قالا اكىمدىگى كەلتىرگەن رەسمي دەرەككە سۇيەنسەك, وبلىس ورتالىعىنا قونىستانعان حالىقتىڭ سانى قازىرگى كەزدە 480 مىڭنان اسقان. ىرگەدەگى ەكى اۋداننان 14 اۋىلدىڭ قالا قاتارىنا قوسىلۋىنىڭ ارقاسىندا تۇرعىندار سانى جارتى ميلليونعا جۋىقتاپ وتىر. جەرگىلىكتى حالىقتىڭ سانى ارتقان سايىن اتقارىلاتىن جۇمىستىڭ اۋقىمى كەڭي تۇسەتىنى ءمالىم. اسىرەسە كولىك لوگيستيكاسىنا قاتىستى قولعا الاتىن جۇمىس كوپ. مۇنى جەرگىلىكتى اتقارۋشى بيلىك وكىلدەرى نازاردا ۇستاپ وتىر.
جيىرما جىل بۇرىنعى تاراز بەن قازىرگى قالانى سالىستىرۋ استە مۇمكىن ەمەس. ول كەزدە حالىق سانى 300 مىڭنان اسسا, قازىر جارتى ميلليونعا جۋىقتادى. ناتيجەسىندە, وبلىس ورتالىعىندا جاڭا شاعىن اۋداندار بوي كوتەرىپ, اۆتوكولىك سانى دا ارتتى. حالىق سانىنىڭ ارتۋىنا بايلانىستى تۋىنداعان ماسەلەلەردى دەر كەزىندە شەشۋ ماقساتىندا قالا بيلىگى قولدان كەلگەنشە جۇمىس اتقارىپ جاتىر.
جەرگىلىكتى اتقارۋشى بيلىك وكىلدەرى كەيىنگى بىرنەشە جىلدىڭ بەدەرىندە قالا كوشەلەرىندەگى جولداردى رەتتەۋگە دەن قويدى. شاھار باسشىسى باقىتجان ورىنبەكوۆتىڭ مۇرىندىق بولۋىمەن قولعا الىنعان جۇيەلى جۇمىستىڭ ناتيجەسىندە «بۋرىل» تۇرعىن الابىنداعى ونداعان كوشەنىڭ جولى جاڭاردى. بۇل باعىتتاعى جۇمىس ءالى دە توقتاۋسىز جالعاسىپ جاتىر. بۇدان وزگە دە كوشەلەردىڭ جولىن قالپىنا كەلتىرۋگە قازىنادان قوماقتى قارجى قاراستىرىلعانىن ايتا كەتكەن ءجون.
وتكەن جىلى اباي داڭعىلىنىڭ بويىنداعى تەمىرجول ۇستىمەن وتەتىن كوپىردى سالۋعا قاتىستى ناقتى جۇمىس اتقارىلعان بولاتىن. ناتيجەسىندە, بيىل كوپىر قۇرىلىسىنىڭ جۇمىسى باستالدى.
تەمىرجولدىڭ ارعى جاعىن قونىس ەتكەن تۇرعىندار ەكى ورتانى جالعايتىن كوپىر كەرەك ەكەنىن بىرنەشە جىل بويى ماسەلە رەتىندە كوتەرىپ كەلەدى. ءبىر كەزدەرى بۇل جۇمىس ەشقاشان قولعا الىنبايتىنداي كورىنگەن ەدى. الايدا جەرگىلىكتى بيلىك حالىق كوكەيىندەگى تۇيتكىلدى تارقاتۋ باعىتىندا تىنىمسىز جۇمىس اتقاردى.
ناۋرىز ايىندا ءوڭىر باسشىسى ەربول قاراشوكەەۆ باستاپ, سەنات, ءماجىلىس دەپۋتاتتارىنىڭ قاتىسۋىمەن وبلىس ورتالىعى مەن تەمىرجولدىڭ ارعى بەتىن بايلانىستىراتىن كوپىردىڭ ىرگەتاسىن قالاۋ ءراسىمى ءوتتى. سودان بەرگى ارالىقتا مۇنداعى جۇمىس شيراي ءتۇستى.
قالا تىزگىنىن قولعا العان كەزدە ب.ورىنبەكوۆ تە وسى كوپىر قۇرىلىسىن جۇرگىزۋدىڭ ماڭىزدىلىعىن اتاپ ءوتىپ, ءىرى جوبانى دەر كەزىندە ىسكە اسىرۋعا بارىنشا كۇش سالاتىنىن ايتقان ەدى. بۇگىندە جوبا جۇزەگە اسا باستادى. ەندى مەردىگەرلەر ەكى جىلعا جۋىق ۋاقىت بويى تىنىمسىز ەڭبەك ەتەدى. ويتكەنى ءدال وسى تەمىرجول وتكەلى ارقىلى 2026 جىلدىڭ اياعىنا قاراي تاۋلىگىنە ون مىڭداعان كولىك قاتىنايتىن بولادى. سوندىقتان ءار كۇندى ءتيىمدى پايدالانىپ, قۇرىلىستى ۋاقتىلى اياقتاۋ كەرەك.
رەسمي دەرەككە جۇگىنسەك, تەمىرجول ۇستىنەن وتەتىن كوپىر وتكەلىنىڭ ۇزىندىعى 0,946 مەتردى قۇرايدى ەكەن. مەردىگەرلەر حالىقارالىق ساپا ستاندارتتارىن نازارعا الا وتىرىپ, وزىق ينجەنەرلىك تەحنولوگيالاردى قولدانۋ ارقىلى ىرگەلى جوبانى ساتىمەن جۇزەگە اسىرۋعا بەل بۋدى.
اۋقىمدى جوبانىڭ جالپى قۇنى – 16 ملرد تەڭگە. قازىردە مۇنداعى قۇرىلىس جۇمىسى قارقىندى جۇرگىزىلىپ جاتىر. جۇمىستى 15 ايدا اياقتاۋ جوسپارلانعان. جەرگىلىكتى اتقارۋشى بيلىك وكىلدەرىنىڭ ايتۋىنشا, جوبانى جۇزەگە اسىرۋ ارقىلى تارازدىڭ لوگيستيكاسىن ايتارلىقتاي ۇلعايتۋعا مۇمكىندىك تۋادى. تەمىرجول وتكەلىنىڭ الەۋەتى تاۋلىگىنە 80 مىڭ اۆتوكولىكتى قۇرايدى. ەرسىلى-قارسىلى ەكى باعىتقا قاتىنايتىن شاھار تۇرعىندارىنا بۇل ايتارلىقتاي جەڭىلدىك.
تۇتاس قالا جۇرتىنىڭ نازارىن اۋدارعان الىپ كوپىر جوباسىن جۇزەگە اسىرۋدىڭ وزىنە ءتان قيىندىقتارى دا از ەمەس. قالا بيلىگى اۋەلى جەرگىلىكتى تۇرعىندارعا ءتۇسىندىرۋ جۇمىسىن جۇرگىزدى. بۇل شارۋا دا ءبىراز ۋاقىت الدى. ماماندار قۇرىلىس جۇمىسىن ساپالى جۇرگىزۋگە كەدەرگى كەلتىرەتىن, بۇزىلۋعا ءتيىس 58 عيماراتتى انىقتادى. بۇگىنگى كۇنگە دەيىن ونىڭ وتىزى بۇزىلعان. جۇمىستىڭ نەگىزگى بولىگى تەمىرجولدىڭ ارعى بەتىندەگى اباي داڭعىلىنىڭ بويىندا جۇرگىزىلىپ جاتىر.
جالپى, قالا بيلىگى بۇل جۇمىستى باستاماس بۇرىن جەرگىلىكتى تۇرعىنداردىڭ تالاپ-تىلەگىن تىڭداپ, ولاردىڭ ۇسىنىستارىن نەگىزگە العان بولاتىن. كوپىر قۇرىلىسى «جەتى رەت ولشەپ, ءبىر رەت كەس» قاعيداتى نەگىزىندە جۇرگىزىلۋى ءۇشىن ءوڭىر باسشىسى ە.قاراشوكەەۆ تە, قالا اكىمى ب.ورىنبەكوۆ تە مۇنداعى جۇمىستى جەكە باقىلاۋىنا الىپ وتىر.
قازىرگى كەزدە مەردىگەر تاراپىنان اينالما جولدارعا, ياعني مالوبەساعاش, سىزدىقوۆ, جىبەك جولى كوشەلەرىنە اسفالت توسەلىپ, جىبەك جولى, مالوبەساعاش كوشەلەرىنىڭ قيىلىسىنا باعدارشام ورناتىلدى. سونىمەن قاتار اباي داڭعىلىنىڭ تەمىرجولدىڭ ارعى جاعىنداعى بولىگىندە اسفالت جابىندىسى الىنىپ, كوپىردىڭ تىرەك قابىرعالارىن ورناتۋ مەن ينجەنەرلىك جەلىلەردى اۋىستىرۋ جۇمىسى جۇرگىزىلىپ جاتىر.
رەسمي دەرەككە جۇگىنسەك, نىسان ەكى جەدەلساتىمەن جابدىقتالادى. سونداي-اق باعدارشام ورناتۋ, اۋماقتى اباتتاندىرۋ, جارىقتاندىرۋ جۇمىستارى دا تالاپقاي ساي جۇرگىزىلمەك.
تاراز
