سۋرەتتى تۇسىرگەن – ەسەنجول يسابەك
اتالعان قۇندى مۇرا مۋزەيگە 1953 جىلى تاپسىرىلعان. جادىگەردى تۋىستارى كوپ جىل بويى جەرگە كومىپ ساقتاعان ەكەن.
مەكەمەنىڭ ءبولىم باسشىسى جەڭىسبەك قادىر ۇلىنىڭ ايتۋىنشا, ساۋىت قىسقا جەڭدى, تازا تەمىر شىنجىرلاردان جاسالعان. شىنجىرلار جارتىلاي ۇزىلگەن. جالپى سالماعى 15 كيلونى قۇرايدى.
«ساۋىتتى مالايسارى باتىر بوزبالا شاعىندا كيگەن. ونىڭ تەمىر شىنجىرلارىن كەزىندە تۋىستارى وزدەرىنە ەسكەرتكىش زات رەتىندە ءبىر-بىردەن شەشىپ العان دەسەدى. ءتىپتى كيە تۇتىپ, ىرىمداپ العاندار دا بولعان. مۋزەيگە وتكەن مۇرا كوبە ساۋىتقا ۇقساس, كەبەنەك سىرتىنان كيۋگە ارنالعان. ساۋىت العاشقى تاپسىرىلعان قالپىندا ساقتالعان», دەيدى ج.قادىر ۇلى.
مالايسارى باتىر عانا ەمەس, ءبيدىڭ ءرولىن دە اتقارعان. ول شامامەن 1700–1756 جىلدار ارالىعىندا ءومىر سۇرگەن. تاريحشىلاردىڭ مالىمەتىنە سۇيەنسەك, مالايسارى – ابىلاي حاننىڭ سەنىمدى سەرىگى. قازاقتىڭ رەسەي قول استىنا كىرۋىنە قارسى كۇرەسكەن جانە قازاق-قالماق سوعىسىن توقتاتۋعا زور ۇلەسىن قوسقان. ەكى حاندىق اراسىندا بەيبىت كەلىسىم جاساۋ ساياساتىن ۇستانعانداردىڭ ءبىرى بولعان.
1741–1742 جىلدارى ابىلاي حاندى تۇتقىننان قايتارۋ جونىندە جۇرگىزىلگەن كەلىسسوزدەر بارىسىندا قالدان-سەرەن مالايسارىعا «تارحان» اتاعىن بەردى. «تارحان» اتاعى – كونەدەن كەلە جاتقان لاۋازىم, دارەجە. بۇل اتاقتىڭ يەلەرى الىم-سالىقتان بوساتىلعان, ۇساق قىلمىس ءۇشىن حان الدىندا عانا جاۋاپ بەرگەن.
پاۆلودار وبلىسى
