قاسىم-جومارت توقاەۆ جاستارعا ارناعان سوزىندە «ادامنىڭ ادامشىلىعى اقىل, عىلىم, جاقسى اتا, جاقسى انا, جاقسى قۇربى, جاقسى ۇستازدان بولادى» دەگەن ۇلى ابايدىڭ ايتقانىن كەلتىردى. وسى ورايدا اقتوبە فەرروقورىتپا زاۋىتىندا جاستار كوپتەپ ەڭبەك ەتەتىنىن ايتقىم كەلەدى. بارلىعى دا – وڭىردەگى ق.جۇبانوۆ اتىنداعى اقتوبە وڭىرلىك ۋنيۆەرسيتەتىن ءبىتىرىپ كەلگەن جاس ماماندار. ديپلومىن الا سالا جۇمىسقا قابىلدانىپ جاتىر. تاجىريبەلى اعا ماماندار ولارعا جاقسى ۇستاز بولىپ جول كورسەتىپ كەلەدى.
ءوزىم دە 11 جىل بۇرىن وسى ءوندىرىس ورنىنا تاجىريبەسىز بىرنەشە جاسپەن بىرگە قىزمەتكە قابىلداندىم. قازىر زاۋىتتا اۋىسىم شەبەرى بولىپ قىزمەت اتقارامىن. قاراماعىمدا 7 ادام بار, بارلىعى – جاستار. پرەزيدەنت ايتقانداي بارلىعىنىڭ كوزقاراسى – ءارتۇرلى. دەسە دە تاجىريبەسى از بولعانىمەن, ولار ءبىلىمدى, كۇش-جىگەرى كوپ. بىردەن شەشىم قابىلداۋعا دايىن.
وسى ورايدا پرەزيدەنتتىڭ ءوز ايتقانىن كەلتىرە كەتەيىن: «قازىرگى كوكىرەگى وياۋ جاس ۇرپاق وتانشىلدىق دەگەن ءسوزدى باسقاشا قابىلدايدى. جاستاردىڭ باسىم كوپشىلىگى اسىرەدىنشىلدىكتى, اسىرەۇلتشىلدىقتى قولدامايدى. ولار ءۇشىن ءپاتريوتيزمنىڭ باستى كورسەتكىشى – جاسامپازدىق پەن جاڭاشىلدىق. جاستار «ەلدى ءسۇيۋ دەگەنىمىز – حالىققا پايداسى تيەتىن جاڭالىق اشۋ, جاڭا ءىس باستاۋ» دەپ تۇسىنەدى. ولار قازاقستاندى دامىعان, كوركەيگەن مەملەكەت رەتىندە كورگىسى كەلەدى. زاماناۋي تەحنولوگيالاردى مەڭگەرىپ, حالقىمىزدى وزىق ويلى ۇلتتاردىڭ قاتارىنا قوسۋعا تالپىنادى», دەپ جاستاردىڭ ويىمەن ساناسىپ, ولاردىڭ جاسىنا ءتان قابىلداۋ ەرەكشەلىگىنە تۇسىنىستىكپەن قاراپ, قولداۋ ءبىلدىرىپ وتىر. بۇل جاستارعا ۇلكەن رۋح بەرەدى.
نۇرلان بايمولدين,
اقتوبە فەرروقورىتپا زاۋىتىنىڭ اۋىسىم شەبەرى
