«بايتەرەك» حولدينگى مەن «قازاقستاننىڭ يپوتەكالىق كومپانياسى» اق وكىلدەرى الەۋمەتتىك جالعا بەرىلەتىن تۇرعىن ءۇي باعدارلاماسى بويىنشا تۇرعىندارعا جاڭا پاتەرلەردىڭ كىلتىن تابىس ەتتى.
ەلباسىنىڭ «نۇرلى جول – بولاشاققا باستار جول» جولداۋىندا باسىمدىق بەرىلگەن تۇرعىن ءۇي ماسەلەسىنە بايلانىستى, اتالعان كومپانيا ناۋرىز ايىندا جاپپاي الەۋمەتتىك جالعا بەرىلەتىن پاتەر بەرۋ ىسىمەن اينالىسپاق. بۇل تۇرعىدا «بايتەرەك» ۇبح» اق باسقارما توراعاسىنىڭ ورىنباسارى الينا الدامبەرگەن وسى ايدىڭ سوڭىنا دەيىن 1357, ال جىل اياعىنا دەيىن 10 مىڭعا جۋىق پاتەر كىلتى تاپسىرىلاتىندىعىن ايتتى. سونىمەن قاتار, الينا وتەمىسقىزىنىڭ ايتۋى بويىنشا, استانا قالاسىندا وتباسىلارعا سىعاناق كوشەسىنىڭ بويىندا ورنالاسقان تۇرعىن ءۇي كەشەنىندە جالپى كولەمى 7,6 مىڭ شارشى مەتردى قۇرايتىن 86 پاتەر بەرىلدى. باعدارلاماعا سايكەس, ەلوردادا باسپانانىڭ 1 شارشى مەتر قۇنى 1110 تەڭگەنى قۇرايدى. پاتەردىڭ ورتاشا كولەمى 68 شارشى مەتر, دەپ اتاپ كورسەتتى ا.وتەمىسقىزى.
استانا قالاسى اكىمىنىڭ ورىنباسارى اندرەي لۋكيننىڭ قۇتتىقتاۋ سوزىنەن كەيىن جۇزدەرىنەن قۋانىش تابى بايقالعان جاڭا پاتەر يەلەرىنە كىلت تابىستاۋ ءراسىمى ءوتتى.
جاڭا پاتەرىنە قۇنداقتاۋلى سابيىمەن كىرگەن سمايلوۆتار وتباسىندا بۇگىنگى كۇن اتاۋلى ەكەندىگى ايتىلدى. ەلباسىنىڭ «نۇرلى جول» باعدارلاماسىنا اسقان ريزاشىلىعىن بىلدىرگەن راۋشان سمايلوۆا ناۋرىز مەرەكەسى قارساڭىندا باسپانالى بولۋ باقىتى بۇيىرعاندىعىن قۋانا جەتكىزدى.
ەلميرا ماتىباەۆا,
«ەگەمەن قازاقستان».
استانا.
ارماندار ورىندالادى
ۇلىستىڭ ۇلى كۇنى, تۇركى حالىقتارىنىڭ ءتول مەرەكەسى, جىلدىڭ جاڭارعان ناۋرىز مەيرامى قارساڭىندا ەلىمىز تۇرعىندارىنا باسپانالى بولىپ, جاڭا پاتەرگە قونىستانۋ باقىتى بۇيىردى. اراعا بىرنەشە جىلدار سالىپ, توزىممەن كۇتكەن ءۇي كەزەگى جەتكەن الماتىلىقتار بۇگىنگى كۇننىڭ قۋانىشىن كەلە جاتقان ۇلى مەرەكەنىڭ شاراپاتىنا بالادى. ءبىر-بىرىمەن «سۇيىنشىلەپ», شاشۋ شاشا پاتەر ەسىگىن اشقان جاس وتباسىلار مارە-سارە كۇي كەشتى. ەلىمىزدىڭ بەس بىردەي قالاسىندا ورىن الىپ جاتقان وسىنداي قۋانىشتى ءساتتىڭ كۋاگەرى بولعاندار ەلباسىنىڭ «نۇرلى جول» باعدارلاماسىنا العىستارىن جاۋدىردى. مەملەكەت باسشىسى نۇرسۇلتان نازارباەۆتىڭ ۇدايى ايتىپ وتىراتىن باسپانا جونىندەگى باستامالارى, «نۇرلى جول – بولاشاققا باستار جول» جولداۋىنداعى قولجەتىمدى تۇرعىن ءۇي قۇرىلىسىنىڭ مەحانيزمدەرىن وزگەرتۋ يدەياسى بويىنشا جۇزەگە اسىپ جاتقان پاتەر ماسەلەسى جىل ساناپ شەشىمىن تاۋىپ كەلەدى. ەندەشە, استانادان باستاۋ العان جاپپاي كىلت تاپسىرۋ راسىمىندە الماتى قالاسى بويىنشا جالپى العاندا 803 ءۇي بەرىلگەندىگى سونىڭ دالەلى. «بايتەرەك» حولدينگى مەن «قازاقستاننىڭ يپوتەكالىق كومپانياسىنىڭ» بىرلەسىپ, الەۋمەتتىك جالعا بەرىلەتىن تۇرعىن ءۇي باعدارلاماسى بارىسىندا اتقارىپ جاتقان يگى ءىس-شارالارى كوپشىلىك كوڭىلىنەن شىققانداي. الماتى قالاسى بويىنشا تۇركىسىب اۋدانىنداعى تۇرعىن ءۇي كەشەنىندە 95 پاتەر, سونداي-اق, قاراساي اۋدانىنداعى «اسىل ارمان» تۇرعىن ءۇي كەشەنىندە 708 پاتەردىڭ كىلتى يەلەرىنە تابىس ەتىلدى. ەلميرا ماتىباەۆا, «ەگەمەن قازاقستان». الماتى.جان جادىراتقان «جانسايا»
شاپاعاتى مول ناۋرىز مەرەكەسى قارساڭىندا اقمولا وبلىسىنىڭ اكىمى س.كۋلاگين مەن «قازاقستاننىڭ يپوتەكالىق كومپانياسى» اق باسقارۋشى ديرەكتورى ا.اقچۋريننىڭ قاتىسۋىمەن الەۋمەتتىك تۇرعىن ءۇيدى جالعا بەرۋ باعدارلاماسى اياسىندا سالىنعان «جانسايا» تۇرعىن ءۇي كەشەنىندە جاڭا پاتەرلەردىڭ كىلتتەرىن تاپسىرۋ سالتاناتى وتكىزىلدى. «بايتەرەك» ۇلتتىق باسقارۋشى حولدينگى» اق دەپارتامەنت باسشىسى قانات ىبىراەۆ قۋانىش يەلەرىن قۇتتىقتاۋ سوزىندە پرەزيدەنت نۇرسۇلتان نازارباەۆتىڭ قازاقستان حالقىنا ارناعان «نۇرلى جول – بولاشاققا باستار جول» جولداۋىندا الەۋمەتتىك تۇرعىن ۇيلەردى جالعا بەرۋ قۇرىلىسىنا كوزقاراستى وزگەرتۋ, ونىڭ قولجەتىمدىلىگى مەن اشىقتىعىن قامتاماسىز ەتۋ, تۇرعىندارعا ساتىپ الۋ قۇقىعىن بەرە وتىرىپ, ۇزاق مەرزىمدى تومەنگى پايىزدىق جۇيەنى ەنگىزۋدى تاپسىرعانىن اتاپ كورسەتتى. وڭىرلەردى دامىتۋدىڭ 2020 جىلعا دەيىنگى باعدارلاماسىنىڭ شاراپاتى رەتىندە بۇگىن اسەم تۇرعىن ءۇي كەشەنىندە 19,5 مىڭ شارشى مەترلىك 337 پاتەردىڭ كىلتى تاپسىرىلادى. كوكشەتاۋ تاريحىندا ءبىر مەزەتتە 337 وتباسىنىڭ قونىس قۋانىشى بولىپ كورمەگەن. ءبىز №264 پاتەردىڭ كىلتىن يەلەنگەن كاكىمبەكوۆتەردىڭ وتاۋىنا قۇتتى بولسىن ايتتىق. الىبەك پەن جانسايا ەكى بالا ءوسىرىپ وتىرعان جاس وتباسى. «ءبىز وسى كۇنگە دەيىن 8 جىل بويى پاتەر جالداپ تۇردىق, دەيدى جانسايا. ءوزىم مەديتسينا قىزمەتكەرىمىن. كۇيەۋىم مەملەكەتتىك كىرىس دەپارتامەنتىندە جۇمىس ىستەيدى. مەملەكەتىمىزدىڭ قوعام مۇشەلەرىنە جاساپ جاتقان قامقورلىعىنا ريزامىز. بالالارىمنىڭ دا قۋانىشىندا شەك جوق». باقبەرگەن امالبەك, «ەگەمەن قازاقستان». اقمولا وبلىسى.باقىت قۇشاعىندا
سارا تاسىلبەكوۆا جالعىز ءوزى ءۇش بالا ءوسىرىپ وتىر. باسپانانىڭ قيىندىعىن تارتۋداي تارتتى. پاتەردەن پاتەرگە كوشىپ, جاتاقحانانىڭ ءبىر بولمەسىنە تىعىلعان ول 2003 جىلى پاتەر كەزەگىنە تۇرعان بولاتىن. مىنە, ەندى وتباسىنىڭ قۋانىشىندا شەك جوق. جارىق تا كەڭ ەكى بولمەلى پاتەردىڭ كىلتىن وبلىس اكىمى نۇرالى سادۋاقاسوۆتىڭ قولىنان الىپ تۇرىپ, ارمانى ورىندالعانداي بولدى. راسىندا, «ارمان» تۇرعىن ءۇي كەشەنىنەن پاتەر كىلتىن العان وتباسىلاردىڭ بارلىعىنىڭ دا ارمانداپ جەتكەن باسپاناسى ەدى. ەلباسىنىڭ «نۇرلى جول – بولاشاققا باستار جول» جولداۋىندا ايتقان تاپسىرماسىنا سايكەس, الەۋمەتتىك جالعا بەرىلەتىن تۇرعىن ءۇي باعدارلاماسى بويىنشا قوستاناي قالاسىنداعى جاڭا تۇرعىن اۋداننان ون ءبىر وتباسىنا پاتەر كىلتى تاپسىرىلدى. وبلىس اكىمى كىلتتى تاپسىرىپ تۇرىپ, قونىس توي يەلەرىن قۇتتىقتادى. – ناۋرىز مەيرامى – ۇلىستىڭ ۇلى كۇنى قارساڭىندا قوستانايلىقتار پاتەرگە كىرىپ, ۇلكەن قۋانىشقا يە بولىپ وتىر.تۇرعىن ءۇي قۇرىلىسى جىل سايىن قارىشتاپ دامىپ كەلەدى. قوستانايدا 250 مىڭ شارشى مەتر ءۇي سالىندى, سونىڭ 45 مىڭ شارشى مەترى مەملەكەتتىك تۇرعىن ءۇي باعدارلاماسى بويىنشا جۇزەگە استى. «بايتەرەك» حولدينگى مەن «قازاقستان يپوتەكالىق كومپانياسى» اكتسيونەرلىك قوعامىنا قوستانايلىقتاردىڭ العىسى شەكسىز. ۋاقىتتىڭ كۇردەلىلىگىنە قاراماي, وبلىستا تۇرعىن ءۇي قۇرىلىسى ەكپىن الا بەرەتىن بولادى. «ارمان» تۇرعىن ءۇي كەشەنىندە 11 وتباسىنا 749 شارشى مەتر ءبولىندى. ءبىر شارشى مەتردىڭ قۇنى 862 تەڭگەنى قۇرايدى. ەكى بولمەلى پاتەردىڭ ورتاشا كولەمى 65 شارشى مەتر بولادى. – قازاقستانداعى ءار وتباسىنا وسىنداي قۋانىش تىلەيمىز. ءبىزدىڭ ارمانىمىز ورىندالادى, – دەيدى ساۋجانوۆتار وتباسى. «ارمان» جاڭا تۇرعىن اۋدانىندا ناۋرىز مەيرامىنىڭ سالتاناتى قونىس تويىمەن مولىعا ءتۇستى. ءنازيرا جارىمبەتوۆا, «ەگەمەن قازاقستان». قوستاناي.قونىس تويىن تويلادى
كەشە سەمەي قالاسىندا ەلباسى نۇرسۇلتان نازارباەۆتىڭ «نۇرلى جول –بولاشاققا باستار جول» جولداۋىنداعى تاپسىرماسىنا وراي كوپپاتەرلى جاڭا تۇرعىن ءۇيدىڭ كىلتىن تابىستاۋ ءراسىمى ءوتتى. قالاداعى بيۋدجەتتىك مەكەمە قىزمەتكەرلەرى, اتا-انا قورعاۋىنسىز قالعان جەتىم بالالار, مۇگەدەك بالالارى بار وتباسىلار, اسكەري وتباسىلار جاڭا پاتەرلەرگە يە بولدى. سەمەيدەگى شۋگاەۆ كوشەسى, 159 مەكەنجايىندا بوي كوتەرگەن ءزاۋلىم ۇيدە 120 پاتەر بار, بارلىعى 5,2 مىڭ شارشى مەتر. ءبىر شارشى مەتر 756 تەڭگە, ءار پاتەردىڭ اۋدانى 45 شارشى مەتر. ناۋرىز مەرەكەسىندە تۇرعىنداردى قونىستاندىرۋعا ارنالعان مەرەكەلىك شارادا مەردىگەر مەكەمە «گوردورستروي» جشس, «سەممەليوراتسيا» زاڭدى تۇلعالار بىرلەستىگىنىڭ قۇرىلتايشىسى باۋىرجان قايرامباەۆ ءسوز سويلەپ, جينالعان قاۋىمعا جاڭا سالىنعان ءۇيدىڭ ساپاسى جوعارى ەكەندىگىن ايتتى. قالا تۇرعىندارىنا كىلتتەردى اكىم ايبەك كارىموۆ پەن «قازاقستان يپوتەكالىق كومپانياسى» اق باسقارۋشى ديرەكتورى ەركىن سىزدىقوۆ تابىستادى. – بۇل ءبىز ءۇشىن اسا ماڭىزدى. سەمەيلىكتەر ءۇشىن وسىنداي بارلىق جاعدايى جاسالعان جايلى ۇيگە ۇلىستىڭ ۇلى كۇنى ناۋرىزدا يە بولۋ جاقسىلىقتىڭ بەلگىسى, – دەدى قونىس تويىن تويلاۋشىلاردىڭ اتىنان ءسوز سويلەگەن «اۋدانارالىق ونكولوگيالىق ديسپانسەر» مەكەمەسىنىڭ قىزمەتكەرى ءشاربات سارسەمبينا. راۋشان نۇعمانبەكوۆا, جۋرناليست. سەمەي.
