حالىقارالىق باسقوسۋعا تۇركى اكادەمياسىنىڭ پرەزيدەنتى شاھين مۇستافاەۆ, ءال-فارابي اتىنداعى قازۇۋ رەكتورى جانسەيىت تۇيمەباەۆ, تۇرىك تاريح قوعامىنىڭ توراعاسى يۋكسەل وزگەن, سونداي-اق تۇركى مەملەكەتتەرى ۇيىمىنا مۇشە جانە باقىلاۋشى ەلدەردىڭ تاريح, ارحەولوگيا ينستيتۋتتارىنىڭ جەتەكشىلەرى, بەلگىلى عالىمدار مەن ساراپشىلار قاتىستى.
ءىس-شارانىڭ اشىلۋىندا ءسوز سويلەگەن تۇركى اكادەمياسىنىڭ پرەزيدەنتى, اكادەميك ش. مۇستافاەۆ عالىمداردىڭ كۇش-جىگەرىن بىرىكتىرۋدىڭ ماڭىزدىلىعىن اتاپ ءوتىپ, بۇل باستاما تۇركى حالىقتارىنىڭ باي تاريحي مۇراسىن جۇيەلى ءارى وبەكتيۆتى تۇردە كورسەتۋگە جول اشاتىنىن العا تارتتى.
القالى كەزدەسۋگە قاتىسۋشىلار بولاشاق مونوگرافياعا قاتىستى ءوز ۇسىنىستارىن ورتاعا سالىپ, ونىڭ مازمۇندىق قۇرىلىمىن جان-جاقتى تالقىلادى. سونداي-اق عىلىمي ەڭبەكتىڭ ەكى تومىنىڭ جۇمىس جوسپارى جانە ورىندالۋ مەرزىمى بەكىتىلدى.
ايتا كەتەيىك, تۇركى مەملەكەتتەرىنىڭ ورتاق تاريحىن جازۋ تۋرالى باستاما 2024 جىلعى 6 قاراشادا بىشكەكتە وتكەن تۇركى مەملەكەتتەرى ۇيىمىنىڭ XI سامميتىندە كوتەرىلىپ, مەملەكەت باسشىلارىنىڭ تاپسىرماسىنا سايكەس جوبانى جۇزەگە اسىرۋشى ۇيىم رەتىندە تۇرىك اكادەمياسى بەكىتىلدى. اتالعان جوبا بويىنشا العاشقى جۇمىس كەزدەسۋى بيىلعى جىلدىڭ اقپان ايىندا انكارا قالاسىندا ءوتىپ, ناتيجەسىندە تاراپتار ىنتىماقتاستىق تۋرالى حاتتاماعا قول قويعان ەدى. سونداي-اق, اتالعان جيىن بارىسىندا ەڭبەكتىڭ جالپى جوسپارى جانە تۇجىرىمداماسى تالقىلانىپ, ەكى تومدىق باسىلىم دايىنداۋ جونىندە شەشىم قابىلدانىپ, ءاربىر قاتىسۋشى ەلدەن ۇلتتىق كوميسسيالار قۇرىلعان بولاتىن.
