يسپانياداعى جارىستىڭ بەسىنشى, ياعني شەشۋشى كەزەڭى كينتانا-دەل-پيديو قالاسىنان باستالىپ, 138,3 شاقىرىمنان كەيىن ۆەلوشاباندوزداردىڭ لاگۋناس-دە-نەيلادا تاۋ شىڭىنا ورلەۋىمەن مارەسىنە جەتتى. سوڭعى اسۋداعى فورتۋناتونىڭ شابۋىلى وعان كەزەڭدە ۇزدىك ۇشتىككە ەنۋگە جانە جالپى كلاسسيفيكاتسيادا ەكىنشى ورىنعا شىعۋعا مۇمكىندىك بەردى.
سونداي-اق XDS Astana Team كومانداسىنىڭ تاعى ءبىر ۆەلوشاباندوزى كريستيان سكاروني "نورۆەگيانىڭ اركتيكالىق جارىسىنىڭ" ءۇشىنشى كەزەڭىندە جەڭىسكە جەتىپ, باس كلاسسيفيكاتسيادا دا ءۇشىنشى ورىنعا كوتەرىلدى. كومانداداعى تاعى ءبىر سپورتشى كلەمان شامپۋسسان كەزەڭدى ءتورتىنشى بولىپ اياقتادى.
- بۇگىن ءبارى وتە جاقسى ءوتتى. كوماندا كەرەمەت جۇمىس جاسادى. ەرتەڭ جاعدايىمىزدى جاقسارتا الامىز با, كورەمىز. جالپى, بابىمدامىن. قىركۇيەك پەن قازاندا جوعارى ناتيجەلەرگە قول جەتكىزەمىن دەپ ۇمىتتەنەمىن. ءبىز مۇنىمەن توقتاپ قالمايمىز, — دەدى كريستيان سكاروني سۇحباتىندا.
نورۆەگياداعى جارىستىڭ ءۇشىنشى كەزەڭى حۋسيوي (سەنيا) قالاسىنان باستالىپ, 182 شاقىرىمنان كەيىن مولسەلۆتە مارەسىنە جەتتى. كەزەڭدە ءبىرىنشى ورىندى Q36.5 Pro كومانداسىنىڭ بريتاندىق وكىلى توم پيدكوك جەڭىپ الدى. ەكىنشى ورىنعا Israel-Premier Tech قۇراماسىنداعى جاڭا زەلانديا سپورتشىسى كوربين سترونگ تۇراقتادى.
"استانانىڭ" باسقا سپورتشىلارى مىنانداي ناتيجەلەر كورسەتتى: انتون چارميگ – 20-ورىن, اارون گەيت – 83-ورىن, داۆيدە باللەريني – 84-ورىن, كەيس بول – 94-ورىن. جارىس بۇگىن جالعاسىن تابادى.
