فەستيۆال شىمىلدىعى ەلىمىزدە تۇسىرىلگەن «شاتىرداعى ەكەۋ» فيلمىمەن اشىلدى. كارتينا مادەنيەت جانە اقپارات مينيسترلىگى مەن ۇلتتىق كينونى قولداۋ مەملەكەتتىك ورتالىعىنىڭ قولداۋىمەن تۇسىرىلگەن. ءفيلمدى كوپشىلىككە تانىستىرۋ ماقساتىندا پروديۋسەر ءاليا شارىپباەۆا ارنايى بارىپ, شىعارماشىلىق كەزدەسۋ وتكىزدى. ول كورەرمەندەرمەن اشىق اڭگىمە قۇرىپ, ءتۇسىرىلىم بارىسىنداعى ەرەكشە ساتتەردى ءبولىستى.
«شاتىرداعى ەكەۋ» – جاس رەجيسسەر گۇلشات سماعۇلوۆانىڭ دەبيۋتتىك تولىقمەتراجدى تۋىندىسى. فيلمدە تاعدىرى كۇردەلى جاس جىگىت دامير مەن اۋتيزمگە شالدىققان ءجاسوسپىرىم كوستيا اراسىنداعى دوستىق پەن ءوزارا تۇسىنىستىك سۋرەتتەلەدى. كارتينا ينكليۋزيۆتى قوعام قۇرۋدىڭ ماڭىزىن, ەرەكشە بالالاردىڭ الەۋمەتپەن بايلانىس ورناتۋداعى قيىندىقتارىن نازىك ءارى شىنايى جەتكىزە بىلگەن.
فەستيۆال اياسىندا كورەرمەن نازارىنا ۇسىنىلعان تاعى ءبىر وتاندىق تۋىندى – «قاجىمۇقان» ءفيلمى. كارتينا فرانتسۋز كۇرەسىنەن الەم چەمپيونى اتانعان تۇڭعىش قازاق بالۋانى قاجىمۇقان مۇڭايتپاسوۆتىڭ ءومىر جولىنا ارنالعان. تاريحي تۇلعانىڭ ەرلىگى مەن ۇلتتىق رۋحتى كوتەرۋدەگى ءرولى, حالىقارالىق ارەنالارداعى جەڭىستەرى مەن حالىق اراسىنداعى ورنى فيلم بارىسىندا كەڭىنەن كورىنىس تاپتى. بۇل تۋىندى – جاستارعا ۇلگى بولارلىق, تاربيەلىك ءمانى زور رۋحاني ەڭبەك.
ايتا كەتەيىك, «كاراكۋز فيلم» كينوفەستيۆالى ءداستۇرلى بايقاۋ فورماتىنان وزگەشە. مۇندا ۇزدىكتەردى كاسىبي قازىلار القاسى ەمەس, كورەرمەننىڭ ءوزى داۋىس بەرۋ ارقىلى انىقتايدى. فەستيۆال باعدارلاماسىندا التى نەگىزگى نوميناتسيا قاراستىرىلعان: «ۇزدىك كوركەم فيلم», «ۇزدىك دەرەكتى فيلم», «ۇزدىك انيماتسيالىق فيلم», «ۇزدىك قىسقامەتراجدى فيلم», «بالالار كوزايىمى جۇلدەسى» جانە «كاراكۋز فيلم» گران-ءپريى. سونىمەن قاتار, بەس ارنايى جۇلدە دە تابىس ەتىلەدى.
