فوتو: اشىق دەرەككوز
الەۋمەتتىك جەلىلەردە «اسپان سيتي» تۇرعىن ءۇي كەشەنىندە قايعىلى وقيعا ورىن العانى تۋرالى اقپارات تارادى. الدىن الا مالىمەت بويىنشا, 20 جاستاعى جىگىت 12-قاباتتاعى بالكوننان قۇلاپ كەتكەن.
اتالعان دەرەكتى الماتى وبلىستىق پوليتسيا دەپارتامەنتى راستادى. ۆەدومستۆونىڭ مالىمەتىنشە, وقيعا 8 قىركۇيەك كۇنى بەساعاش اۋىلىنداعى تۇرعىن ءۇي كەشەندەرىنىڭ بىرىندە بولعان. مارقۇم الماتى قالاسىنىڭ تۇرعىنى ەكەنى انىقتالعان.
«قازىرگى ۋاقىتتا بارلىق ءمان-جايدى انىقتاۋ ءۇشىن كەشەندى تەرگەۋ امالدارى جۇرگىزىلىپ جاتىر. الدىن الا بولجام بويىنشا, ەر ادامنىڭ ءوز-وزىنە قول جۇمساۋعا بىرنەشە رەت ارەكەتتەنگەنى جوققا شىعارىلمايدى», دەلىنگەن حابارلامادا.
قۇقىق قورعاۋ ورگاندارى قايعىلى جاعداي بويىنشا قىلمىستىق ءىس قوزعالعانىن مالىمدەدى. تەرگەۋ قورىتىندىسى بويىنشا زاڭ تالاپتارىنا سايكەس پروتسەسسۋالدىق شەشىم قابىلدانادى.
