– حالىقتى تۇرعىن ۇيمەن قامتاماسىز ەتۋ – مەملەكەتتىك ساياساتتىڭ باسىم باعىتتارىنىڭ ءبىرى, – دەدى وبلىس اكىمى مارات احمەتجانوۆ, – ەل پرەزيدەنتى قاسىم-جومارت توقاەۆتىڭ تاپسىرماسىنا سايكەس, باسپانا ەڭ الدىمەن مۇقتاج ازاماتتارعا بەرىلۋى كەرەك. بولىنگەن 371 پاتەردىڭ 261-ءىن الەۋمەتتىك جاعىنان از قامتىلعان وتباسىلار جاڭا باعدارلاما اياسىندا جەكەشەلەندىرۋ قۇقىعىمەن جالعا السا, 110 وتباسى نەسيەگە باسپانا الا الادى.
«وتباسى بانك» اق وڭىرلىك فيليالىنىڭ ديرەكتورى المات نۇراحمەتوۆتىڭ ايتۋىنشا, پيلوتتىق جوبا اياسىندا تولىق اشىقتىق قاعيداتى ەنگىزىلۋدە.
–بۇل ءبىزدىڭ قالا ءۇشىن ەلەۋلى وقيعا. جاڭا جوبا قالا تۇرعىندارىنىڭ الەۋمەتتىك-تۇرمىستىق جاعدايىن جاقسارتۋعا سەپتىگىن تيگىزبەك, – دەيدى قوسشى قالاسىنىڭ تۇرعىنى, قالالىق ءماسليحاتتىڭ دەپۋتاتى يرينا وسيپوۆا.
ءسوز اراسىندا سوڭعى ەكى جىلدا وبلىستا مەملەكەتتىك قولداۋ شارالارى ارقىلى 4 787 وتباسى باسپانامەن قامتىلعاندىعىن ايتا كەتەلىك. بۇل سوڭعى جەتى جىلداعى رەكوردتىق كورسەتكىش. تەك قوسشىدا عانا بيىل 560 وتباسى تۇرعىن ۇيمەن قامتاماسىز ەتىلەدى.
اقمولا وبلىسى,
قوسشى قالاسى.
