كەزدەسۋدە 2023–2029 جىلدارعا ارنالعان جوعارى ءبىلىم مەن عىلىمدى دامىتۋ تۇجىرىمداماسى, جاساندى ينتەللەكت جانە تسيفرلىق ءبىلىم بەرۋ, AI-SANA جوباسى, ينفراقۇرىلىمدى دامىتۋ, جاستاردى قولداۋ جانە عىلىمي جوبالاردى قارجىلاندىرۋ قاجەتتىگى ءسوز بولدى. سونداي-اق جالاقى مەن الەۋمەتتىك كەپىلدىكتەردى ارتتىرۋ, اكادەميالىق ۇتقىرلىقتى كەڭەيتۋ, قازاقستاندىق جوو-لاردىڭ حالىقارالىق رەيتينگتەردەگى ورنىن جاقسارتۋ جانە ءبىلىم بەرۋ باعدارلامالارىن جاڭا تەحنولوگيالارمەن جاڭارتۋ ماسەلەلەرى كوتەرىلدى.
مينيستر ساياسات نۇربەك دەموگرافيالىق وسىمگە بايلانىستى جوعارى ءبىلىم بەرۋ جۇيەسىنە تۇسەتىن جۇكتەمەنىڭ ارتقانىن اتاپ ءوتتى.
ء«ۇش جىل بۇرىن ءبىز 620 مىڭ ستۋدەنتپەن باستاعانبىز. قازىردىڭ وزىندە 680 مىڭنان استام ستۋدەنت وقىپ جاتىر. ال 2029-2030 جىلدارعا قاراي, ءبىزدىڭ بولجام بويىنشا, ستۋدەنتتەر سانى 1 ميلليونعا جەتەدى دەپ وتىرمىز. ينفراقۇرىلىم, تسيفرلىق پلاتفورمالار, ۇزدىكسىز ءبىلىم, Coursera ءتارىزدى حالىقارالىق پلاتفورمالارمەن سەرىكتەستىكتەر – مۇنىڭ ءبارى وسى دەموگرافيالىق وسىمگە تىكەلەي بايلانىستى», دەدى ول.
جاتاقحانا ماسەلەسىنە دە ەرەكشە توقتالعان مينيستر الماتىدا ارنايى احۋالدىق ورتالىق اشىلعانىن ايتتى. بۇل ورتالىق ارقىلى ستۋدەنتتەر تاۋلىك بويى جاتاقحاناعا قاتىستى كومەك الا الادى. ءمينيستردىڭ ايتۋىنشا, مۇنداي شارالار جاڭا وقۋ جىلى قارساڭىندا ستۋدەنتتەردىڭ بارلىعىن باسپانامەن قامتاماسىز ەتۋگە باعىتتالعان.
كەزدەسۋدە مەملەكەت باسشىسىنىڭ جولداۋىندا بەلگىلەنگەن مىندەتتەردىڭ جۇزەگە اسىرىلۋ بارىسى دا باياندالدى. اتاپ ايتقاندا, جوو بازاسىندا جاساندى ينتەللەكت ماماندارىن دايارلاۋ, «كەلەشەك» بىرىڭعاي ەرىكتى جيناقتاۋ جۇيەسى مەن «ماماندىعىم – بولاشاعىم» جوباسىنىڭ ىسكە اسىرىلۋى تۋرالى تىڭ اقپاراتتار ۇسىنىلدى.
رەسمي بولىمنەن كەيىن مينيستر ازاماتتاردى جەكە قابىلداپ, ولاردىڭ جەكە ماسەلەلەرىن تىڭدادى. جەرگىلىكتى تۇرعىندار عىلىم مەن ءبىلىم سالاسىندا قولعا الىنعان وزگەرىستەرگە بەلسەنە اتسالىسۋعا دايىن ەكەندىكتەرىن جەتكىزىپ, اشىق پىكىر الماسۋ فورماتىنا ريزاشىلىق ءبىلدىردى.
