ورتالىق ەكى كۇن بويى «اباي الەمى» اتتى مازمۇندى مادەني ءىس-شارالار الاڭىنا اينالدى. كوپشىلىك نازارىنا شىعارماشىلىق قويىلىم مەن پوەزيالىق كەشتەر ۇسىنىلدى. اۋقىمدى جوبانىڭ ءبىرى – رۋبيك تەكشەلەرىنەن قۇرالعان الىپ پورترەت بولدى. بيىكتىگى 3 مەتر, ەنى 2 مەتر بىرەگەي تۋىندىنى سپيدكۋبەر جاستار نەبارى 5 ساعات ىشىندە جيناپ شىقتى.
ء«بىز تەك كورنەكى ينستاللياتسيا ەمەس, تەرەڭ ماعىناسى بار ارت-وبەكت جاساۋدى كوزدەدىك. رۋبيك تەكشەسى – لوگيكا مەن شىعارماشىلىقتى توعىستىراتىن ونەر. وسى ارقىلى كورەرمەنگە ۇلتتىق بولمىستى زاماناۋي تاسىلمەن جەتكىزگىمىز كەلدى», دەدى جوبانىڭ باستاماشىسى ءاليحان ەرتۇرسىن.
كوركەم تۋىندىنى ويىن-ساۋىق ورتالىعىنا كەلگەن مىڭداعان ادام تاماشالاپ, جاستاردىڭ كرەاتيۆتى ويلاۋ قابىلەتى مەن ونەرىنە وڭ باعاسىن بەردى. ينستاللياتسيا تەك شىعارماشىلىقتى ەمەس, ۇلتتىق مۇراعا دەگەن قۇرمەتتى دە ايقىن كورسەتتى. اباي جانە ونىڭ مىڭ سالالى شىعارماشىلىعى ۇرپاقپەن قايتا جاڭعىرىپ, جالعاسىن وسىلاي تاۋىپ جاتىر.
ۇيىمداستىرۋشىلاردىڭ ايتۋىنشا دا, بۇل – اباي مۇراسىن جاڭاشا قىرىنان تانىتۋعا جاسالعان تىڭ قادام. ماقسات – شىعارماشىلىقتى دامىتۋ, ۇلتتىق سانا مەن ەلدىك بولمىستى جاستاردىڭ تەرەڭىرەك ۇعىنۋىنا سەبەپكەر بولۋ. جاستاردىڭ بۇل ىزگى ويىنىڭ ورىندالعانىنا مىڭ-سان كورەرمەن كۋا.
