تەمىرجول ينفراقۇرىلىمى كەڭەيتىلىپ جاتىر

وتاندىق لوكوموتيۆتەر پاركىندە شامامەن 1 800 بىرلىك بار, بيىل تاعى 200 بىرلىك ساتىپ الۋ جوسپارلانىپ وتىر. ۆاگون سەگمەنتىندە 300-دەن استام وپەراتور جۇمىس ىستەيدى, 140 مىڭ جۇك ۆاگونى تىركەلگەن. بىلتىر 2 350 جاڭا ۆاگون ساتىپ الىندى, وسىعان ۇقساس كولەم ساتىپ الۋ اعىمداعى جىلعا كوزدەلگەن, بۇل ىشكى نارىقتىڭ قاجەتتىلىكتەرىن قامتاماسىز ەتۋگە مۇمكىندىك بەرەدى.

تەمىرجول ينفراقۇرىلىمىن كەڭەيتۋ: جاڭا مارشرۋتتار جانە جاڭعىرتۋ

ەلىمىزدە جالپى ۇزىندىعى 1 300 شاقىرىم اۋقىمدى تەمىرجول جوبالارىنىڭ كەشەنى ىسكە اسىرىلىپ جاتىر. تەمىرجول جانە سۋ كولىگى كوميتەتى توراعاسىنىڭ ورىنباسارى ن.كەلبۋعانوۆتىڭ ايتۋىنشا, 2025 جىلى نەگىزگى ۋچاسكەلەر – «دوستىق – مويىنتى» جانە الماتى ستانتسياسىنىڭ اينالما جەلىسى اياقتالىپ, پايدالانۋعا بەرىلەدى. ءبىر مەزگىلدە «داربازا – ماقتارال», «اياگوز – باقتى» جانە «قىزىلجار – مويىنتى» (366 شاقىرىم) جاڭا جەلىلەرىنىڭ قۇرىلىسى جۇرگىزىلىپ جاتىر, بۇل – ترانسكاسپي مارشرۋتىنىڭ ۇزاقتىعىن 150 شاقىرىمعا قىسقارتادى.

وتكىزۋ قابىلەتىن ارتتىرۋ ءۇشىن «التىنكول – جەتىگەن» جانە «بەينەۋ – ماڭعىستاۋ» ۋچاسكەلەرى جاڭارتىلادى, سونداي-اق «قىزىلجار – سەكسەۋىل» جانە «شالقار – بەينەۋ» سەگمەنتتەرىندە زاماناۋي اۆتوبۇعاتتاۋ جۇيەلەرى ەنگىزىلەدى. 2023-2024 جىلدارى 2 800 شاقىرىم جول جوندەلگەن.

وتاندىق تەرمينالدار شەتەلدە – اليات ء(ازىربايجان), سەلياتينو (رەسەي), سۆيسلوچ (بەلارۋس) جانە تاشكەنتتە بەلسەندى دامىپ جاتىر. ولاردىڭ جيىنتىق قۋاتى جىلىنا 1 ملن كونتەينەردەن اسادى. بولاشاقتا رۋمىنيادا, ۆەنگريادا جانە ۇرىمشىدە (قحر) كەڭەيتۋ جوسپارلانىپ وتىر. تەرمينالدىق قۋاتتاردىڭ جالپى كولەمى 2,5 ملن كونتەينەرگە دەيىن وسەدى. ءترانزيتتىڭ ءۇش ەسە – جىل سايىن 76 ملن تونناعا دەيىن ايتارلىقتاي ءوسۋى كۇتىلىپ وتىر, بۇل قازاقستاننىڭ ءوڭىردىڭ نەگىزگى كولىك-لوگيستيكالىق حابى رەتىندەگى پوزيتسياسىن نىعايتادى.