مەملەكەت باسشىسى قاسىم-جومارت توقاەۆتىڭ تاپسىرماسىنا سايكەس «كەلەشەك مەكتەپتەرى» ۇلتتىق جوباسىن جۇزەگە اسىرۋدا سەمەي قالاسىنىڭ ۆودنىي كەنتىندە №52 جالپى ورتا ءبىلىم بەرەتىن جاڭا مەكتەپ 2025–2026 وقۋ جىلى اياسىندا اشىلادى. بۇل جوبا بويىنشا اباي وبلىسىنداعى ءۇشىنشى, ال سەمەي قالاسىنداعى ەكىنشى مەكتەپ.
اتالعان اشىق ەسىك كۇنىنە 100-گە جۋىق اتا-انا, 60-تان استام وقۋشى جانە مەكتەپ مۇعالىمدەرى قاتىستى. اتا-انالار مەكتەپتىڭ سپورت جانە ءماجىلىس زالى, اسحانا, حورەوگرافيا زالى, باستاۋىش پەن ارنايى ءپان كابينەتتەرىن ارالاپ كوردى. جيىننىڭ اشىلۋ سالتاناتىندا №52 جالپى ورتا ءبىلىم بەرەتىن مەكتەپ ديرەكتورىنىڭ مىندەتىن اتقارۋشى تىلەك ساپىشەۆ مەكتەپتىڭ ەرەكشەلىگى تۋرالى ايتتى.
– ۆودنىي كەنتىندە «كەلەشەك مەكتەپتەرى» باستاماسىمەن ارنايى اشىق ەسىك كۇنى ۇيىمداستىرىلدى. بۇل ءبىلىم ورداسى «كەلەشەك مەكتەپتەرى» ۇلتتىق جوباسى اياسىندا 600 وقۋشىعا ارنالىپ سالىنعان. ەندى ءبىزدىڭ بالالارىمىز جايلى دا كەڭ عيماراتتا عانا ەمەس, ەڭ وزىق تەحنولوگيالارمەن جابدىقتالعان, زامان تالابىنا ساي ورتادا ءبىلىم الاتىن بولادى. مەكتەبىمىزدىڭ ەرەكشەلىگى مول. ماسەلەن, باستاۋىش جانە ورتا بۋىن سىنىپتارىنىڭ جەكە بلوكتەردە ورنالاسادى. بۇل باستاۋىش سىنىپ وقۋشىلارىنىڭ قاۋىپسىزدىگىن ارتتىرىپ, ولارعا ءوز جاسىنا ساي تىنىش ءارى ىڭعايلى ورتادا ءبىلىم الۋعا مۇمكىندىك بەرەدى. ورتا بۋىن وقۋشىلارى دا ءوز كەزەگىندە ەركىن ءارى ءتيىمدى وقۋ ۇدەرىسىنە بەيىمدەلە الادى, – دەدى ول.
تىلەك وتان ۇلىنىڭ ايتۋىنشا, مەكتەپ 600 وقۋشىعا ارنالعان. مەكتەپ اۋماعىندا جانە عيمارات ىشىندە كوزى ناشار كورەتىن وقۋشىلاردىڭ قوزعالىسىنا ىڭعايلى بولۋ ءۇشىن تاكتيلدى جولدار, بارلىق قاباتقا ىڭعايلى شىعۋعا جەدەلساتى ورناتىلعان. نەگىزگى پاندەر بويىنشا 24 كابينەت, 2 ينفورماتيكا كابينەتى, روبوتتەحنيكا كابينەتى, باعدارلامالىق جاساقتاماسى بار 30 ينتەراكتيۆتى پانەل, 3 پاندىك كابينەتتەر (1 حيميا, 1 فيزيكا, 1 بيولوگيا), توكارلىق جانە مەتالل وڭدەۋ تسەحى, اسپازدىق بولمە, تىگىن بولمەسى, 166 ورىندىق ءماجىلىس زالى, 177 ورىندىق اسحانا, وقۋ زالى, جابىق كىتاپحانا قورى بار. سونداي-اق STEM-زەرتحانالار, حورەوگرافيا زالى, كوۆوركينگ الاڭدارى, كولەمى 36ح18 م بولاتىن ۇلكەن سپورت زالى, باستاۋىش سىنىپتار ءۇشىن كولەمى 9ح18 م شاعىن سپورت, ويىن زالى جانە مەكتەپ الاڭىندا فۋتبول, ۆولەيبول, باسكەتبول, جۇگىرۋگە ارنالعان 0,6 گا سپورت الاڭى بار. زاماناۋي پاندىك كابينەتتەر, العاشقى اسكەري دايىندىق ءۇشىن ارنايى اشىق الاڭدار قاراستىرىلعان. مەكتەپ زاماناۋي جيھازدارمەن جانە وقۋ قۇرال-جابدىقتارىمەن جابدىقتالىپ, ءاربىر وقۋ كابينەتى ءۇشىن قاجەتتى تەحنيكالىق قۇرالدار جيىنتىعى قامتاماسىز ەتىلگەن. مەكتەپتە ورتكە قارسى قاۋىپسىزدىك جۇيەسى جۇمىس ىستەيدى.
اشىق ەسىك كۇنىنە جينالعان اتا-انالار مەن وقۋشىلار جاڭا مەكتەپتەگى جايلىلىقتى كورگەن ولاردىڭ قۋانىشىندا شەك جوق.
مەكتەپ بيىلعى 1 قىركۇيەك – ءبىلىم كۇنى سالتاناتتى تۇردە اشىلىپ, العاشقى قوڭىراۋىن سوقپاق.
سەمەي
