ۇزاق جىلدار بويى جەمىستى جۇمىس ىستەپ كەلە جاتقان كومپانيا ونداعان جىل بەدەرىندە وبلىس اۋماعىندا كوپتەگەن ءىرى الەۋمەتتىك نىسانداردىڭ جانە تۇرعىن ۇيلەردىڭ قۇرىلىسىن جۇرگىزدى. جەتەكشى ۇجىمنىڭ جەمىستى ەڭبەگىنىڭ ارقاسىندا ونداعان ءبىلىم ورداسى, بالاباقشا, اۋرۋحانا, گيدروتەحنيكالىق قۇرىلعىلار مەن جۇزدەگەن كوپپاتەرلى تۇرعىن ءۇي بوي كوتەرىپ, پايدالانۋعا بەرىلدى.
سەرىكتەستىك باسشىسى سەرىك ولجابەكوۆتىڭ ايتۋىنشا, كومپانيا قىزمەتكەرلەرى قۇرىلىستا ساپاعا باسا ءمان بەرەدى. سونىمەن قاتار, سالىناتىن نىسانعا قاجەتتى ماتەريالداردىڭ باسىم بولىگىن وزدەرىندە شىعارۋعا دەن قويعان.
ء«بىز ءۇشىن جوبالىق-سمەتالىق قۇجاتتى وزىمىزدە جاساۋدىڭ ماڭىزى زور. بۇدان بولەك, نىساندارعا كەرەك ماتەريالدىڭ 80 پايىزىن كاسىپورىندا شىعارۋ, ماتەريالدىق-تەحنيكالىق بازامىزدى نىعايتۋ, ءوز ءىسىنىڭ بىلگىرىنە اينالاتىن بىلىكتى مامانداردى دايارلاۋ جانە وندىرىسكە قاجەتتى وزىق تەحنولوگيالاردى ەنگىزۋ ناتيجەسىندە اۋىز تولتىرىپ ايتارلىقتاي ناتيجەگە قول جەتكىزىپ وتىرمىز», دەيدى سەرىكتەستىك باسشىسى س.ولجابەكوۆ.
قۇرىلىستا ساپاعا ءمان بەرگەننىڭ ۇتىلمايتىنى انىق. راسىندا كوپقاباتتى تۇرعىن ۇيلەردى قىزىل كىرپىشپەن, قۇم جانە گازوبلوكپەن سوعۋدىڭ وزىندىك ماشاقاتى كوپ. قول كۇشىن جانە ۇزاق ۋاقىتتى تالاپ ەتەدى. دامۋدىڭ داڭعىل جولىنا تۇسكەن ەلدەردە ءجۇز قاباتتان اساتىن نىساندار بوي كوتەرىپ جاتقانى ءمالىم. الگىندەي ءزاۋلىم عيماراتتارعا نەگىزىنەن مەتالل كاركاستار جانە ءىرى قابىرعالىق پانەلدەر قولدانىلادى. تۇرعىن ءۇي سالۋدا وزىق تەحنولوگياعا باسىمدىق بەرگەن بينومدىقتار دا وسى ءتاسىلدى تاڭداعان.
ىرگەلى كاسىپورىن ۇدەمەلى يندۋستريالىق-يننوۆاتسيالىق دامۋ باعدارلاماسى اياسىندا تەمىربەتون وندىرەتىن زاۋىتىندا ءىرى قابىرعالىق پانەل جاسايتىن ينۆەستيتسيالىق جوبانى جۇزەگە اسىرعان ەدى. بۇگىندە كاسىپورىن جىلىنا 60000 تەكشە مەتر تەمىربەتون بۇيىمدارىن وندىرۋگە قاۋقارلى. مۇنىڭ ءوزى ولارعا جىلىنا 60 پاتەرلىك 30 تۇرعىن ءۇيدى ەل يگىلىگىنە ۇسىنۋعا مۇمكىندىك بەرەدى.
ۋاقىت سۇرانىسىنا ساي وندىرىلەتىن ءىرى پانەلدەردىڭ باسقا ماتەريالدارعا قاراعاندا ارتىقشىلىعى كوپ ەكەنىن ماماندار دا ايتىپ ءجۇر. پانەل – جەڭىل, جازدا – ىستىق, قىستا سۋىق وتكىزبەيدى. ول – تەگىس ءارى جىلتىر بولعاندىقتان جۇقا سىلاق جۇرگىزىلەدى. شىلىڭگىر شىلدەنىڭ اپتاپ ىستىعى دا, ۇسكىرىك اياز دا جىل ون ەكى اي جۇمىس ىستەۋگە كەدەرگى كەلتىرە المايدى.
ءىرى پانەلدى نىسانداردا جۇمىستىڭ 80 پايىزى تەحنيكا كۇشىمەن اتقارىلادى. سەرىكتەستىكتە وعان قاجەتتى قۋاتتى مۇنارالىق كراندار مەن ولاردى قۇراستىراتىن ماماندار جەتكىلىكتى. بۇگىندە «بينومدا» جۇزدەن استام بىرلىك تەحنيكا بار, ونىڭ 70 پايىزدان استامى جاڭا ەكەن. جاڭا تەحنولوگيامەن سالىنعان عيماراتتار جەر سىلكىنىسىنە دە ءتوزىمدى.
سەرىكتەستىكتەگى تەحنيكا مەن قۇرال-جابدىقتاردىڭ 10 پايىزدان استامى جىل سايىن جاڭارتىلىپ تۇرادى. جۇمىسقا جاڭادان قابىلدانعان جاستاردى ءوز قارجىسى ەسەبىنەن بىلىكتىلىكتى جەتىلدىرۋ كۋرستارىندا وقىتادى. سونىڭ ناتيجەسىندە مامان تاپشىلىعىن سەزىنىپ وتىرعان جوق. قازىر مۇندا 500-دەن استام ادام جۇمىس ىستەيدى. ورتاشا ايلىق جالاقى – 250 مىڭ تەڭگە. قازىر كاسىپورىنعا تاپسىرىس كوپ تۇسسە, جىلىنا 10 ميلليارد تەڭگەنىڭ قۇرىلىس-قۇراستىرۋ جۇمىسىن يگەرە الاتىن الەۋەتى بار ەكەن.
«قانداي نىساننىڭ بولسىن, قۇرىلىسىنىڭ ساپاسىنا ايرىقشا ءمان بەرگەن ءجون. ويتكەنى, قۇرىلىس – ەكونوميكا لوكوموتيۆى. بۇل سالا كەرى كەتسە, ەلىمىز وركەندەمەيدى. وكىنىشكە قاراي, مۇندا دا شۇعىل شەشىمىن كۇتىپ تۇرعان پروبلەمالار از ەمەس. قىمباتشىلىق جان-جاقتان قىسىپ بارادى. نارىقتا ماتەريالداردىڭ باعاسى اي ەمەس, اپتا سايىن ءوسىپ جاتىر. سوندىقتان دا مەملەكەتتىك ساتىپ الۋ كونكۋرستارىنا ۇسىنىلاتىن نىسانداردىڭ جوبالىق-سمەتالىق قۇجاتتارىنداعى قۇرىلىس ماتەريالدارىنىڭ باعاسىنا جىل سايىن تۇزەتۋلەر ەنگىزىپ تۇرۋ كەرەك.
بۇل ماسەلە ەسكەرىلمەسە, مەردىگەرلەر قارىزدان كوز اشپايدى. بۇل ۇسىنىسىمىزدى قۇزىرلى ورگاندارعا ۇزدىكسىز ايتىپ, تالاپ قويىپ كەلەمىز. «بينوم» تەندەردە ۇتىپ العان نىسانداردىڭ قۇجاتتارىن قايتا قاراپ, تۇراقتى تۇزەتۋلەر مەن تولىقتىرۋلار ەنگىزىپ وتىرادى», دەيدى سەرىك بەكتەن ۇلى.
اۋليەاتالىق ءىرى كومپانيا سوڭعى جىلدارى تەندەرگە قاتىسىپ, جەر تەلىمدەرىن ۇتىپ الادى. ول جەردە ءىرى پانەلدەرمەن 5 جانە 9 قاباتتى تۇرعىن ۇيلەر سالادى. ولاردى وزدەرى قولجەتىمدى باعامەن ساتادى. وتكەن جىلى جۋالى اۋدانىنداعى تۇكتىباي اۋىلىندا 300 ورىندىق مەكتەپ پەن ب.مومىش ۇلى اۋىلىندا بەس قاباتتى تۇرعىن ءۇي سالىپ, پايدالانۋعا بەرىپتى. بايزاق اۋدانىندا 6 كوپقاباتتى ءۇي قولدانىسقا بەرىلگەن.
بيىل مەملەكەتتىك ساتىپ الۋ كونكۋرسىنا قاتىسىپ, بايزاق اۋدانىندا 2,5 گەكتار جەر تەلىمىن ساتىپ العان. ول اۋماقتا 6 كوپقاباتتى تۇرعىن ءۇي بوي كوتەرەدى. تاياۋدا تارازداعى 14 شاعىن اۋدان اۋماعىنان تەندەردە 4,5 گەكتار جەر ۇتىپ الدى. كەلەشەكتە وسىندا ءۇش جىلدا 5 جانە 9 قاباتتى 10 ءۇي ەل يگىلىگىنە بەرىلەدى. قازىر ولاردىڭ جوبالىق-سمەتالىق قۇجاتتارى دايىندالىپ جاتىر.
وسى جىلى كاسىپورىن تارازداعى قان ورتالىعى عيماراتىنىڭ قاسىندا 30 جانە 60 پاتەرلى ەكى ەليتالى ءۇيدىڭ قۇرىلىسىن باستايدى. بۇل عيماراتتاردا تۇرعىندار ءبىر جىلدان كەيىن قونىس تويىن تويلايتىن بولادى. بينومدىقتار مەملەكەتتىك ساتىپ الۋ كونكۋرستارىنا قاتىسىپ, ءىرى دە كۇردەلى نىسانداردىڭ قۇرىلىسىن ۇتىپ العىسى كەلەدى. بۇعان ولاردىڭ الەۋەتى مەن كاسىبي شەبەرلىگى تولىق جەتەدى.
سەرىكتەستىك باسشىسىنىڭ ايتۋىنشا, كومپانياداعى مامانداردىڭ الەۋەتى كەز كەلگەن ءىرى نىساننىڭ قۇرىلىسىن ساپالى اتقارۋعا جەتكىلىكتى. ۇزاق جىلدار بويى جەمىستى ەڭبەك ەتىپ كەلە جاتقان «بينوم» جشس ءالى تالاي اۋقىمدى جۇمىستى اتقاراتىنىنا سەنىم مول. ويتكەنى, ۇجىمدا مامان دا, تەحنيكا دا بار. ودان بولەك قۇرىلىس ماتەريالدارىن ايتارلىقتاي كولەمدە شىعارۋعا بارلىق مۇمكىندىك قاراستىرىلعان.
تاراز
