فوتو: اقوردا
باسقوسۋعا «Amanat» پارتياسى فراكتسياسىنىڭ جەتەكشىسى ەلنۇر بەيسەنباەۆ, «اۋىل» حدپپ فراكتسياسىنىڭ جەتەكشىسى سەرىك ەگىزباەۆ, «Respublica» پارتياسى فراكتسياسىنىڭ جەتەكشىسى ايداربەك قوجانازاروۆ, «اق جول» قدپ فراكتسياسىنىڭ جەتەكشىسى ازات پەرۋاشەۆ, قحپ فراكتسياسىنىڭ جەتەكشىسى ماگەررام ماگەرراموۆ, جسدپ فراكتسياسىنىڭ جەتەكشىسى اسحات راحىمجانوۆ جانە پرەزيدەنتتىڭ پارلامەنتتەگى وكىلدىگىنىڭ باسشىسى امىربەك وسپانبەكوۆ قاتىستى.
ەرلان قارين پرەزيدەنت قاسىم-جومارت توقاەۆتىڭ پارلامەنت پالاتالارىنىڭ بىرلەسكەن وتىرىسىندا جاريالاعان جولداۋىنداعى نەگىزگى باستامالارعا نازار اۋداردى. ال فراكتسيا جەتەكشىلەرى جولداۋدىڭ ورىندالۋىن باقىلاۋ جانە زاڭنامالىق تۇرعىدان قامتاماسىز ەتۋ باعىتىنداعى جۇمىس جوسپارى جونىندە مالىمەت بەردى.
جيىنعا قاتىسۋشىلار مەملەكەت باسشىسىنىڭ جولداۋدا ۇسىنعان پارلامەنتتىك رەفورماسى تۋرالى پىكىر الماستى. مەملەكەتتىك كەڭەسشى پرەزيدەنتتىڭ جاڭا ساياسي باستاماسى, ەڭ الدىمەن, ساياسي جۇيەنىڭ ينستيتۋتسيونالدىق نەگىزدەرىن ودان ءارى نىعايتۋعا باعىتتالعانىن اتاپ ءوتتى. فراكتسيا جەتەكشىلەرى پرەزيدەنتتىڭ پارلامەنتتى رەفورمالاۋ جونىندەگى ۇسىنىسىنا قولداۋ ءبىلدىرىپ, الداعى قوعامدىق تالقىلاۋلارعا بەلسەنە قاتىسۋعا دايىن ەكەنىن جەتكىزدى.
سونداي-اق مەملەكەتتىك كەڭەسشى پرەزيدەنتتىڭ ۇلتتىق قۇرىلتايدىڭ IV وتىرىسىندا بەرگەن تاپسىرمالارىن ورىنداۋ اياسىندا ازىرلەنىپ جاتقان زاڭ جوبالارىن تالقىلادى.
كەزدەسۋ سوڭىندا ەرلان قارين پرەزيدەنت باستامالارىن ىسكە اسىرۋعا زاڭنامالىق تۇرعىدان بەلسەندى قولداۋ كورسەتكەنى ءۇشىن پارتيالىق فراكتسيالارعا العىس ايتىپ, الداعى ۋاقىتتا دا وسىنداي ءتيىمدى ىقپالداستىق بولاتىنىنا سەنىم ءبىلدىردى.
