پاۆلودار وبلىستىق سوتىنىڭ اكىمشىلىك ىستەر جونىندەگى سوت القاسى جەكە سوت ورىنداۋشىلارىنىڭ ءىس-ارەكەتىن زاڭسىز دەپ تانۋ, ءوندىرىپ الىنعان اقشالاي قاراجاتتى قايتارۋ تۋرالى تالاپ قويۋ بويىنشا قاناعاتتاندىرىلعان سوت شەشىمىنە تۇسكەن اپەللياتسيالىق شاعىم بويىنشا ءىستى قارادى.
سوت القاسى تالاپ قويۋشى س.-نىڭ «وتباسى بانكى» اق-داعى شوتتارىنا تىيىم سالىپ, قاراجاتتى ەسەپتەن شىعارعانىن انىقتادى. ال الگى قاراجات كوپبالالى انانىڭ «باقىتتى وتباسى» مەملەكەتتىك جوباسى اياسىندا جيناقتالعان جانە بانك كەپىلىنە سالىنعان تۇرعىن ءۇي قۇرىلىس جيناقتارى بولعان.
-بۇعان قوسا, جيناق شوتى نەكە كەزىندە اشىلعانى انىقتالدى. ەندەشە ول ەرلى-زايىپتىلاردىڭ ورتاق مەنشىگى بولىپ سانالادى. سوندىقتان ءوندىرىپ الۋ اتقارۋشىلىق ءىس جۇرگىزۋگە قاتىسۋشى بولىپ تابىلماعان تۇلعانىڭ دا قۇقىقتارىن قوزعادى. سوت ورىنداۋشىلارى سالىنعان سومالاردىڭ ماقساتىن تەكسەرۋگە جانە كەپىل ۇستاۋشى مەن تەڭ قارىز الۋشىنىڭ قۇقىقتارىن ساقتاۋعا مىندەتتى ەدى, - دەپ حابارلادى وبلىستىق سوتتان.
سايىپ كەلگەندە سوت ورىنداۋشىلارىنىڭ ارەكەتتەرى «اتقارۋشىلىق iس جۇرگiزۋ جانە سوت ورىنداۋشىلارىنىڭ مارتەبەسi تۋرالى» جانە قر جوعارعى سوتىنىڭ نورماتيۆتىك قاۋلىسىنىڭ تالاپتارىن بۇزعان.
ءبىرىنشى ساتىداعى سوتتىڭ قاۋلىسى وزگەرىسسىز, جاۋاپكەرلەردىڭ اپەللياتسيالىق شاعىمى قاناعاتتاندىرۋسىز قالدىرىلدى. قاۋلى زاڭدى كۇشىنە ەندى.
سونداي-اق, سوت القاسى جەكە سوت ورىنداۋشىلارىنىڭ تاراپىنان جىبەرىلگەن زاڭ بۇزۋشىلىقتار بويىنشا پاۆلودار وبلىسى بويىنشا جەكە سوت ورىنداۋشىلارىنىڭ وڭىرلىك پالاتاسىنىڭ باسشىلىعىنا ءتيىستى شارالار قابىلداۋ جانە الداعى ۋاقىتتا مۇنداي فاكتىلەرگە جول بەرمەۋ ماقساتىندا ەكى جەكە ۇيعارىم شىعاردى.
