بۇل – ەۋرازيالىق بانك پەن Allur اۆتوكولىك كومپانياسى بىرىگىپ ىسكە قوسقان Eurasian Drive جوباسىنىڭ ارقاسىندا قول جەتكىزىلىپ وتىرعان جەڭىلدىك. بۇگىن استانادا وتكەن جيىندا كومپانيا وكىلدەرى جۋرناليستەرگە جاڭا جوبانىڭ ەرەكشەلىكتەرى مەن ارتىقشىلىقتارىن تانىستىردى. ولاردىڭ ايتۋىنشا, اۆتوسالوننان كولىك تاڭدالعان ساتتەن باستاپ بارلىق ءراسىم ورتا ەسەپپەن ءبىر ساعات ىشىندە بىتەدى. بۇعان دەيىن ونلاين تىركەۋ تەك قولدان كولىك ساتىپ العاندا عانا مۇمكىن بولسا, جاڭا كولىك الۋشىلار باستاپقى تىركەۋ ءۇشىن قۇجاتتاردىڭ قاعاز نۇسقاسىن مامانداندىرىلعان حقو-نا وزدەرى تاپسىرۋعا ءتيىس بولاتىن. مەملەكەتتىك قىزمەتتەرمەن ينتەگراتسيالانعان جوبانىڭ ارقاسىندا اۆتونەسيەگە كولىك ساتىپ الۋ ۋاقىتىن بارىنشا قىسقارتۋعا, كليەنتتىڭ بانكپەن, ديلەرمەن جانە مەملەكەتتىك وكىلدەرمەن ءوزارا ءىس-قيمىلىن جەڭىلدەتۋگە مۇمكىندىك بەرگەن العاشقى «تۋرا تسيفرلىق ۇدەرىس» ومىرگە كەلىپ بولىپ وتىر.
«سەرىكتەستەرىمىزبەن بىرگە ءبىز اۆتوكولىك ساتىپ الۋ ۇدەرىسىن «ۇشەۋى بىرەۋىندە» فورماتىنا دەيىن جەڭىلدەتتىك: اۆتوسالوندا كولىكتى تاڭداۋ, نەسيە راسىمدەۋ جانە تەحنيكالىق پاسپورت الۋ ەشقانداي قاعازباستىلىق پەن بيۋروكراتياسىز ونلاين جۇزەگە اسادى. نەگىزى مۇنىڭ ءبارى جارتى ساعات ىشىندە بىتەتىن شارۋا, بىراق ءبىز ارتىعىمەن ءبىر ساعات دەپ الىپ وتىرمىز. بۇل – نارىق كوشباسشىسى رەتىندە ءبىز ءۇشىن تسيفرلىق قىزمەتتەردى دامىتۋدىڭ زاڭدى قادامى جانە سالانىڭ ىڭعايلىلىق, جىلدامدىق پەن قاۋىپسىزدىك بويىنشا جاڭا ستاندارتى. Eurasian Drive مەملەكەتتىك تالاپتاردىڭ بارلىعىنا ساي كەلەدى جانە تولىق اشىقتىقتى قامتاماسىز ەتەدى», دەيدى ەۋرازيالىق بانكتىڭ باسقارما توراعاسى ءلاززات ساتيەۆا.
اۆتوكولىكتى راسىمدەۋ پروتسەدۋراسى بىرنەشە اۆتوماتتاندىرىلعان كەزەڭنەن تۇرادى. اۆتوسالوننان كولىك تاڭدالعاننان كەيىن, مەنەدجەر جۇيەگە كليەنتتىڭ دەرەكتەرىن (جسن مەن تەلەفون ءنومىرى) ەنگىزەدى, سونىمەن قاتار كولىك پارامەترلەرى مەن باستاپقى جارنا مولشەرى كورسەتىلەدى. قارجىلاندىرۋ ماقۇلدانعان سوڭ, كليەنت, بانك جانە اۆتوسالون اراسىنداعى بارلىق قۇجات پەن شارتتار ەتسق كومەگىمەن ونلاين تۇردە راسىمدەلەدى. ال باستاپقى جارنانى بانك كارتاسى ارقىلى نەمەسە اۆتوسالون كاسساسىندا تولەۋگە بولادى.
مامىلە راستالعاننان كەيىن جۇيەدە تسيفرلىق قۇجاتتار توپتاماسى اۆتوماتتى تۇردە قالىپتاسىپ, كولىكتى تىركەۋ ۇدەرىسى باستالادى. وسى كەزەڭدە كليەنت جۇيە ارقىلى تىركەۋ ءنومىرىن (VIP ءنومىردى قوسا العاندا) تاڭداپ, مەملەكەتتىك باج سالىعىن تولەپ, تۇلعاسىن راستايدى جانە ءىىم-گە ءوتىنىش بەرەدى, سونداي-اق كولىككە بانك كەپىلدىگىن راسىمدەيدى. تەحپاسپورت بىردەن تسيفرلىق قۇجاتتار بولىمىندە كورىنەدى. مەملەكەتتىك نومىرلەر مەن قۇجاتتاردىڭ تۇپنۇسقاسىن مامانداندىرىلعان حقو-نان كەزەكسىز, وزىنە ىڭعايلى ۋاقىتتا الۋعا بولادى.
«جاڭا اۆتوكولىكتەردى ساتىپ الۋ كەزىندە العاشقى ونلاين تىركەۋ قىزمەتىنىڭ ىسكە قوسىلۋى – ىڭعايلى ءارى زاماناۋي كليەنتتىك تاجىريبەگە جاسالعان ماڭىزدى قادام. ءبىز بۇل جوبادا تولىق تەحنيكالىق ينتەگراتسيانى قامتاماسىز ەتىپ, وتانداستارىمىز ءۇشىن العاشقى تولىققاندى تسيفرلىق اۆتونەسيەنىڭ ءبىر بولشەگى بولعانىمىزدى ماقتان تۇتامىز. وسى ەرەكشە جوبانى جۇزەگە اسىرۋ ءۇشىن بىزگە سەرىكتەس بولىپ, تەحنولوگيالىق قولداۋ كورسەتكەن ەۋرازيالىق بانككە العىس ايتامىز», دەپ ويىمەن ءبولىستى «Allur كت» اق بولشەك ساۋدا باعىتى باسقارۋشى ديرەكتورى مۇحامەد ءالىمحانوۆ.
كومپانيا وكىلدەرى تولىققاندى تسيفرلىق اۆتونەسيە Allur اۆتوسالوندارىندا قازىردىڭ وزىندە قولجەتىمدى ەكەنىن ايتتى.
