باسقوسۋعا تۇركيا, نيدەرلاندى, رەسەي, قىرعىزستان, وزبەكستان سەكىلدى ەلدەردەن جانە قازاقستاننىڭ ءار وڭىرىنەن ابايتانۋشىلار, ادەبيەتتانۋشىلار, فيلوسوفتار مەن تاريحشىلار جينالدى.
كونفەرەنتسيانىڭ اشىلۋىندا وبلىس اكىمى بەرىك ءۋالي, قر عىلىم جانە جوعارى ءبىلىم ءمينيسترى ساياسات نۇربەك, مۇحتار اۋەزوۆتىڭ نەمەرەسى, تۇركىتانۋشى عالىم زيفا-الۋا مۇراتقىزى, ل.ن. گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ رەكتورى ەرلان سىدىقوۆ قۇتتىقتاۋ ءسوز سويلەدى.
بەرىك ءۋالي مەملەكەت باسشىسى قاسىم-جومارت توقاەۆتىڭ «اباي جانە ءححى عاسىرداعى قازاقستان» ماقالاسىندا ايتىلعان: «ابايدى قالاي دارىپتەسەك تە جاراسادى. ونىڭ عيبراتتى عۇمىرى مەن شىنايى شىعارماشىلىعى – قازاق حالقىنىڭ عانا ەمەس, جاھان جۇرتىنا دا ۇلگى-ونەگە» دەگەن ءسوزىن ەسكە الىپ, كونفەرەنتسيانىڭ ماقساتى – ۇلى ويشىلدىڭ رۋحاني مۇراسىن تەرەڭ زەرتتەۋ, ونى قازىرگى زامان تۇرعىسىنان پايىمداۋ جانە اباي ءىلىمىنىڭ ۇلتتىق سانا قالىپتاستىرۋداعى, ءبىلىم مەن تاربيەدەگى, تۇلعا دامىتۋدىڭ مادەني-فيلوسوفيالىق نەگىزىن ايقىنداۋ ەكەنىن اتاپ ءوتتى.
جيىندا تۇركياداعى پامۋككالە ۋنيۆەرسيتەتىنىڭ پروفەسسورى نەرگيز بيراز, نيدەرلاندىدان كەلگەن تۇركىتانۋشى روبەرت ەرمەرس, فيلولوگيا عىلىمدارىنىڭ دوكتورلارى تۇرسىن جۇرتباي مەن اراپ ەسپەنبەتوۆ جانە وزگە دە عالىمدار بايانداما جاسادى.
كونفەرەنتسيا اياسىندا 9 جاڭا كىتاپتىڭ تۇساۋكەسەرى ءوتتى. سولاردىڭ قاتارىندا بەلگىلى ادەبيەتتانۋشى, ادەبيەت جانە ونەر ينستيتۋتىنىڭ ديرەكتورى كەنجەحان ماتىجانوۆ قۇراستىرعان «اباي شىعارمالارىنىڭ ءۇش تومدىق اكادەميالىق جيناعى» بار. سونداي-اق, «اباي» باسپاسىنان مەرەيتويعا وراي جارىق كورگەن بىرقاتار تۋىندى العاش رەت وقىرمانعا ۇسىنىلدى. ولاردىڭ ىشىندە عالىم, مادەنيەتتانۋشى بازاربەك اتىعايدىڭ «ابايدىڭ اۋدارما مەكتەبى» مونوگرافياسى, «شەيىت» جيناعى, احات شاكارىم ۇلىنىڭ «جالىنعا مالعان جۇرەگىن» كىتابى, اسەت مەدەۋحان ۇلىنىڭ «حاليوللا» حيكاياتى, دانيال ىسقاقوۆتىڭ شىعارمالار جيناعى, سونداي-اق شاكارىم ۋنيۆەرسيتەتى ماماندارى ازىرلەگەن AR «قاراسوز» كىتابى بار.
بۇل تۋىندىلار كوپشىلىككە العاش رەت تانىستىرىلىپ وتىر.
