اتىراۋ وبلىستىق جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ ءبولىم باسشىسى گۇلبولات امانعاليەۆانىڭ ايتۋىنشا, قانداستاردىڭ باسىم بولىگى – 127 ادام وزبەكستان رەسپۋبليكاسىنان كوشىپ كەلدى. رەسەي فەدەراتسياسىنان – 22 ادام, تۇرىكمەنستان رەسپۋبليكاسىنان – 12 ادام, قىتاي حالىق رەسپۋبليكاسىنان – 7 ادام جانە موڭعوليادان 1 ادام اتامەكەنىنە ورالىپ وتىر. ولاردىڭ 153-ءى – اتىراۋ قالاسىنا, جەتەۋى – جىلىوي اۋدانىنا, 8 ادام قۇرمانعازى اۋدانىنا, بىرەۋى ماقات اۋدانىنا تۇراقتادى.
– بيىل اتىراۋ وبلىسىندا قانداستاردى قابىلداۋدىڭ وڭىرلىك كۆوتاسى اياسىندا 100 ادامعا كۆوتا ءبولىندى. وسى كەزگە دەيىن كوميسسيا شەشىمىمەن 56 وتباسى (90 ادام) كۆوتا الدى. كۆوتا العانداردىڭ اراسىندا وزبەكستاننان – 63 ادام, قىتايدان – 10, رەسەيدەن – 10, تۇرىكمەنستاننان 7 قانداس بار. قانداستاردىڭ كوشى-قون شىعىنىن وتەۋ ءۇشىن 81 ادامعا 70 ايلىق ەسەپتىك كورسەتكىشكە سايكەس 22 ملن 294 مىڭ 440 تەڭگەنىڭ بىرجولعى الەۋمەتتىك تولەمى بەرىلدى. ال 6 وتباسى قۇرامىنداعى 13 ادامعا تۇرعىن ءۇي جالداۋعا جانە كوممۋنالدىق تولەم ءۇشىن 20-25 ايلىق ەسەپتىك كورسەتكىش مولشەرىندە 727 مىڭ 420 تەڭگە كولەمىندە اي سايىنعى جاردەماقى تاعايىندالدى, – دەيدى گ.امانعاليەۆا.
ونىڭ دەرەگىنە قاراعاندا, زاڭدا كورسەتىلگەن مەرزىمگە سايكەس 15 قانداستىڭ مارتەبەسى 6 ايعا ۇزارتىلىپ وتىر. ونىڭ ىشىندە 13 قانداس بۇرىن وزبەكستاندى, بىرەۋى موڭعوليانى, تاعى 1 ادام تۇرىكمەنستاندى مەكەن ەتكەن.
– قازىر اتىراۋ وبلىسىندا قانداستاردى ۋاقىتشا ورنالاستىرۋ ورتالىعى تۇراقتى جۇمىس ىستەيدى. ماقساتىمىز – ەلگە ورالعان قانداستاردىڭ جاڭا ورتاعا بەيىمدەلۋىنە جاسالعان ناقتى قولداۋ كورسەتۋ. مانساپ ورتالىقتارىنا جۇگىنگەن 10 قانداستىڭ بەسەۋى الەۋمەتتىك قولداۋعا يە بولدى. ەكەۋى تۇراقتى جۇمىسقا, ەكى ادام قوعامدىق جۇمىسقا ورنالاستىرىلىپ, ءبىر ادام قايتا دايارلاۋ كۋرسىنا جىبەرىلدى, – دەپ مالىمدەدى گ.امانعاليەۆا.
اتىراۋ وبلىسى
