فوتو: تسم
ەرلەر قۇراماسىن استانا قالاسىنداعى حالىقارالىق اۋەجايدان, ال ايەلدەر قۇراماسىن الماتى قالاسىننان جانكۇيەرلەر, سپورتشىلاردىڭ اتا-انالارى, تۋىستارى مەن دوستارى ەرەكشە ىقىلاسپەن قارسى الدى.
اۋەجايدا باق وكىلدەرىنە سۇحبات بەرگەن ۇلتتىق قۇرامانىڭ باس باپكەرى قايرات ءساتجانوۆ الداعى ۋاقىتتا كوماندا اقپان ايىندا وتەتىن الەم كۋبوگىنىڭ شەشۋشى كەزەڭىنە دايىندىق جۇرگىزىلەتىنىن ايتتى. باس باپكەر جارىس بارىسىنداعى شاكىرتتەرىنىڭ ونەرى مەن تورەشىلەردىڭ جۇمىسىنا قاتىستى پىكىر ءبىلدىردى.
«بىرنەشە ءسات بولدى, قانداي جاعداي بولسا دا ءبىزدىڭ بوكسشىلار قارسىلاستارىنان ءبىر ساتى جوعارى ونەر كورسەتتى. ولار جەڭىسكە جەتۋ ءۇشىن بار كۇشىن سالدى. ۋاقىت وتە كەلە بارلىعى رەتكە كەلەدى», دەدى ول.
ەكى دۇركىن الەم چەمپيونى سانجار تاشكەنباي تارتىستى تۋرنيردە قانداي تاكتيكاعا سۇيەنگەنىن تارقاتىپ ايتتى.
«مەن تاجىريبەلى سپورتشىمىن, حالىقارالىق ارەنادا العاش رەت ونەر كورسەتىپ وتىرعان جوقپىن. بۇل جەردە ەڭ باستىسى — باپكەرلەردى تىڭداۋ, تەك فيزيكالىق ەمەس, پسيحولوگيالىق دايىندىق تا ماڭىزدى بولدى. باپكەرلەردىڭ بارلىق تاپسىرماسىن ورىنداۋعا تىرىستىم. جالپى, ءبارى ءبىز جوسپارلاعانداي ءوتتى», دەدى چەمپيون.
ليۆەرپۋلدەگى الەم چەمپيوناتىن التىن جۇلدەمەن تۇيىندەگەن ايبەك ورالباي فينالدا وزبەكستاندىق قارسىلاسىمەن بولعان جەكپە-جەكتە شەشۋشى ءسات سوڭعى راۋندتا بولعانىن ايتاپ ءوتتى.
«سوڭعى راۋند ەڭ قيىن كەزەڭ بولدى. بىراق ءدال سول كەزدە ءوزىمدى تولىق جيناپ, بار كۇشىمدى سالدىم. قارسىلاسىمنىڭ شارشاعانىن كورىپ, باسىمدىق تانىتۋ كەرەكتىگىن ءتۇسىندىم. سوڭىندا بۇل ماعان جەڭىس اكەلدى», دەدى الەم چەمپيونى.
ايتا كەتەيىك, اتالعان جاھاندىق دودادا قازاقستان قۇراماسى كەرەمەت ناتيجەگە قول جەتكىزدى. وتانداستارىمىز 7 التىن, 1 كۇمىس جانە 2 قولا مەدال جەڭىپ الىپ, جالپىكوماندالىق ەسەپتە كوش باستادى
