سەمەي قالاسى اكىمدىگى, ءاليحان بوكەيحان ۋنيۆەرسيتەتى, جازۋشىلار وداعىنىڭ اباي وبلىستىق فيليالىنىڭ قولداۋىمەن جانە اباي اتىنداعى وبلىستىق امبەباپ كىتاپحانانىڭ ۇيىمداستىرۋىمەن وتكەن جىر دوداسىنا قازاقستان, قىرعىزستان, تۇركيا, موڭعوليا ەلدەرىنەن 80-گە جۋىق اقىن تۋىندىلارىن جولداعان.
مەملەكەتتىك سىيلىقتىڭ لاۋرەاتى, كورنەكتى اقىن تىنىشتىقبەك ابدىكاكىم ۇلى, مادەنيەت سالاسىنىڭ ۇزدىگى, كۇيشى-كومپوزيتور دۇيسەباي شاشتاي, اقىن, فيلولوگيا عىلىمدارىنىڭ كانديداتى ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتى فيلولوگيا فاكۋلتەتىنىڭ دەكانى سەرىكزات دۇيسەنعازين, اقىن, حالىقارالىق «الاش» ادەبي سىيلىعىنىڭ لاۋرەاتى ەربول الشىنباي, جازۋشىلار وداعى اباي وبلىستىق فيليالىنىڭ توراعاسى, اباي اتىنداعى وبلىستىق امبەباپ كىتاپحانانىڭ ديرەكتورى, اقىن مەرەي قارت سىندى قازىلار القاسى مۇشايراعا تورەلىك ەتتى. ولار 80 اقىننىڭ ىشىنەن 8-ءىن ىرىكتەپتى.
قارا ولەڭ مەن قاراسوزدىڭ وتانى بولعان اباي ەلىنە كەلگەن ۇمىتكەرلەر كورەرمەن الدىندا ءوز ولەڭدەرىن وقىدى. بۇدان سوڭ قازىلار القاسى ءمۇشايرا جەڭىمپازى مەن جۇلدەگەرلەرىن انىقتاپ, ولاردى ارنايى ديپلوم جانە قارجىلاي سىياقىمەن ماراپاتتادى. اتاپ ايتقاندا, باس جۇلدە جانە 1 ملن تەڭگە كولەمىندەگى قارجىلاي سىياقىنى بەلگىلى اقىن ۇمتىل زارىققان (استانا) يەلەندى. ءى ورىن (500 000 تەڭگە) نۇربەك كەڭەسبايعا بۇيىرسا (استانا), ءىى ورىندى (300 000) بەلگىلى اقىن, عالىم باۋىرجان جاقىپ (الماتى) قانجىعالادى. ال ءىىى ورىن (200 000) جاس اقىن داۋرەن تىلەۋحانعا (اقتوبە) بۇيىردى.
«كورەرمەن كوزايىمى» اتالىمىنا (300 000) باۋىرجان يگىلىك (سەمەي), «جاس اباي» اتالىمىنا (200 000) ەرلان امانقوجا (پاۆلودار) لايىق دەپ تانىلدى. ال «ەرەكشە قوناق» اتالىمىن (100 000) قۋانىش وسپان (كوكشەتاۋ) يەلەنسە, «جىلى جۇرەك» اتالىمى (100 000) ءاليا ىڭكاربەككە (الماتى) بۇيىردى.
اباي وبلىسى
