اۋلالاردى اباتتاندىرۋ اۋقىمى ايتارلىقتاي

ەلباسىنىڭ تىكەلەي تاپسىرماسىمەن سوڭعى جىلدارى استانا قالاسىندا تۇرعىن ۇيلەردىڭ اۋلالارىن اباتتاندىرۋ جۇمىسى بەلسەندى جۇرگىزىلىپ كەلەدى. وسى كەزەڭ ىشىندە ەلوردادا  800-گە جۋىق اۋلا كۇردەلى جوندەۋدەن وتكىزىلىپ, اباتتاندىرىلدى. ەلورداداعى وسىنداي كۇردەلى جوندەۋدەن وتكەن  اۋلالارداعى بالالار وينايتىن ءتۇرلى-ءتۇستى قوندىرعىلاردى, قۇم توسەلگەن الاڭداردى, اسفالتتالعان جاياۋ جۇرگىنشىلەر جولدارىن كورگەندە كوڭىلىڭ تولىپ, باس قالامىزدى كوگالداندىرۋ جانە كوركەيتۋ ماقساتىندا شىن مانىندە اۋقىمدى جۇمىستار اتقارىلىپ جاتقانىنا ءتانتى بولاسىڭ. بيىلعى جىلى دا وسى ءبىر يگى ءداستۇر لايىقتى جالعاسىن تابۋدا. قالا اكىمدىگى بەلگىلەگەن جوسپار بويىنشا, بيىل ەلوردادا 40 اۋلا اباتتاندىرىلادى.  جوسپار بويىنشا بۇل اۋلالاردا جاڭا ويىن جانە سپورت ترەناجەرلارى ورناتىلىپ, الاڭدارعا رەزەڭكە توسەنىشتەر توسەلەدى.  بالالار وينايتىن اۋلالار شارباقتارمەن قورشالادى. ءتۇرلى-ءتۇستى بوياۋمەن ارلەندىرىلگەن بالالاردىڭ ويىن الاڭدارىنداعى كورىنىس ەرىكسىز ەرتەگى قالاشىعىن ەلەستەتەدى. ۇستىمىزدەگى جىلى الماتى اۋدانى اۋماعىندا 27 اۋلا اباتتاندىرىلىپ, 36 ويىن جانە 11 سپورت الاڭى جاراقتاندىرىلادى. جاڭا ورىندىقتار, دەمالىس ورىندارى, قۇم شاشىلعان ويىن الاڭدارى ىسكە قوسىلادى. سونىمەن بىرگە, وسى اۋدان اۋماعىندا 378 اۆتوكولىككە ارنالعان كولىك قوياتىن جاڭا تۇراقتار جاسالادى. وتكەن جىلى الماتى اۋدانى بويىنشا 34 بالالاردىڭ ويىن الاڭى جانە 5 سپورت الاڭى جابدىقتالىپ, 20 اۋلا اباتتاندىرىلعان بولاتىن. بيىل, ەسىل اۋدانىندا سارايشىق, قابانباي باتىر, اقمەشىت, ساۋران جانە باسقا كوشەلەردەگى تۇرعىن ۇيلەردىڭ اۋلالارى اباتتاندىرىلادى. سارىارقا اۋدانى بويىنشا بوگەنباي باتىر كوشەسى №48-50, بەيبىتشىلىك كوشەسى №26-28, جەڭىس داڭعىلى №19-21 جانە باسقا كوشە­لەردەگى 6 اۋلادا كۇردەلى جوندەۋ جۇمىس­تارىن جۇرگىزۋ جوسپارلانۋدا. بۇل اۋلالاردا اسفالتتىق جابىندىلار جاڭار­تىلادى, سپورتتىق ترەناجەرلار ورنا­تى­لىپ, بالالار وينايتىن الاڭدار جاب­دىق­تالادى. اۋلالاردا اعاش ەگىلىپ كوگال­دان­دىرۋ شارالارى ءىس جۇزىنە اسىرى­لادى. ويىن الاڭدارىندا بالالاردىڭ جاراقات­تانۋىن ازايتۋ ماقساتىندا جۇم­ساق رەزەڭ­كە جابىندىلار توسەلىپ, قۇم توگىلەدى.