– اقنازار, الدىمەن ءوزىڭدى وراسان تاۋەكەلگە بەل بۋىپ, جانكەشتىلىكپەن جەتكەن تابىسىڭمەن قۇتتىقتايمىن. بالقاشتى ءجۇزىپ ءوتۋ يدەياسى قالاي تۋدى؟ بۇرىن-سوڭدى مۇنداي قاشىقتىققا ءجۇزىپ كوردىڭ بە؟
– قۇتتىقتاۋىڭىزعا راحمەت, بىرنەشە كۇننەن بەرى قولداۋشىلارىم, جاناشىر جاقىندارىم جىلى ءسوزىن ارناپ, ىقىلاسىن ءبىلدىرىپ جاتىر. كوڭىلىڭ ءوسىپ, كادىمگىدەي مارقايىپ قالادى ەكەنسىڭ.
ەندى يدەيا قايدان تۋدى دەگەنگە كەلسەك. ءوزىم كوپتەن بەرى ويلاپ ءجۇر ەدىم. ودان بۇرىن الەمدەگى پاراجۇزگىشتەردىڭ شالقار تەڭىز, ايدىن كولدىڭ بەتىندە جۇزگەن ناتيجەلەرىن سارالادىم. بىراق بىردە-ءبىر پاراجۇزگىش مۇنداي قاشىقتىققا تاۋەكەل ەتپەپتى. بىلتىر بۋراباي كولىندە 2,5 شاقىرىمعا ءجۇزىپ اشىق سۋدا ءوزىمنىڭ الەۋەتىمدى سىناپ كوردىم. ءبىر جىل دايىندىق جۇرگىزىپ, بالقاشتى ءجۇزىپ وتۋگە بەل بۋدىم.
– 20 شاقىرىمدى ءجۇزىپ ءوتۋ جەڭىل تيمەيتىنى انىق, جۇرەكسىندىڭ بە؟
– مەنى الاڭداتقان ءجۇزىپ ءوتۋ ەمەس, وسى اۋقىمدى شارانى ۇيىمداستىرۋ ءىسى بولدى. ەڭ الدىمەن, ءجۇزىپ وتەتىن باعىتتى مەجەلەپ, شاقىرىمىن ولشەپ الدىق. ودان كەيىن نەشە ساعاتتا ءجۇزىپ وتەتىنىمدى باعامدادىم. سوعان قاراي بەينەجازباعا تاسپالايتىن وپەراتوردى تابۋ قيىنعا سوقتى. حابارلاندىرۋ ارقىلى قوڭىراۋ شالىپ بىرنەشە مامانمەن تىلدەستىم. كوپشىلىگى بۇرىن-سوڭدى مۇنداي تاۋەكەلشىل ادامدى تاسپالاپ كورمەگەندىكتەن تاڭدانىپ جاتتى. كەيبىرى اقىل-ەسى كەم ادامعا بالادى. اقىرى الماتىدان جاقىن تانىسىمىز ارقىلى تاسپالاۋشى جىگىتتەر تاپتىم. ايتپاقشى, بۇلاردان بۇرىن تاعى ءبىر توپپەن كەلىسكەنبىز. مەجەلى كۇنگە ءبىر كۇن قالعاندا سوزدەن تايقىپ, اينىپ كەتتى. سودان كەيىن وسى جىگىتتەرمەن كەلىسىم جاساستىق. مەن كولدى قالاي ءجۇزىپ وتەمىن دەپ ۋايىمدامادىم, ۇيىمداستىرۋ ءىسى ۇيقىمدى قاشىردى. ءتۇسىرۋشى توپتى الىپ جۇرەتىن كاتەردى جالعا الۋدىڭ ماشاقاتى وڭاي بولمادى. وسىنداي ءىرىلى-ۇساقتى شارۋالار تيتىقتاتىپ جىبەردى دە, جاتتىعۋعا باسا كوڭىل بولە المادىم. بىراق تاۋەكەلمەن باستاعان ءىستى اقىرىنا جەتكىزۋ ءۇشىن بارىمدى
سالدىم.
– 13 ساعات سۋدان شىقپاي ءجۇزدىڭ. تولقىن كەدەرگى كەلتىرمەدى مە؟
– ءبىز سورەدەن تاڭ الاگەۋىمدە اتتاندىق. تۇسكە دەيىن كولدىڭ بەتى تىنىق بولدى دا, اسا قيىندىق تۋدىرمادى. تەك ساسكەگە تامان جەل تۇرىپ, تولقىن قاقپاقىلداپ باعىتىمنان بۇرىپ جىبەرىپ وتىردى. دۇركىن-دۇركىن قيىس كەتىپ, قايتا باعىتىما بۇرىلامىن دەپ ابدەن سىلەلەپ قالدىم. بەسىن اۋا جەل باسىلىپ, تولقىن ساباسىنا ءتۇسىپ, كوڭىلىم ورنىقتى. وسىلايشا, ءوزىمىز الدىن الا بولجاعان مەرزىمدە بالقاش كولىن ءجۇزىپ ءوتتىم.
– نارتاۋەكەلگە بەل بۋعانىڭدى اتا-اناڭ بىردەن قولداي كەتپەگەن بولار؟
– ارينە, انام مەنىڭ كولدى ءجۇزىپ وتسەم دەگەن ماقساتىمدى بىلگەندە قارسى بولدى. انا ءۇشىن ءبىز ءاردايىم بالامىز عوي. اماندىعىمدى ويلاسا كەرەك. بىراق بالا كۇنىمنەن ماقساتىما جەتپەي تىنبايتىن قايسارلىعىمدى بىلەتىندىكتەن اقىرى قولدادى.
– 2018 جىلعا دەيىن تەمىرجول سالاسىندا ەڭبەك ەتتىڭ. ارينە, ەسكە ءتۇسىرۋ جەڭىل تيمەسى انىق. دەسە دە تاعدىرىڭنىڭ پاراسپورتپەن قابىسۋىن بايانداپ وتسەڭ.
– ءيا, سىناققا تۇسكەن, قيىن شاقتار ءوتتى عوي... سول جىلى جامبىل وبلىسىنىڭ اۋماعىنداعى «اسپارا – ءتاتتى» شويىن جول بولىگىنە جوندەۋ جۇرگىزىپ جاتقاندا ۇشەۋمىزدى پويىز قاعىپ كەتتى. داستان دەگەن دوسىم كوز الدىمدا ءجانتاسىلىم ەتتى. مەنىڭ ءبىر قولىم مەن ءبىر اياعىمدى ج ۇلىپ اكەتتى. ءۇشىنشى كىسى دە قولىنان جاراقات الدى. ءتۇن اۋعان تۇستا قانسىراپ جاتقانىمدى بىلەم, ەسىمدى جيسام اۋرۋحانا توسەگىنە تاڭىپ تاستاپتى. كوپ ۇزاماي وڭ قولىم مەن وڭ اياعىمدى كەستى. جارىق دۇنيە ەسىگىن ەكىنشى رەت اشقانداي كۇي كەشتىم. قيىندىق, كەدەرگى اۋىر سوققانىمەن بارلىعىن ەڭسەردىك. بەس رەت پىشاققا ءتۇسىپ وپەراتسيا جاسادى. كەيىن كەسىلگەن قول مەن اياقتىڭ جاراسى جازىلىپ, پروتەزگە ۇيرەنگەنشە دە كوپ ۋاقىت ءوتتى. وڭقاي بولعاندىقتان سول قولمەن جازۋعا, تاماق ىشۋگە, باسقا دا جۇمىستى ىستەۋگە ۇيرەنىسۋ دە اۋىر سوقتى.
وسىلايشا, ۇزاقمەرزىمدىك ەمدەلۋدەن كەيىن سپورتپەن شۇعىلدانۋعا بەل بۋدىم. قاراعاندىدان استاناعا كوشىپ كەلگەن سوڭ, وتىرىپ وينايتىن پاراۆولەيبول ۇيىرمەسىنە جازىلدىم. بىراق جالقى قولمەن ۇزاققا بارا المايدى ەكەنسىڭ. اقىرىندا بالا كۇننەن ۇيرەنگەن ءجۇزۋدى دامىتسام دەپ شەشتىم. قىسقا مەرزىمدە سپورتتىق ءنورماتيۆتى ورىنداپ, ەل ىشىندەگى مارتەبەلى سايىستارعا قاتىسۋعا مۇمكىندىك الدىم. كوپ وتپەي پاراجۇزۋشىلەر اراسىندا ەل بىرىنشىلىگىنە قاتىسىپ, چەمپيون اتاندىم.
– ەندىگى ماقسات قانداي؟
– ازىرگە وسى جەتىستىگىمدى گيننەستىڭ رەكوردتار كىتابىنا ەندىرۋدىڭ اۋرەسىمەن ءجۇرمىن. پاراجۇزگىشتەر اراسىندا مەنىڭ كەسىلگەن قولىم مەن اياعىمنىڭ كەمدىگى م6 ساناتىنا جاتادى. وسى ساناتتاعى پاراجۇزگىشتەردىڭ ەشبىرى اشىق سۋدا ءبىر قول, ءبىر اياقپەن 20 شاقىرىم ءجۇزىپ وتپەپتى. مۇنداي جانكەشتىلىكپەن ەڭسەرگەن ەڭبەگىم ەلەۋسىز قالماسا دەيمىن. كەلەشەكتە پاراليمپيادا, الەم چەمپيوناتى سىندى ءباسى جوعارى سايىستارعا قاتىسىپ, پاراجۇزۋدەن ەلىمنىڭ مارتەبەسىن اسقاقتاتسام دەيمىن.
اڭگىمەلەسكەن –
قۋانىش نۇردانبەك ۇلى,
«Egemen Qazaqstan»
