سالتاناتتى جيىن بارىسىندا وبلىستىق ادىلەت دەپارتامەنتىنىڭ باسشىسى ءاليا امانجولوۆا قۇتتىقتاۋ ءسوز سويلەپ, كونستيتۋتسيا ەل تاۋەلسىزدىگىنىڭ, دەموكراتيالىق ينستيتۋتتاردىڭ جانە قۇقىقتىق مەملەكەتتىڭ بەرىك نەگىزى ەكەنىن ايتتى.
«كونستيتۋتسيا – ادام قۇقىقتارى مەن بوستاندىقتارىن ەڭ جوعارى قۇندىلىق رەتىندە ايقىنداپ بەرگەن ەلىمىزدىڭ باس قۇجاتى. وتكەن وتىز جىل ىشىندە ەلىمىزدە بولىپ جاتقان يگى وزگەرىستەر, قازاقستاننىڭ دەموكراتيالىق, زايىرلى, قۇقىقتىق جانە الەۋمەتتىك مەملەكەت بولىپ قالىپتاسۋىنىڭ ءبارى – كونستيتۋتسيا قاعيدالارى نەگىزىندە ىسكە اسىرىلىپ كەلەدى. بيىل اتا زاڭىمىز وتىز جىلدىق تاريحي بەلەستى باعىندىرىپ وتىر. وسى جىلدار ىشىندە دامىپ, جەتىلگەن كەمەل كونستيتۋتسيامىز قازاقستاننىڭ قوعامدىق جانە مەملەكەتتىڭ قۇرىلىمىن بەكىتىپ بەردى», – دەدى دەپارتامەنت باسشىسى.
جيىن بارىسىندا كونستيتۋتسيانىڭ تاريحىن, ءمان-ماڭىزىن بايانداعان ارنايى بەينەروليك كورسەتىلدى. ودان كەيىن ءسوز قوعام قايراتكەرى, ارداگەر زاڭگەر, قازاقستان كونستيتۋتسياسىن ازىرلەۋگە تىكەلەي قاتىسقان سەرگەي جالىبينگە بەرىلدى. تاجىريبەلى زاڭگەر كوپشىلىككە كونستيتۋتسيانى ازىرلەۋ بارىسىنداعى تاريحي ساتتەر تۋرالى ايتىپ بەردى.
مەرەكەلىك ءىس-شارا اياسىندا 16 جاسقا تولعان جاسوسپىرىمدەرگە العاش رەت جەكە كۋالىك تاپسىرۋ ءراسىمى ءوتتى. قۇجاتتارىن العان بالالارعا ادىلەت دەپارتامەنتىنىڭ باسشىسى ىزگى تىلەگىن ءبىلدىرىپ, بۇل ءساتتىڭ ازاماتتىق جاۋاپكەرشىلىكتىڭ باستاۋى ەكەنىن اتاپ ءوتتى.
ءىس-شارانىڭ سوڭىندا ادىلەت دەپارتامەنتىنىڭ باسشىسى ءاليا امانجولوۆا قازىرگى تسيفرلىق زاڭنامالىق رەفورمالارعا كەڭىرەك توقتالىپ, ەلەكتروندى سەرۆيستەر مەن ونلاين-قۇقىقتىق كومەك تەتىكتەرى تۋرالى باياندادى.
قوستاناي وبلىسى
