فوتو: itecgroup.ru
عىلىم جانە جوعارى ءبىلىم ءمينيسترى ساياسات نۇربەكتىڭ مالىمەتىنشە, ەلىمىزدە ۇلىبريتانيا, اقش, وڭتۇستىك كورەيا جانە باسقا دا ەلدەردىڭ جەتەكشى شەتەلدىك ۋنيۆەرسيتەتتەرىنڭ 24 فيليالى اشىلعان. بۇل قازاقستاندىق جاستارعا شەتەلگە شىقپاي-اق وزىق ءبىلىم الۋعا مۇمكىندىك بەرەدى. ءبىلىم بەرۋدى تەحنولوگيالىق جاڭعىرتۋدىڭ نەگىزگى ەلەمەنتى اۋقىمى جاعىنان بۇرىن-سوڭدى بولماعان AI-Sana باعدارلاماسى بولىپ وتىر. ونىڭ ماقساتى – ستۋدەنتتەرگە جاساندى ينتەللەكتى تەحنولوگيالارىن جاپپاي وقىتۋ.
«باعدارلاما جۇزەگە اسىپ جاتقان 5 ايدا ءبىزدىڭ ستۋدەنتتەر ەندىگىسى 119 جاساندى ينتەللەكتى اگەنتىن قۇردى, تاعى 395-ءى ازىرلەنۋدە. ناتيجەسىندە 20 ۋنيۆەرسيتەتتە جي, ماشينالىق وقىتۋ جانە كيبەرقاۋىپسىزدىك سالاسىندا 25 تۇبەگەيلى جاڭا ءبىلىم بەرۋ باعدارلاماسى اشىلدى», دەدى مينيستر.
تەحنولوگيالىق ەگەمەندىكتى قامتاماسىز ەتۋ ءۇشىن وسى سالادا قۋاتتى ينفراقۇرىلىم قۇرىلادى, ونىڭ ىشىندە 42 PFlops سۋپەركومپيۋتەرلىك كلاستەرى بار. جاساندى ينتەللەكت بويىنشا كۋرستار قازىردىڭ وزىندە ەلىمىزدىڭ بارلىق جوعارى وقۋ ورىندارىندا مىندەتتى پانگە اينالدى, بۇل IT-ماماندار مەن عىلىمي كاسىپكەرلەردىڭ جاڭا بۋىنىن دايارلاۋعا نەگىز قالايدى.
«ەكى جىل بۇرىن ءبىز Coursera كورپوراتسياسىمەن ارنايى كەلىسىمگە قول قويدىق, سونىڭ ارقاسىندا ءبىزدىڭ 95 ۋنيۆەرسيتەت وسى پلاتفورماداعى كۋرستارعا تەگىن قول جەتكىزدى. وسى ۋاقىت ىشىندە ستۋدەنتتەر 350 مىڭنان استام سەرتيفيكات الىپ, 2,5 ملن ساعاتقا جۋىق ونلاين-كۋرستاردان ءوتتى. وسى جۇيەلى جۇمىستىڭ ارقاسىندا قازاقستان بيىل وتە بەدەلدى بولىپ سانالاتىن Coursera حالىقارالىق سىيلىعىنىڭ لاۋرەاتى اتاندى», دەدى عىلىم جانە جوعارى ءبىلىم ءمينيسترى ساياسات نۇربەك.
