سۋرەت: olympic.kz
كەڭەس وداعى كەزەڭىندە ەلىمىزدىڭ جەڭىل اتلەتتەرى مىقتى بولعانىن بارشا جۇرت جاقسى بىلەدى. سپورتتىڭ وسى ءتۇرىن سەرىك ەتكەن وتانداستارىمىزدىڭ بايراقتى باسەكەلەردەن ولجاسىز ورالعان كەزدەرى سيرەك. وزگەلەردى ايتپاعاندا, قازاقتىڭ قوس تارلانى, ايگىلى جەلاياقتار عۇسمان قوسانوۆ پەن ءامين تۇياقوۆتىڭ جەلدەي ەسكەن كەزدەرى ءالى دە ەگدە تارتقان جانكۇيەرلەردىڭ جادىندا.
الەم چەمپيوناتتارىنا كەلەر بولساق, بۇل جارىستىڭ شىمىلدىعى 1983 جىلى حەلسينكيدە ءتۇرىلدى. سۋومي ەلىندە ۇيىمداستىرىلعان ءدۇبىرلى دودادا كسرو قۇراماسى 4ح100 ەستافەتالىق سايىستا قولا مەدالدى يەلەندى. كوماندا ساپىندا قاراعاندىلىق ۆلاديمير مۋراۆەۆ تا ونەر كورسەتتى.
1987 جىلعى الەمدىك دودانى ريم قابىلدادى. «ماڭگىلىك قالادا» مۋراۆەۆتىڭ قانجىعاسى قايتا مايلاندى. سودان ءتورت جىل بۇرىن ەستافەتادا جەڭىپ العان قولاسىن ول وسى جولى كۇمىسكە الماستىردى. قىزىلجارلىق مارافونشى زويا يۆانوۆا كۇمىس السا, ءۇش قارعىپ سەكىرۋدە شىمكەنتتىك ولەگ ساكيركين قولاعا قول سوزدى.
تاۋەلسىز ەلىمىزدىڭ قورجىنىنا العاشقى جۇلدەنى سىرىقپەن سەكىرۋشى گريگوري ەگوروۆ سالدى. 1993 جىلى شتۋتگاردتا وتكەن الەم چەمپيوناتىندا شىمكەنتتىك ساڭلاق 5 مەتر 90 سانتيمەترلىك مەجەنى باعىندىردى. جەرلەسىمىز تەك ۋكراينانىڭ داڭقتى سپورتشىسى سەرگەي بۋبكادان قالىپ قويدى. الەمدىك رەكوردتى 35 مارتە جاڭارتقان جامپوز ەگوروۆتان 10 سانتيمەترگە بيىك سەكىردى.
1995 جىلى گەتەبورگتا 100 مەترگە كەدەرگىلەر ارقىلى جۇگىرگەن ولگا شيشيگينا كۇمىسپەن كۇپتەلدى. الماتىلىق ارۋ اقش-تىڭ اتى اڭىزعا اينالعان جەلاياعى گەيل ديۆەرستەن عانا قالىپ قويدى. 1997 جىلى افينادان, 1999 جىلى سەۆيليادان قورجىنىمىز بوس قايتتى. 2001 جىلى ەدمونتوندا شيشيگينا ءۇشىنشى ورىندى قاناعات تۇتتى. بۇل جولى جەرلەسىمىز قوس امەريكالىق جۇلدىز – اندجانەت كيركلەند پەن گەيل ديۆەرستەن وزا المادى. 2003 جىلى سەن-دەني مەن 2007 جىلى وساكادا ونسايىسشى دميتري كارپوۆتىڭ اسىعى الشىسىنان ءتۇستى. قاراعاندىنىڭ جامپوزى جوعارىدا اتالعان جارىستىڭ ەكەۋىندە دە قولا مەدالدى قورجىنعا سالدى.
2011–2017 جىلدار ارالىعىندا ءۇش قارعىپ سەكىرۋشى ولگا رىپاكوۆا اتوي سالدى. تەگۋدە ول ۋكراينالىق ولگا سالادۋحانى العا جىبەرىپ, كۇمىسپەن كۇپتەلدى. جارىستا وسكەمەننىڭ تۋماسى 14,89 مەترلىك ناتيجە كورسەتتى. بەيجىڭ مەن لوندوندا ول قولاعا قول سوزدى. ودان بولەك, رىپاكوۆانىڭ قورجىنىندا وليمپيا ويىندارىنىڭ تولىق جۇلدە جيىنتىعى بار. جابىق عيماراتتاعى الەم چەمپيوناتىندا دا جەرلەسىمىز ءدال سونداي كورسەتكىشكە قول جەتكىزدى. سونداي-اق ازيا ويىندارىندا ءتورت رەت توپ جارىپ, كوپتەگەن اسا ءىرى حالىقارالىق جارىستاردا دارالاندى. ءبىر سوزبەن ايتساق, ولگانىڭ ەسىمى وتاندىق جەڭىل اتلەتيكا تاريحىنداعى ەڭ تابىستى سپورتشى رەتىندە تاريحتا قالدى.
2022 جىلى كەنيانىڭ بىرنەشە سپورتشىسى ەلىمىزدىڭ ازاماتتىعىن الىپ, ءدۇبىرلى دودالاردا ءبىزدىڭ ەلدىڭ اتىنان سىنعا تۇسە باستادى. سولاردىڭ اراسىنان نورا دجەرۋتو وزىپ شىعىپ, ۇكىلەگەن ءۇمىتىمىزدى اقتادى. سول جىلى اقش-تىڭ يۋدجين قالاسىندا ۇيىمداستىرىلعان الەم چەمپيوناتىندا 3000 مەترگە كەدەرگىلەر ارقىلى جۇگىرگەن «قارا مارجان» التىننان القا تاقتى. نورانىڭ ناتيجەسى – 8.53,02. وسىلايشا, باس جۇلدەنى ولجالاپ قانا قويماي الەمدىك رەكوردتى دا جاڭارتتى.
2023 جىلى بۋداپەشتتەگى باسەكەدە جەڭىل اتلەتتەرىمىز تاعى دا جەرگە قاراتتى. ماجارستاننىڭ استاناسىندا شىمىلدىعى تۇرىلگەن كەيىنگى الەم چەمپيوناتى اقش قۇراماسىنىڭ ايقىن جەڭىسىمەن اياقتالدى.
ساناۋلى كۇندەردەن كەيىن جاپونيادا جالاۋى جەلبىرەيتىن جارىستا ەلىمىزدىڭ بەس جەڭىل اتلەتى ونەر كورسەتەدى. ولار – نورا دجەرۋتو (3000 مەترگە كەدەرگىلەر ارقىلى جۇگىرۋ), دەيزي دجەمپكەمەي (3000 مەترگە كەدەرگىلەر ارقىلى جۇگىرۋ, 10 000 مەترگە جۇگىرۋ), ياسمينا توقسانباەۆا (سپورتتىق ءجۇرىس, 20 شاقىرىم), گالينا ياكۋشەۆا (سپورتتىق ءجۇرىس, 35 شاقىرىم), پولينا رەپينا (سپورتتىق ءجۇرىس, 35 شاقىرىم). مىنە, وسى بەس سپورتشىمىزدىڭ ەڭ بولماعاندا بىرەۋى جەڭىس تۇعىرىنا كوتەرىلسە, سونىڭ ءوزى ۇلكەن ولجا بولماق.
