بۇل تاريحي قۇجات تۇركىستان مەن بايان-عولدىڭ اراسىنداعى كوپجاقتى سەرىكتەستىكتىڭ جاڭا كەزەڭىن باستاپ قانا قويماي, ەكى ەل اراسىنداعى دوستىق پەن ءوزارا سەنىمگە نەگىزدەلگەن ستراتەگيالىق ارىپتەستىكتىڭ ناقتى كورىنىسىنە اينالدى. بايان-عول – قىتايداعى ءىرى ماقتالى ولكەلەردىڭ ءبىرى. كەزدەسۋ بارىسىندا تۇركىستان وبلىسىنىڭ اكىمى نۇرالحان كوشەروۆ بايان-عول دەلەگاتسياسىن قۇتتىقتاي وتىرىپ, وڭىرارالىق قاتىناستاردى دامىتۋدىڭ ماڭىزدىلىعىن اتاپ ءوتتى. «بۇگىنگى سەرىكتەستىگىمىز – وتكەن جىلى قىتاي حالىق رەسپۋبليكاسىنا جاساعان ءىسساپارىمىز بارىسىندا سىزدەرمەن وتكىزىلگەن كەزدەسۋدىڭ ناقتى ناتيجەسى. سول ساپار اياسىندا بىرقاتار وزەكتى جوبالار تالقىلانىپ, ءوزارا ىنتىماقتاستىقتىڭ بەرىك نەگىزى قالانعان بولاتىن. وسى باستاما ءوز جالعاسىن تاۋىپ, ەكى جاققا دا ءتيىمدى ناقتى ناتيجەلەرگە جەتكىزەتىن بەرەكەلى سەرىكتەستىككە اينالادى دەپ سەنەمىز», دەدى نۇرالحان كوشەروۆ.
ال چجۋ دايۋن مىرزا وڭىرارالىق قاتىناستاردى دامىتۋدىڭ ماڭىزدىلىعىنا توقتالىپ, باۋىرلاس وڭىرلەر اراسىنداعى ءوزارا سەنىمگە نەگىزدەلگەن ارىپتەستىك بايلانىستاردى كەڭەيتۋ, بىرلەسكەن جوبالاردى جۇزەگە اسىرۋ جانە تاجىريبە الماسۋ ەكىجاقتى ىنتىماقتاستىقتى جاڭا دەڭگەيگە كوتەرەتىنىن اتاپ ءوتتى.
كەزدەسۋ بارىسىندا تاراپتار اگروونەركاسىپ كەشەنىندە بىرلەسكەن كاسىپورىندار قۇرۋ, تەحنولوگيالار مەن عىلىمي زەرتتەۋلەر الماسۋ, تۇراقتى ەكسپورت-يمپورت جۇيەسىن قالىپتاستىرۋ ماسەلەلەرىن تالقىلادى. سونداي-اق تۇركىستان وبلىسى مەن بايان-عول كاسىپكەرلەرىنىڭ 40-تان استام كومپانياسى اراسىندا B2B كەزدەسۋلەر ءوتتى. قىتايلىق دەلەگاتسيا ءتۇرلى سالادا جۇمىس ىستەيتىن وڭىرلىك كاسىپورىندارمەن اۋىل شارۋاشىلىعى, وڭدەۋ, قۇرىلىس, جەڭىل ونەركاسىپ, لوگيستيكا جانە فارماتسەۆتيكا سالالارىندا ارىپتەستىك ورناتۋ مۇمكىندىكتەرىن تالقىلادى. شارا اياسىندا ەكى ءوڭىردىڭ ونەركاسىپ ونىمدەرىنىڭ كورمەسى ۇيىمداستىرىلدى. دەلەگاتسيا مۇشەلەرى تۇركىستان وبلىسىنىڭ «TURAN» ارنايى ەكونوميكالىق ايماعى مەن «شاعىن ونەركاسىپتىك پاركتەر» قىزمەتىمەن تانىستى.
تۇركىستان وبلىسى
