ۆودنىي كەنتىنىڭ بالالارى ەندى ەڭسەلى دە زاماناۋي عيماراتتا ءبىلىم الادى. بۇل – «كەلەشەك مەكتەپتەرى» جوباسى شەڭبەرىندە بوي كوتەرگەن سەمەي قالاسىنداعى – ەكىنشى, ال اباي وبلىسى بويىنشا – ءۇشىنشى ءبىلىم ورداسى. ءۇش قاباتتى مەكتەپتە 28 وقۋ كابينەتى, فيزيكا, حيميا, بيولوگيا, روبوتتەحنيكا, گرافيكا جانە مودەلدەۋ بولمەلەرى, اعاش جانە مەتالل وڭدەۋ, تىگىن جانە كۋليناريا شەبەرحانالارى بار. سونىمەن قاتار اكت زالى, اسحانا, 7 زەرتحانا, كىتاپحانا, وقۋ زالى مەن كوۆوركينگ ايماقتارى قاراستىرىلعان. اۋلادا فۋتبول, ۆولەيبول, باسكەتبول الاڭدارى, جۇگىرۋ جولاقتارى مەن سپورت زالى بار.
مەكتەپ ءبىر اۋىسىمدا, مەملەكەتتىك تىلدە ءبىلىم بەرەدى. 1-11 سىنىپ ارالىعىندا 22 سىنىپ-كومپلەكت جانە 1 مەكتەپالدى دايارلىق سىنىپ اشىلادى. سالتاناتتى ءىس-شاراعا قاتىسقان ايماق باسشىسى ۇستازدار مەن اتا-انالاردى, وقۋشىلاردى ايتۋلى وقيعامەن قۇتتىقتادى.
«ەلىمىزدە مەملەكەت باسشىسى قاسىم-جومارت كەمەل ۇلى توقاەۆتىڭ باستاماسىمەن جۇزەگە اسىپ جاتقان «كەلەشەك مەكتەپتەرى» ۇلتتىق جوباسى اياسىندا كوپتەگەن جاڭا وقۋ ورداسى سالىنىپ جاتىر. ءبىزدىڭ وڭىرىمىزدە دە بىرنەشەۋى بوي كوتەردى. وسىنداي كەلەلى باستامالار ارقىلى بالالارعا قولايلى, قاۋىپسىز, زاماناۋي ءبىلىم بەرۋ ورتاسىن قالىپتاستىرۋعا باعىتتالعان جۇيەلى قادامدى كورۋگە بولادى. سونىڭ ايقىن كورىنىسى – بۇگىن سەمەي قالاسىنىڭ ۆودنىي كەنتىندە بوي كوتەرگەن 600 ورىندىق جاڭا مەكتەپ. بۇل – ۇستازدىڭ ارمانىن, اتا-انانىڭ سەنىمىن, بالانىڭ ءۇمىتىن توعىستىرعان ورتاق قۋانىش. بۇگىنگى اشىلعان مەكتەپ – بولاشاققا دەگەن سەنىمنىڭ ءرامىزى. بارشاڭىزدى جاڭا وقۋ جىلىنىڭ باستالۋىمەن شىن جۇرەكتەن قۇتتىقتايمىن», دەدى وبلىس اكىمى.
ايماق باسشىسى مەكتەپتىڭ سىنىپتارىن, اسحانا, سپورت زالدى كورىپ, وقۋشىلارمەن, مۇعالىمدەرمەن پىكىرلەستى.
قازىرگى ۋاقىتتا وبلىستا «كەلەشەك مەكتەپتەرى» ۇلتتىق جوباسى اياسىندا ەكى مەكتەپ سالىنىپ جاتىر. اياگوز قالاسىنداعى 600 ورىندىق مەكتەپ 2-توقساندا پايدالانۋعا بەرىلمەك. سەمەيدىڭ شىعىس كەنتىندە 300 ورىندىق مەكتەپتىڭ قۇرىلىسى جۇرگىزىلۋدە. جالپى, وبلىستاعى 8200 ورىن تاپشىلىعىنىڭ 31 پايىزى وسى جوبامەن سالىنىپ جاتقان 5 مەكتەپ ەسەبىنەن شەشىلمەك. قالعان تاپشىلىقتى جويۋ ءۇشىن رەسپۋبليكالىق بيۋدجەت ەسەبىنەن الداعى ءۇش جىلدا 11 مەكتەپ سالۋ جوسپارلانعان.
اپاتتى جاعدايدا دەپ تانىلعان ءۇش مەكتەپتىڭ ماسەلەسى دە كەزەڭ-كەزەڭىمەن شەشىلىپ كەلەدى. جارما اۋدانىنىڭ سۋىقبۇلاق اۋىلىندا 100 ورىندىق جاڭا مەكتەپتىڭ قۇرىلىسى باستالدى. اقسۋات اۋدانىنداعى ەكپىن اۋىلىندا 300 ورىندىق مەكتەپتىڭ قۇرىلىسى باستالادى. سەمەيدەگى №11 مەكتەپتىڭ ورنىنا جاڭا مەكتەپ سالۋعا قۇجات ازىرلەنىپ جاتىر.
سەمەي
