جاڭا ۇلگىدەگى ءۇش قاباتتى №52 مەكتەپ 2025–2026 وقۋ جىلىندا اشىلادى. بۇل – جوبا بويىنشا اباي وبلىسىنداعى ءۇشىنشى, سەمەي قالاسىنداعى ەكىنشى مەكتەپ. بۇعان دەيىن قاراعايلى شاعىناۋدانىندا 1200 ورىندىق, ال بەسقاراعاي اۋدانىندا 300 ورىندىق مەكتەپ پايدالانۋعا بەرىلگەن.
اشىق ەسىك كۇنىنە 100-دەن استام اتا-انا, 60-قا جۋىق وقۋشى, مۇعالىمدەر, بۇقارالىق اقپارات قۇرالدارى وكىلدەرى, بلوگەرلەر, سونداي-اق وبلىستىق جانە قالالىق ءبىلىم بولىمدەرىنىڭ ماماندارى قاتىستى. قوناقتار سپورت جانە اكت زالى, اسحانا, حورەوگرافيا زالى, باستاۋىش جانە ارنايى ءپان كابينەتتەرى, STEM-زەرتحانالار, روبوتوتەحنيكا كابينەتى, كوۆوركينگ ايماقتارى, كىتاپحانا جانە وقۋ زالىن ارالادى. مەكتەپ اۋلاسىندا فۋتبول, ۆولەيبول, باسكەتبول الاڭدارى مەن جۇگىرۋ جولاقتارى سالىنعان.
– باستاۋىش جانە ورتا بۋىن سىنىپتارى بولەك بلوكتاردا ورنالاسىپ, باستاۋىش وقۋشىلارىنا قاۋىپسىز ءارى جايلى ورتا قامتاماسىز ەتىلگەن. ءار كابينەت ينتەراكتيۆتى تاقتا مەن جاڭا كومپيۋتەرلەرمەن جابدىقتالعان. روبوتوتەحنيكا, 3D مودەلدەۋ جانە مۋلتيمەديالىق ۇيىرمەلەر بالالاردىڭ تسيفرلىق ساۋاتتىلىعىن ارتتىرۋعا مۇمكىندىك بەرەدى, – دەدى №52 جالپى ورتا ءبىلىم بەرەتىن مەكتەپ ديرەكتورىنىڭ مىندەتىن اتقارۋشى تىلەك ساپىشەۆ.
مەكتەپتە 28 زاماناۋي وقۋ كابينەتى, فيزيكا, حيميا, بيولوگيا زەرتحانالارى, ينفورماتيكا جانە روبوتوتەحنيكا كابينەتتەرى, گرافيكا جانە مودەلدەۋ بولمەسى, اعاش جانە مەتالل وڭدەۋ تسەحتارى, اسپازدىق جانە تىگىن شەبەرحانالارى ورنالاسادى. وقۋ پروتسەسىنە 30 ينتەراكتيۆتى پانەل, نوۋتبۋكتەر, ستاتسيونارلىق كومپيۋتەرلەر مەن پرينتەرلەر قويىلادى.
ينكليۋزيۆتى ءبىلىم بەرۋ تالاپتارىنا ساي عيمارات ليفت, پاندۋستار, تاكتيلدى جولاقتار جانە ارنايى سانيتارلىق توراپتارمەن جابدىقتالعان. قاۋىپسىزدىك ماقساتىندا بەينەباقىلاۋ جۇيەسى, تۋرنيكەتتەر, ءورت دابىلى, 19 اپاتتىق شىعۋ ەسىگى جانە 7 باسپالداق قاراستىرىلعان.
اتا-انالار مەن وقۋشىلار جاڭا مەكتەپتىڭ كەڭ ءارى جارىق كابينەتتەرىن جوعارى باعالاپ, مۇنداي اشىق ەسىك كۇنىنىڭ وبلىس اۋماعىندا العاش رەت وتكىزىلىپ وتىرعانىن اتاپ ءوتتى.
– ەكى نەمەرەمدى وسى «كەلەشەك مەكتەبىندە» وقىتپاقپىن. قۇرىلىسى ءساندى, زامان تالابىنا ساي سالىنعان. كابينەتتەردى ارالاپ كوردىك, ءبارى جارىق ءارى كەڭ. 1–4 سىنىپ وقۋشىلارى اسحانادا تەگىن تاماقتانادى. اكت زالى دا وتە جاقسى. باستاۋىش سىنىپتار شىعىس بلوگىندا, ورتا سىنىپتار ەكىنشى قاباتتا, جوعارى سىنىپتار جوعارعى قاباتتا وقيدى. كابينەت قابىرعالارىنداعى فورمۋلالار مەن ناقىل سوزدەر وقۋشىلارعا شابىت بەرەدى, – دەدى مەكتەپ وقۋشىسىنىڭ اتا-اناسى ءۇزىم رامازانقىزى.
جالپى, «كەلەشەك مەكتەپتەرى» جوباسى اياسىندا وڭىردە بەس جاڭا ءبىلىم بەرۋ نىسانى سالىنادى. اياگوز اۋدانىنداعى 600 ورىندىق مەكتەپ بيىل كۇزدە اشىلسا, سەمەيدىڭ شىعىس كەنتىندە 300 ورىندىق مەكتەپتىڭ قۇرىلىسى بيىل باستالادى.
