– اڭگىمەمىزدى كۇندەلىكتى جۇمىس جايىنان باستاساق.
– بريگادا ەكى اۋىسىممەن جۇمىس ىستەيدى. كۇندىزگى اۋىسىمداعىلاردىڭ كەشكە دەيىن ازىرلەگەن بلوگىن تۇنگى اۋىسىمعا شىعاتىن جۇمىسشىلار جالعاستىرادى. ەڭ الدىمەن بلوكتىڭ, ياعني كوپقاباتتى ءۇي پاتەرلەرى بولمەسىنىڭ قالىبىنا ارماتۋرا توقىلادى. ودان كەيىن بەتون قۇيىلىپ, كەپتىرىلەدى. ەسىك, تەرەزەسى سالىنىپ, جيناقتاۋشى توپ كەم-كەتىگىن بۇتىندەپ, ارلەيدى دە مونتاجداۋعا جىبەرىلەدى. قۇرىلىس باسىندا دايىن بولمەلەر بەلگىلى ءبىر تارتىپپەن قالانىپ, كوپقاباتتى ءۇي ءوسىپ شىعادى.
– ءسىزدىڭ جوعارى وقۋ ورنىن زاڭگەر ماماندىعى بويىنشا ءتامامداپ, باعىڭىزدى قۇرىلىس سالاسىندا سىناعانىڭىز تاڭداندىرىپ وتىر.
– اكەم بالا كۇنىنەن قۇرىلىسشى بولۋدى قالاپ, وسى سالانىڭ بىلىكتى مامانىنا اينالدى. سول كىسىنىڭ ەڭبەك جولىنا قاتتى قىزىقتىم. جالپى, اركىم ءوز سالاسىنىڭ مايتالمانى بولعاندا عانا قۇرمەتكە بولەنەدى, اتاق تا الادى, ورتاسىنا دا سىيلى بولادى. اكەم سونداي كىسى بولدى. سونىڭ ىقپالى شىعار, مەن دە زاڭگەرلىكتى ەمەس, قۇرىلىستى تاڭدادىم.
– بالالارىڭىز ءسىزدىڭ جولىڭىزدى جالعاپ, قۇرىلىسشى بولعىسى كەلە مە؟
– التى بالامىز بار, سولاردىڭ ىشىندە قىزدارىم عانا ازىرگە قۇرىلىس, ونىڭ ىشىندە ديزاين ماماندىعىن تاڭداپ, كەلەشەكتە وسى كاسىپتە ەڭبەك ەتۋگە تالپىنىپ ءجۇر. ۇلدارىم باسقا ماماندىقتى تاڭدايتىن سەكىلدى, قالاۋلارى ءبىلسىن. ءبىز ەشقاشان ماجبۇرلەپ, مىنا ماماندىقتى يگەر دەمەيمىز.
جالپى, استانا قالاسىنداعى بىرنەشە كوركەم ستيل, وزگەشە ديزاينداعى تۇرعىن ءۇي كەشەندەرىنىڭ سالىنۋىنا ءبىزدىڭ دە سەپتىگىمىز ءتيدى. بالالارىم سىنىبىندا اپايىنا, دوستارىنا: «مىناۋ مەنىڭ اكەمنىڭ سالعان ءۇيى, عيماراتى», دەپ ماقتانىشپەن ايتادى ەكەن. سونى ەستىگەندە توبەم كوككە جەتكەندەي بولدى.
– جاس مامانداردىڭ قۇرىلىس ورىسىنە قىزىعۋشىلىعى قانشالىقتى؟
– وتە قارقىندى نە بولماسا تىم باياۋ دەپ تە ايتۋعا كەلمەيدى. جالپى, جاستارعا قاراعاندا ورتا بۋىن وكىلدەرىنىڭ قۇرىلىستا جۇمىس ىستەۋگە دەگەن سۇرانىسى جوعارى. كەيىنگى تولقىندى قىزىقتىرا ءبىلۋ كەرەك شىعار. اقپاراتتىق ناسيحات جۇرگىزىلىپ, كوللەدجدەردە, جوعارى وقۋ ورىندارىندا قۇرىلىس سالاسىنىڭ ماماندىعىمەن ءبىلىم الۋشى جاستاردى زاۋىتتارعا, قۇرىلىس نىساندارىنا اپارىپ كورسەتىپ, تاجىريبەلى قۇرىلىسشىلارمەن كەزدەسۋ ۇيىمداستىرسا, جۇمىسشى ماماندىقتارعا قىزىعۋشىلىق ارتپاسا كەمىمەس ەدى. مەنىڭشە, جاستاردىڭ كوز الدىنا قۇرىلىس سالاسى دەسە, لاي باتپاق شىلاپ, قىش كوتەرەتىن اۋىر جۇمىس ەلەستەيدى. ءبىزدىڭ زاۋىتتا بارلىق ۇدەرىس زاماناۋي تەحنولوگيامەن قامتىلعان, كومپيۋتەرمەن باسقارىلادى. ەڭبەكاقى نارىق تالابىنا ساي ەسەپتەلىپ, اي سايىن كەشىكپەي بەرىلەدى, زاۋىتتان ۇيگە دەيىن تاسىمالدايتىن كولىك بار. ارنايى كيىم, قۇرال-جابدىقپەن قامتاماسىز ەتەدى. تەك بىلەك ءتۇرىنىپ, ەرىنبەي ەڭبەك ەتسەڭ جەتكىلىكتى. قۇرىلىس – ەلىمىزدىڭ ەڭ قارقىندى دامىپ كەلە جاتقان سالاسى. كەلەشەكتە جاستارىمىز الدىڭعى بۋىندى الماستىرىپ, وسى ءىستى ارى قاراي جالعاۋى كەرەك. سوندىقتان دا كەيىنگى تولقىندى قۇرىلىستا ەڭبەك ەتۋگە شاقىرامىن.
اڭگىمەلەسكەن –
قۋانىش نۇردانبەك ۇلى,
«Egemen Qazaqstan»
