سۋرەتتەردى تۇسىرگەن – اقادىل رىسماحان
جىل باسىندا وڭىردە ەكى بىردەي زاۋىت اشىلسا, بۇل جۇمىس جىل ورتاسىندا دا لايىقتى جالعاسىن تاپتى. ءساۋىردىڭ سوڭىن الا شۋ اۋدانىنداعى «جىبەك جولى» ارنايى ەكونوميكالىق ايماعىندا ءىرى مەتاللۋرگيالىق زاۋىت قۇرىلىسى باستالدى. ودان بولەك, وڭىردە ءتۇرلى باعىتتاعى بىرنەشە ءوندىرىس وشاعى ىسكە قوسىلدى. جاڭادان بوي كوتەرگەن زاۋىتتار جەرگىلىكتى تۇرعىنداردى جۇمىسپەن قامتۋعا نيەت ءبىلدىرىپ وتىر.
جالپى, وڭىرگە شەتەلدىك جانە وتاندىق ينۆەستورلاردىڭ كەلۋى كەيىنگى كەزدە ايتارلىقتاي قارقىن الدى. جىل باسىندا تۇرار رىسقۇلوۆ اۋدانىندا ساعاتىنا 3 مىڭ ليتر مينەرالدى سۋ شىعاراتىن كاسىپورىن ىسكە قوسىلسا, سول جۇمىستىڭ جالعاسىنداي بولىپ, بىرەر كۇن بۇرىن جۋالى اۋدانىندا «اقساي جۋالى» مينەرالدى سۋ كاسىپورنى جۇمىسىن باستادى. جاڭا زاۋىت ىشكى نارىقتى قامتۋعا باسىمدىق بەرىپ وتىر.
«مۇنداي ىلكىمدى جوبالار ءوڭىردىڭ ەكونوميكالىق كورسەتكىشىن ۇستەمەلەپ قانا قويماي, جەرگىلىكتى حالىقتىڭ ءال-اۋقاتىنىڭ ارتۋىنا ىقپال ەتەدى. جاڭا كاسىپورىننىڭ اشىلۋى ارقاسىندا اۋىلدا جاڭا جۇمىس ورىندارى پايدا بولادى. ناتيجەسىندە, تۇتاس قازاقتىڭ التىن بەسىگىنە اينالعان ەلدى مەكەندەر دامۋدىڭ داڭعىل جولىنا تۇسەدى. وسى تۇرعىدان العاندا, اتقارىلىپ جاتقان جۇمىستىڭ اۋقىمى كەڭ دەپ ويلايمىن. ءبىرىنشى كەزەكتە ءبىز جەرگىلىكتى ونىمگە دەگەن سۇرانىستى ارتتىرۋعا بارىنشا جاعداي جاساۋىمىز كەرەك. سىرتتان كەلەتىن تاۋارعا دەگەن تاۋەلدىلىكتى مۇمكىندىگىنشە ازايتۋ ءۇشىن وسىنداي قادامعا بارعان ءجون دەپ بىلەمىن. سوندا عانا اۋىل تۇرعىندارى تۋعان جەرىندە اتقارىلىپ جاتقان جۇمىستىڭ ناتيجەسىمەن ماقتانا الادى. وندىرىستىك ينفراقۇرىلىمدى دامىتۋ مەن وڭىرگە ينۆەستيتسيا تارتۋ – مەملەكەت باسشىسىنىڭ بىزگە جۇكتەگەن نەگىزگى مىندەتىنىڭ ءبىرى. سوندىقتان بۇل باعىتتاعى جۇمىستى بارىنشا ساپالى اتقارىپ, توقتاۋسىز جۇرگىزەمىز», دەيدى ءوڭىر باسشىسى ەربول قاراشوكەەۆ.
رەسمي دەرەككە جۇگىنسەك, جۋالىداعى ىلكىمدى جوبا جەكە ينۆەستيتسيا ەسەبىنەن جۇزەگە اسىرىلىپ وتىر. جاڭا ءوندىرىس وشاعىن سالۋ ءۇشىن 400 ملن تەڭگە قارجى جۇمسالعان. زاماناۋي قۇرىلعىلارمەن جابدىقتالعان كاسىپورىننىڭ وندىرىستىك قۋاتى تاۋلىگىنە 80 توننا مينەرالدى سۋ وندىرۋگە مۇمكىندىك بەرەدى. جەرگىلىكتى اتقارۋشى بيلىك وكىلدەرىنىڭ ايتۋىنشا, كاسىپورىن باسشىلارى باستاپقى كەزەڭدە 15 ازاماتتى جۇمىسقا قابىلداعان.
مينەرالدى سۋدى وبلىس اۋماعىنان بولەك, استانا, الماتى, شىمكەنت قالالارىنا جانە قىزىلوردا, اتىراۋ, باتىس قازاقستان, ماڭعىستاۋ وبلىستارى مەن وزگە دە وڭىرلەردىڭ نارىعىنا شىعارۋ جوسپارلانىپ وتىر.
جاۋاپتى مامانداردىڭ ايتۋىنشا, وسى جىلى جالپى قۇنى 175 ملرد تەڭگەنى قۇرايتىن 30 ينۆەستيتسيالىق جوبانى جۇزەگە اسىرۋ جوسپارلانعان. ىلكىمدى جوبالار تولىققاندى ىسكە اسقاندا, وڭىردە 1 143 جاڭا جۇمىس ورنى اشىلماق. وسى جىلدىڭ العاشقى جارتىسىندا نەگىزگى كاپيتالعا سالىنعان ينۆەستيتسيا كولەمى 301,8 ملرد تەڭگەنى قۇراعان. وسىلايشا, وتكەن جىلدىڭ سايكەس كەزەڭىمەن سالىستىرعاندا, كورسەتكىش 48,1%-عا ارتقان.
جامبىل وبلىسى,
جۋالى اۋدانى
