سۋرەت: qamshy.kz/kz
وڭىرلىك ءبىلىم بەرۋ باسقارماسىنىڭ دەرەگىنشە, وبلىستىڭ 12 مىڭنان اسا مەكتەپ وقۋشىسى كومەككە ءزارۋ. ولاردىڭ دەنى – كوپبالالى, از قامتىلعان وتباسىلاردا تاربيەلەنىپ جاتقان بالدىرعاندار.
– اكتسيا بارىسىندا جۇرگىزىلەتىن نەگىزگى ءىس-شارالار بار. ولار الەۋمەتتىك از قامتىلعان وتباسىلارعا كومەك كورسەتۋ, قايىرىمدىلىق شارالارىن ۇيىمداستىرۋ. دەمەۋشىلەردىڭ ەسەبىنەن وقۋشىلارعا مەكتەپكە قاجەتتى قۇرال-جابدىقتار, كيىم, اياقكيىم, پورتفەل مەن كەڭسە جابدىقتارى ساتىپ الىنىپ جاتىر. جەرگىلىكتى ءبىلىم بولىمدەرىندەگى الەۋمەتتىك قورعاۋ قىزمەتكەرلەرى مۇقتاج وتباسىلاردىڭ ءتىزىمىن جاسايدى. مەكتەپتەرمەن بىرلەسە وتىرىپ ناقتى كومەكتى قاجەت ەتەتىن بالالار انىقتالادى, – دەيدى پاۆلودار وبلىسى ءبىلىم بەرۋ باسقارماسى بالالاردىڭ قۇقىقتارىن قورعاۋ جانە ينكليۋزيۆتى ءبىلىم بەرۋ ءبولىمىنىڭ باس مامانى سامال ءالىموۆا.
ماماندار اكتسيا بارىسىندا رەيدتەر جۇرگىزىپ, جارمەڭكەلەر ۇيىمداستىرادى. جارمەڭكەلەر اۋدان, قالالارداعى بازارلار اۋماعىندا ءوتىپ جاتىر. مۇندا وقۋ قۇرالدارى مەن كيىم-كەشەك دۇكەندەردەن الدەقايدا ارزان باعادا ۇسىنىلادى.
اتا-انالاردىڭ وتىنىشتەرىنە جەدەل جاۋاپ بەرۋ ءۇشىن «جەدەل جەلىلەر», «سەنىم» تەلەفوندارىنىڭ جۇمىسى ۇيىمداستىرىلعان. كومەككە مۇقتاج وتباسىلار تۇرعىلىقتى جەرى بويىنشا ءبىلىم بەرۋ بولىمىنە نەمەسە تىكەلەي ءبىلىم بەرۋ ۇيىمىنا جۇگىنە الادى.
پاۆلودار وبلىسى
