بۇگىن - شەكاراشىلار كۇنى

بەس مەملەكەتپەن شەكتەسەتىن قازاقستان دوستىق پەن ءوزارا تاتۋلىقتىڭ ايقىن ۇلگىسىن كورسەتىپ كەلەدى. 15 مىڭ شاقىرىمنان اساتىن كەڭ شەكارا بويىندا انتىنا ادال, رۋحى بيىك شەكاراشىلار كۇن-ءتۇن دەمەي قىزمەت اتقارىپ ءجۇر. تاۋەلسىزدىك جىلدارىندا قالىپتاسقان بۇل قىراعى قىزمەت زامان تالابىنا ساي جەتىلىپ, جىلدان-جىلعا نىعايىپ, اۋقىمىن كەڭەيتىپ كەلەدى.

ەلىمىز تاۋەلسىز بولعان 1991 جىلدىڭ جەلتوقسانىنان كەيىن ىرگەلى مەملەكەتتىڭ شەكاراسىن كۇزەتۋ كۇن تارتىبىنە قويىلدى. وسى ماقساتتى جۇزەگە اسىرۋ ءۇشىن 1992 جىلدىڭ 18 تامىزىندا قازاقستان رەسپۋبليكاسى ۇقك شەكارا قىزمەتى قۇرىلدى. الايدا ايتۋلى داتا قازاقستاننىڭ مەملەكەتتىك مەرەكەلەر كۇنتىزبەسىنە 2012 جىلعى 29 تامىزدا عانا ەنگىزىلدى.

ەلىمىز رەسەي, قىتاي, قىرعىزستان, وزبەكستان جانە تۇرىكمەنستانمەن شەكتەسەدى. رەسپۋبليكانىڭ قۇرلىقتاعى مەملەكەتتىك شەكاراسىنىڭ جالپى ۇزىندىعى – 13 402 كم, سۋ شەكاراسى – 1730 كم.

شەكاراشىلاردىڭ باستى مىندەتى – مەملەكەتتىك شەكارانى زاڭسىز كەسىپ وتپەك بولعاندارعا توسقاۋىل قويۋ, ەل اۋماعىنا قاۋىپ توندىرەتىن كەز كەلگەن ارەكەتتىڭ الدىن الۋ. بۇل جاۋاپكەرشىلىكتى ابىرويمەن اتقارىپ جۇرگەن جاس مامانداردىڭ ەرلىگى – قازاقستان قاۋىپسىزدىگىنىڭ باستى كەپىلى.