1991 جىلى قازاق حالقىنىڭ جۇرەگىن قولىما الىپ تۇڭعىش رەت عارىشقا اتتانعاندا تالعات امانگەلدى ۇلى ماعان قوسالقى عارىشكەر بولىپ تىركەلىپ ەدى. اراعا ءۇش جىل سالىپ, ول عارىشكەر-بورتينجەنەر ساناتىندا عارىش كوگىنە شىقتى.
تالعات امانگەلدى ۇلى قازاقتان شىققان ناعىز كاسىبي, بىلگىر عارىشكەر! جالپى جيىنتىعى 341 تاۋلىككە سوزىلعان 3 عارىش ەكسپەديتسياسىنا قاتىستى. ول – اشىق عارىش كەڭىستىگىنە 8 رەت شىعىپ, 42 ساعاتتان استام ۋاقىت بولعان تۇڭعىش قازاق. عارىشتاعى سول ەرلىگى ءۇشىن ەسىمى گيننەستىڭ رەكوردتار كىتابىنا جازىلدى. تۇڭعىش عارىش ءتۋريسى امەريكالىق دەننيس تيتونى عارىش كوگىندە 8 تاۋلىك ساپارلاتىپ, امان-ەسەن جەرگە الىپ كەلدى. ول دا – ۇلكەن ەرلىك!
قازاقستان عارىش زەرتتەۋ سالاسى قايعىرۋ ۇستىندە. ويتكەنى بۇل سالاعا تالعات امانگەلدى ۇلىنىڭ سىڭىرگەن ەڭبەگى ولشەۋسىز.
مەزگىلسىز قازانىڭ سالماعى حالىقتىڭ جۇرەگىنە اۋىر ءتيىپ وتىر.
مەن حالقىما, تالعات امانگەلدى ۇلىنىڭ جان جارى ۆيكتوريا ۆولدەماروۆناعا, ەتجاقىن تۋىستارىنا قايعىرىپ كوڭىل ايتامىن.
باقۇل بول, حالىق قاھارمانى!
جانىڭ ءجانناتتا بولسىن!
توقتار اۋباكىروۆ,
قازاقتىڭ تۇڭعىش عارىشكەرى
