق شوۋ قازاقستاندى ميلليونداعان كورەرمەنگە جوعارى تۋريستىك الەۋەتى بار مەملەكەت رەتىندە تانىستىرۋدى كوزدەيدى. تۇسىرىلىمدەر تۇركىستان, ماڭعىستاۋ, الماتى جانە اقمولا وبلىستارىندا, سونداي-اق الماتى مەن استانا قالالارىندا وتەدى. شوۋدىڭ فينالى ەلوردادا ۇيىمداستىرىلادى دەپ جوسپارلانعان.
«ديماش قۇدايبەرگەن مەن جوباعا قاتىسۋشىلار تۇركىستان وبلىسىنان اقتاۋ قالاسىنا ات باسىن بۇردى. ءتۇسىرىلىم اياسىندا كاسپي تەڭىزىنىڭ جاعالاۋىندا جانە قازاقستاننىڭ ەڭ اسەرلى تابيعي مۇرالارىنىڭ ءبىرى – بوزجىرا شاتقالىندا ونەر كورسەتۋ جوسپارلانعان. تۇسىرىلىمگە قىتاي, قازاقستان, قىرعىزستان, يتاليا, مالايزيا جانە سەربيادان كەلگەن تالانتتى ورىنداۋشىلار قاتىسىپ جاتىر. قاتىسۋشىلاردىڭ كاسىبي دەڭگەيىن ارنايى شاقىرىلعان حالىقارالىق ساراپشىلار باعالايدى», دەلىنگەن حابارلامادا.
جوبانى جۇزەگە اسىرۋعا قر تۋريزم جانە سپورت مينيسترلىگى, مادەنيەت جانە اقپارات مينيسترلىگى, «Kazakh Tourism» ۇلتتىق كومپانياسى جانە وڭىرلىك اكىمدىكتەر قولداۋ كورسەتىپ وتىر.
ايتا كەتەيىك, بيىل تۋريزم جانە سپورت مينيسترلىگى 2025–2029 جىلدارعا ارنالعان «ماڭعىستاۋ» تۋريستىك ايماعىن دامىتۋ جونىندەگى كەشەندى جوسپاردى ازىرلەگەن. ۇكىمەت قاۋلىسىمەن قابىلدانعان بۇل قۇجات ءوڭىردى 9 باعىت بويىنشا دامىتۋدى كوزدەيدى. جوسپار تۋريستەردى تارتۋعا جاعداي جاساپ, ينۆەستيتسيالىق احۋالدى جاقسارتۋعا ىقپال ەتەدى.
