سۋرەتتى تۇسىرگەن – قاسيەت مۇحتاروۆ
بۇقار جىراۋ اتىنداعى ادەبيەت جانە ونەر مۋزەيىنىڭ ۇيىمداستىرۋىمەن تۇلعانىڭ 100 جىلدىعىنا وراي ءبىلىم ۇياسىنىڭ عيماراتىنا مەموريالدىق تاقتا ءىلىندى.
ءىس-شاراعا كينورەجيسسەردىڭ قىزى, تاريح عىلىمدارىنىڭ دوكتورى, پروفەسسور, شىعىستانۋشى عالىم مەرۋەرت ابۋسەيىتوۆا, وبلىس اكىمىنىڭ ورىنباسارى ايگۇل مالىكوۆا قاتىستى.
– اكەم جان-جاقتى, سەگىز قىرلى ادام بولدى. انشىلىگى ءبىر باسىنا, ءوزى باستاپ 1000-عا جۋىق ءفيلمدى قازاق تىلىنە اۋدارعان. تۋعان جەرىن جانىنداي ءسۇيدى, باياناۋىل باۋرايىندا قازاقتىڭ ءىرى تۇلعالارى تۋرالى دەرەكتى فيلمدەر ءتۇسىردى. جىل سايىن باياناۋىلعا ءبارىمىزدى الىپ كەلىپ, ەڭ اۋەلى عۇلاما ءماشھۇر ءجۇسىپتىڭ زيراتىنا ءتاۋ ەتەتىنبىز. ماشەكەڭ اۋليە ادام بولعان عوي, اكەمىز بەن ءىنىسى سۋاتتىڭ ەسىمىن سول كىسى قويعان ەكەن. نەگىزى اكەمىزدىڭ اكەسى – اۋەزبەك, ول كىسى ۇنەمى جۇمىسباستى بولىپ اعاسى اشىربەك باۋىرىنا باسقان. ءسويتىپ ءبىز اشىربەك اتانىڭ نەمەرەلەرى بولىپ كەتتىك, – دەپ اڭگىمەلەدى مەرۋەرت قۋاتقىزى.
قۋات ابۋسەيىتوۆ جارى مايرا بەكجۇمانقىزى ەكەۋى ءۇش بالا تاربيەلەپ وسىرگەن. كەنجەسى قايرات ابۋسەيىتوۆ ديپلومات, كوپ جىل شەت مەملەكەتتەردە ەلشى بولىپ جۇمىس ىستەدى. قازىر دە اتالعان سالادا ەڭبەك ەتىپ ءجۇر.
ايتىپ وتەيىك, قۋات اشىربەك ۇلى – قازاق كسر ەڭبەك سىڭىرگەن مادەنيەت قايراتكەرى (1975). الماتى كينواكتەرلەر مەكتەبىن (1947), بۇكىلوداقتىق مەملەكەتتىك كينو ينستيتۋتىن (1958, گ. روشال مەن س. يۋتكەۆيچتىڭ شەبەرحاناسىندا) تامامداعان.
مەكتەپتە وقىپ ءجۇرىپ, جەرگىلىكتى قازاق تەاترىنىڭ ساحناسىنا شىعىپ, نەگىزگى ترۋپپاعا قابىلدانعان. ودان سوڭ كينواكتەرلەر مەكتەبىندە وقي ءجۇرىپ, الماتى كوركەم جانە حرونيكالىق-دەرەكتى فيلمدەر ستۋدياسىنىڭ كينواۋدارما بولىمىندە جۇمىس ىستەدى. 1990 جىلى «ايتۋار» اتتى دەرەكتى فيلمدەر تۇسىرەتىن ستۋديا اشتى. «سىر ساندىق» اتتى ەستەلىكتەر كىتابى جارىق كورگەن.
پاۆلودار وبلىسى
