– ەلەكتر قۋاتىن بوساتۋ ءتاريفى بۇرىنعى 29,04 تەڭگەدەن 32,58 تەڭگەگە ءوستى. ياعني ءوسىم 12,2 پايىزدى قۇراپ وتىر. ءاۋ باستا مونوپوليست كومپانيا بۇل باعانى بىردەن 40 پايىزعا ءوسىرۋ تۋرالى ۇسىنىسپەن شىققان. بىراق ءبىز بارلىعىن قايتا ەسەپتەپ, فاكتورلاردى ەسكەرە وتىرىپ دالەلدى تۇردە 12,2 پايىزعا تۇسىردىك. ءتاريفتىڭ وزگەرۋىنە كومپانيانىڭ وزىندىك شىعىندارىنىڭ 29 پايىزعا ارتىپ كەتۋى سەبەپ بولىپ وتىر. اتاپ ايتقاندا, بىرىڭعاي ساتىپ الۋشى مەن ساتۋشى باعانى 24 تەڭگەدەن 32 تەڭگەگە دەيىن كوتەرگەن. ەكىنشىدەن, كاسىپورىندا بيىل ورتاشا ەڭبەكاقى مولشەرى 360 مىڭنان 496 مىڭ تەڭگەگە دەيىن جوعارىلادى. ول دا ءتاريفتىڭ وزگەرۋىنە سەبەپ بولدى. بۇعان قوسا, پاۆلودار ەلەكتر تاراتۋ توراپتارىنىڭ شىعىنى 30 پايىزعا ارتقان. سونداي-اق مونوپوليست ەلەكتر قۋاتىن تاسىمالداۋ كەزىندە كوپتەگەن جەكە كومپانيالاردىڭ جەلىلەرىن پايدالاناتىنىن ەسكەرۋ كەرەك. ماسەلەن بيىل «قازاقستان تەمىر جولى» اق-نىڭ جەلى پايدالانۋ تاريفتەرى 48 پايىزعا, «قازسۋشار» رمك-دا ول 112 پايىزعا كوتەرىلگەن. سالدارىنان الگى كومپانيالاردىڭ جەلىلەرى ارقىلى ءوتىپ, تۇتىنۋشىلارعا جەتەتىن ەلەكتر ەنەرگياسىنىڭ وزىندىك قۇنى قىمباتتاعان, – دەپ ءتۇسىندىردى ءتاريفتىڭ وزگەرۋىنە اسەر ەتكەن فاكتورلاردى پاۆلودار وبلىسى تابيعي مونوپوليالاردى رەتتەۋ دەپارتامەنتىنىڭ باسشىسى نۇرلان نۇرمۇراتوۆ.
انىقتاپ بىلگەنىمىزدەي, تاريفكە قۋات نارىعىنداعى باعالاردىڭ وزگەرۋى دە ىقپال ەتكەن. 1 مەگاۆاتت بۇرىن 1 ملن 196 مىڭ تەڭگە تۇرسا, قازىر ول 1 ملن 400 مىڭ تەڭگە بولىپ بەكىتىلگەن.
«پاۆلودارەنەرگو» تاريفتىك ۇسىنىستارىندا قوسىمشا پايدا بولعان شىعىندار 12 ملرد تەڭگە دەپ كورسەتىپ, ورتاشا ءتاريفتى 37 تەڭگەگە دەيىن كوتەرۋگە ارەكەتتەنگەن. بىراق ءبىز ءوز تاراپىمىزدان تالداۋلار جۇرگىزە كەلىپ, قوسىمشا شىعىنداردى 5 ملن تەڭگەگە دەيىن تومەندەتتىك, نەگىزسىز شىعىنداردى الىپ تاستادىق. ناتيجەسىندە, تاريف تۇتىنۋشىلارعا اسا اۋىرلىق تۇسىرمەيتىن دەڭگەيدە بەكىتىلدى. مۇنىڭ بارلىعى ەلىمىزدىڭ تابيعي مونوپوليالار تۋرالى زاڭناماسى اياسىندا جۇزەگە استى», دەدى نۇرلان نۇرمۇراتوۆ.
اتاپ وتەرلىگى, تاريفتەردىڭ ءوسۋى بيىل قالاداعى گيدراۆليكالىق سىناقتار ۋاقىتىمەن تۇسپا-تۇس كەلىپ وتىر. كوپتەگەن ءۇي ىستىق سۋدان ۋاقىتشا اجىراۋىنا بايلانىستى تۇرعىندار پاتەرلەرىندەگى سۋ ىسىتقىشتاردى قوسۋعا ءماجبۇر. بۇل سايىپ كەلگەندە تۇرعىنداردىڭ ەلەكتر قۋاتىن ادەتتەگىدەن كوبىرەك تۇتىنۋىنا سەبەپ. جاڭا تاريف تۇتىنۋشىلاردىڭ قالتاسىنا قانشالىقتى سالماق سالاتىنى قىركۇيەك ايىندا كەلەتىن تۇبىرتەكتەن بايقايتىن بولامىز.
سوڭعى رەت وبلىس ورتالىعىندا ەلەكتر قۋاتىنىڭ ءتاريفى 2024 جىلدىڭ تامىز ايىندا كوتەرىلگەن.
پاۆلودار
