حح عاسىردىڭ باسىنداعى جاستاردىڭ سۋرەتكە تۇسۋگە قۇشتارلىعى كوپ بولعان سياقتى. مىسالى, ساكەن سەيفۋلليننىڭ فوتولارى وتە كوپ. ال ومبىنىڭ مۇعالىمدەر سەمينارياسىندا بىرگە وقىعان ماعجاننىڭ سۋرەتى مۇلدە از. توپپەن وتىرعان جالعىز عانا فوتوسى بار. الايدا ونى سۋرەتشىلەرىمىز نەشە الۋان تۇستەرمەن كوركەمدەپ, اشەكەيلەپ, ايتەۋىر كوبەيتۋگە تىرىسىپ ءجۇر. ال ماعجاننىڭ ماسكەۋدەگى ۆ.بريۋسوۆ اتىنداعى ادەبيەت ينستيتۋتىندا تۇسكەن بىردە-ءبىر سۋرەتى كوزگە تۇسپەدى. مۇڭعا تۇنعان تۇڭعيىق كوزدەرى الاشتىڭ ءحالىن ويلاپ, ۋايىم جەپ تۇرعانداي سۋرەتكە جاس كەزىندە جانىنداعى بىرنەشە اداممەن بىرگە تۇسكەن. تاعى ءبىر سۋرەتى – شەبەر سۋرەتشىلەرىمىزدىڭ ءبىر فوتوسۋرەتىنەن كوشىرىپ, بارىنشا اسەمدەپ, سۇلۋ قىلىپ شىعارعان نۇسقاسى.
بۇل سۋرەت – ءابامۇسلىم دەگەن اعاسىنىڭ بالاسى قابدوشتىڭ ۇيىنەن تابىلعان تۇپنۇسقا فوتو. ونى پىسىق كەلىندەرىنىڭ ءبىرى توردە ءىلۋلى تۇرعان ەسكى فوتورامانىڭ شاڭىن سۇرتپەك بولىپ جاتقاندا اياق استىنان تاپقان. بۇل ناعىز ماعجان اقتالىپ, جەر دە, كوك تە ونىڭ ەسىمىن ايتىپ, ەسكە الىپ جاتقان كەز ەدى. جاس كەلىن تاپقانىن جۇگىرىپ كەلىپ ەنەسىنە كورسەتكەندە, اتاسىن كورگەن كەيۋانا جوقتاۋ ايتىپ, ءۇيدىڭ ءىشىن ازان-قازان قىلعان. وسى سۋرەت قازىر اقىننىڭ تۋعان جەرى م.جۇماباەۆ اۋدانىنداعى سارتومار اۋىلىنداعى مۋزەيدە تۇر.
ال تاعى ءبىر فوتونى «ماعجان ورتالىعى» اشىلعاندا رەسپۋبليكالىق «قاھارماندار» قورىنىڭ توراعاسى, قۋعىن-سۇرگىن قۇرباندارىن تولىق اقتاۋ جونىندەگى مەملەكەتتىك كوميسسيانىڭ جۇمىسىن قامتاماسىز ەتۋ جوبالىق كەڭسەسىنىڭ باسشىسى سابىر قاسىموۆ سىيعا تارتقان. بۇل سۋرەت اقىننىڭ تراگەديالىق سيپاتىن ءدال بەرەدى. كوزىنەن نۇر تامعان دوڭگەلەك ءجۇزدى اقىن باسىنان كەشكەن قاسىرەتتىڭ كەسىرىنەن ەكى جاعى سۋالىپ, ات جاقتى بولىپ كەتكەن. ماعجاننىڭ وسى بەينەسى ۇزاق جىل بويى نكۆد-نىڭ ارحيۆ قورلارىنىڭ اراسىندا جاتقان ەكەن. ونى مەملەكەتتىك كوميسسيا قىزمەتكەرلەرى تاپقان. فوتوعا رەتۋش جاسالعانى كورىنىپ تۇر, ايتپەسە ول كەزدە ءتۇرلى-ءتۇستى فوتو ءالى بىزگە جەتكەن جوق ەدى. ونىڭ ۇستىنە اقىننىڭ شاشى دا قاپ-قارا كۇيىندە كورسەتىلىپتى. ۇستىندە تۇرمەنىڭ روباسى... ورتالىق اشىلعانداعى ەرەك وقيعا دا وسى ەدى.
سولتۇستىك قازاقستان وبلىسى
