سالتاناتتى شاراعا قاتىسقان تۋريزم جانە سپورت ءمينيسترى ە.مىرزابوسىنوۆ, ەسەك ەسۋ سپورتى تۇرلەرى بويىنشا «قايىق» فەدەراتسياسى اقب پرەزيدەنتى ا.مەرعاليەۆ, بايداركا مەن كانوە ەسۋ حالىقارالىق فەدەراتسياسىنىڭ پرەزيدەنتى ت.كونيەتسكو ءسوز الىپ, ءوڭىر تۇرعىندارىنا ىزگى تىلەگىن جەتكىزدى.
– بۇگىن ءبىز ءۇشىن تاريحي جانە قۋانىشتى كۇن. ەلىمىزدە العاش رەت حالىقارالىق ستاندارتقا ساي كەلەتىن «ەسكەك ەسۋ» كانالىن اشقالى تۇرمىز. تۇركىستانىمىز تۇركى الەمىن تاڭعالدىراتىن تاعى دا ءبىر زاماناۋي نىسانمەن تولىققالى تۇر. بۇل - مەملەكەت باسشىسىنىڭ تىكەلەي تاپسىرماسىنا سايكەس, تاريحي تۇركىستاندى دامىتۋ باعىتىنداعى جۇرگىزىلىپ جاتقان ناقتى جۇمىستاردىڭ جەمىسى. «ەسكەك ەسۋ» كانالىنىڭ ەرەكشەلىگىنىڭ ءبىرى – قالانىڭ ەكوجۇيەسىنە دە تىكەلەي اسەرىن تيگىزەدى. كەشەندە ازيالىق جانە الەمدىك دەڭگەيدەگى جارىستاردى ۇيىمداستىرۋعا بولادى. شەتەلدىك سپورتشىلارعا جىل ون ەكى اي وقۋ-جاتتىعۋ جيىندارىن وتكىزۋگە تولىق مۇمكىندىك بار. بۇل سپورت كەشەنى – تۇركىستاننىڭ عانا ەمەس, تۇتاس قازاق ەلىنىڭ ابىرويىن كوتەرەدى. «ەسكەك ەسۋ» كانالىنى ءوڭىر سپورتىنىڭ دامۋىنا سەرپىن بەرىپ قانا قويماي, تۇركىستاننىڭ تۋريستىك الەۋەتىن ارتتىرۋعا دا زور ۇلەس قوسادى,– دەدى تۇركىستان وبلىسىنىڭ اكىمى نۇرالحان كوشەروۆ جاڭا نىساننىڭ اشىلۋىمەن قۇتتىقتاۋىندا.
سالتاناتتى شارا اياسىندا حالىقارالىق بايداركا جانە كانوە ەسۋ فەدەراتسياسىنىڭ پرەزيدەنتى توماس كونيەتسكو مەن قازاقستان «قايىق» فەدەراتسياسىنىڭ پرەزيدەنتى اسلانبەك مەرعاليەۆ اراسىندا تاريحي مەموراندۋمعا قول قويىلدى. بۇل قۇجات تۇركىستاندى ورتالىق ازياداعى ەسۋ سپورتى حابىنا اينالدىرۋعا جول اشادى. «ەسكەك ەسۋ» كانالىندا 500-گە جۋىق سپورتشى بايداركا مەن كانوەدا ەسۋ, اكادەميالىق ەسۋ, ترياتلون, پاراكانوە, اشىق سۋدا ءجۇزۋ سياقتى سپورت تۇرلەرىمەن تۇراقتى تۇردە جاتتىعا الادى.
ايتا كەتەلىك, وبلىستىڭ ەسكەك ەسۋشىلەرى ەل ابىرويىن كوتەرۋدە. وسى ۋاقىتقا دەيىن قازاقستان رەسپۋبليكاسىنىڭ چەمپيوناتتارى مەن كۋبوكتارىندا 1 800-دەن استام مەدال يەلەنسە (406 التىن, 730 كۇمىس, 676 قولا), الەم جانە ازيا چەمپيوناتتارىندا 184 مەدال قانجىلادى (58 التىن, 84 كۇمىس, 42 قولا). وليمپيادا ويىندارىنا 9 ليتسەنزيا الىندى. وڭىردە بيىل 102 سپورت نىسانى پايدالانۋعا تاپسىرىلدى. كەلەسى جىلى 10 سپورت عيماراتىن تاپسىرۋ جوسپارلانىپ وتىر.
