وسى جولى مۇنداعى حالىق كۇيشى-كومپوزيتورلارىنىڭ اتى-جوندەرى قاشالعان ۇلكەن ەسكەرتكىش تاقتاعا قازاقستاننىڭ ەڭبەك سىڭىرگەن قايراتكەرى, كۇيشى-كومپوزيتور, پروفەسسور ورىنباي دۇيسەن ەسىمى جازىلدى. بىلتىر دۇنيە سالعان كۇيشىنىڭ قازاق كۇي ونەرى مەن مۋزىكاسىنا ەڭبەگى سىڭگەنىن كوزى قاراقتى ەل بىلسە كەرەك.
اتالعان ءىس-شارانى ۇيىمداستىرۋشى "كۇي اناسى" قورىنىڭ جەتەكشىسى, قوعام قايراتكەرى تولەگەن قۋانىشەۆ مازمۇندى جيىن اشىلۋىندا مايەكتى وي اعىتتى.
- تىرشىلىگىندە ۇلت ونەرىنە ولشەۋسىز ەڭبەك ءسىڭىرىپ, قاسيەتتى كۇي ونەرىن دارىپتەپ قانا قويماي, جۇزدەگەن دومبىراشى, كۇيشىلەر تاربيەلەگەن, كۇي ونەرىنىڭ شىن مانىندەگى نار تۇلعاسى ورىنباي دۇيسەن ەسىمى قانداي قۇرمەتكە بولسىن لايىق. سوندىقتان ونەر يەسىنىڭ ەسىمى قازاق حالقىنا داڭقى جايىلعان كۇيشىلەر قاتارىنا قاشالۋى زاڭدىلىق دەپ بىلەمىز. يگىلىكتى ءىس قۇرمانعازى اتىنداعى كونسەرۆاتورياسى عىلىمي كەڭەسىنىڭ شەشىمى نەگىزىندە استانا قالاسى مادەنيەت باسقارماسى, المادى اۋدانى باسشىلارىنىڭ, نۇرلان بەكەنوۆ باستاعان شاكىرتتەرىنىڭ قولعا الۋىمەن جۇزەگە اسىرىلىپ وتىر, - دەدى تولەگەن قۋانىشەۆ.
قۇرمانعازى, ابىل, قازانعاپ سىندى ۇلى كۇيشىلەر مۇراسىن شەبەر ورىنداۋىمەن قاتار, ورىنباي دۇيسەننىڭ اۆتورلىق شىعارمالارى ءوز الدىنا ءبىر توبە. اۆتوردىڭ "وتپانتاۋ" كۇيىن شاكىرتى تابىس قۇدايبەرگەن ناقىشىنا كەلتىرىپ دومبىرادا كوسىلتتى. تاريح عىلىمدارىنىڭ دوكتورى, پروفەسسور بۇركىت اياعان مۇنداي ۇلى كۇيشىلەر قاتارىنا ەنگەن ورىنباي ەسىمى ءۇشىن قۋانىشىن ءبىلدىردى.
كۇيشى, دومبىراشى ايتجان توقتاعان ورىنباي باۋىرىنىڭ دۇنيەدەن ەرتە كەتكەنىنە وكىنىش ءبىلدىرىپ, استانادا العاشقىلاردىڭ ءبىرى بوپ جوو-دا دومبىرا ءبولىمىن ورنىقتىرۋعا كۇش سالعانىن ەسكە الىپ, ەڭبەگىن جوعارى باعالادى.
ءىس-شارا بارىسىندا باسقا دا زيالى قاۋىم وكىلدەرى سويلەپ, حالىق كومپوزيتورلارىنىڭ كۇيلەرى تارتىلدى.
