2025 جىلدىڭ ماۋسىم ايىنان باستاپ «قاراسورا – 2025» اتتى كەڭ اۋقىمدى جەدەل-پروفيلاكتيكالىق ءىس-شارا ءوتىپ جاتىر. ونىڭ ماقساتى – ەسىرتكى تەكتەس وسىمدىكتەردىڭ تابيعي وشاقتارى مەن پلانتاتسيالارىن انىقتاپ جويۋ, ەسىرتكى زەرتحانالارى مەن ارنالارىن, سونداي-اق ەسىرتكى تاراتۋمەن اينالىساتىن ۇيىمداسقان قىلمىستىق توپتاردىڭ ارەكەتىن توقتاتۋ.
مىندەتتەردى ناتيجەلى ورىنداۋ ءۇشىن ءىىم-ءنىڭ ارنايى بولىمشەلەرى مەن ۇلتتىق ۇلان كۇشتەرى جۇمىلدىرىلدى, ۇشقىشسىز ۇشۋ اپپاراتتارى مەن تىكۇشاقتار قولدانىلىپ جاتىر.
بار-جوعى ءۇش اي ىشىندە 40 اۋە رەيدى جاسالىپ, ناتيجەسىندە 20 ەسىرتكى ەگىستىگى انىقتالدى. 5 مىڭنان استام ەسىرتكى تەكتەس وسىمدىك تۇبىمەن جويىلىپ, جالپى سالماعى 1 توننادان اساتىن ءونىم تاركىلەندى.
ۇلىتاۋ وبلىسىندا وڭتۇستىك وڭىرلەردەن ورتالىق جانە سولتۇستىك قازاقستانعا ەسىرتكى جەتكىزۋ ارناسى توقتاتىلدى. قىلمىستىق توپتىڭ 4 مۇشەسى ۇستالدى. ولاردان جول تالعامايتىن كولىكتەر, وق-دارىلەرى بار ويىق ۇڭعىلى قارۋ جانە 103 كگ ماريحۋانا تاركىلەندى.
جامبىل وبلىسىندا ماريحۋانا دايىنداپ, ساتۋمەن اينالىسقان ەكى ازامات ۇستالدى. ولاردان 206 كگ-نان استام ەسىرتكى زات الىندى.
باتىس قازاقستان وبلىسىنداعى جەكەمەنشىك سەكتوردان جوعارى كونتسەنتراتسيالى قاراسورا وسىرىلگەن جىلىجاي تابىلدى. 47 ءتۇپ, جالپى سالماعى شامامەن 135 كگ ءونىم تاركىلەندى.
تۇركىستان وبلىسىنىڭ قيىن تاۋلى ايماقتارىندا ۇلتتىق ۇلاننىڭ قاتىسۋىمەن قۇرىلعان ارنايى توپ ءۇش ازاماتتى قولعا ءتۇسىردى. ولاردىڭ قولىنان ويىق ۇڭعىلى قارۋ, 650 كگ-نان استام قاراسورا جانە 48 كگ-عا جۋىق كوكنار تاركىلەندى.
جەزقازعان مەن ساتباەۆ قالالارىندا زاڭدى تاۋار تۇرىندە بۇركەمەلەنگەن ەسىرتكى ءونىمى جەتكىزىلىپ جۇرگەنى اشكەرەلەندى. زاڭسىز اينالىمنان 43 توننادان استام كوكنار الىندى.
وپەراتسيا قورىتىندىسى بويىنشا:
-
677 ەسىرتكى قىلمىسى انىقتالدى, سونىڭ ىشىندە 242 ساتۋ جانە 220 زاڭسىز ءوسىرۋ دەرەگى;
-
2 توننا ماريحۋانا, 47 كگ گاشيش, 3 توننا قاراسورا وسىمدىگى, 155 كگ سينتەتيكالىق ەسىرتكى جانە 8,5 توننا پرەكۋرسور تاركىلەندى;
-
27 مىڭنان استام ەسىرتكى وسىمدىگى جويىلدى;
-
9 ەسىرتكى زەرتحاناسى جويىلىپ, 3 ۇيىمداسقان قىلمىستىق توپتىڭ, سونىڭ ىشىندە ءبىر ترانسۇلتتىق توپتىڭ ارەكەتىنە توسقاۋىل قويىلدى.
بۇل باعىتتاعى جۇمىستار جالعاسىپ جاتىر.
ايتا كەتسەك, وپەراتسيا كەزىندە ەرەكشە نازار ەسىرتكى وسىمدىكتەرىنىڭ شيكىزات كوزى ورنالاسقان ەلدىڭ وڭتۇستىك ايماقتارىنا اۋدارىلىپ وتىر.
