وزبەكستان رەسپۋبليكاسى پرەزيدەنتىنىڭ جارلىعىمەن 2021 جىلدان باستاپ 30 شىلدە – وزبەكستانداعى «حالىقتار دوستىعى كۇنى» بولىپ جاريالانعان. وسىعان وراي باۋىرلاس مەملەكەت مەرەكەنى ءبىر اپتا بويى كەڭ كولەمدە اتاپ وتەدى. فەستيۆال بارىسىندا ءتۇرلى ۇلتقا ءتان بيلەر مەن اسەم ءان-كۇيلەر, قولونەر بۇيىمدارى جانە مادەني كورمەلەر ۇسىنىلىپ, ەلدەگى بەيبىتشىلىك پەن تاتۋلىق رۋحى كەڭىنەن ناسيحاتتالادى.
ءىس-شارانىڭ العاشقى كۇنى تاشكەنت قالاسىندا ۇلتتىق مادەني ورتالىقتار پاۆيلوندارىنىڭ سالتاناتتى اشىلۋى ءوتتى. ولار ءتۇرلى ۇلت پەن ۇلىستاردىڭ ءداستۇرى مەن سالت-عۇرپى, تاريحى مەن مادەنيەتى ەسكەرىلىپ جاسالعان.
«ەلىمىزدە 130-دان اسا ۇلت پەن ۇلىس وكىلدەرىنىڭ ءومىر ءسۇرۋى بۇل وڭىردە ەجەلدەن دوستىق, بەيبىتشىلىك پەن توزىمدىلىك ۇستەم بولعانىن كورسەتەدى. ءبىز ءارتۇرلى تىلدە سويلەيمىز. سالت-داستۇرلەرىمىز دە وزگەشە. بىراق ءبىر-ءبىرىمىزدى وتە جاقسى تۇسىنەمىز. سەبەبى ءبىزدىڭ ورتاق وتانىمىز – وزبەكستان. 85 جىلدان بەرى كورەيلەر وزبەكستاندا ءومىر ءسۇرىپ كەلەدى. ولار وزبەكستاندى ءوز وتانى دەپ بىلەدى, ال استانامىزدا سالىنعان ۇلتتىق مادەني ورتالىقتارعا ارنالعان بىرەگەي پاۆيلوندار – قامقورلىقتىڭ, بىرلىكتىڭ تاعى ءبىر ناقتى كورىنىسى», دەدى وزبەكستان كورەي ۇلتتىق-مادەني ورتالىقتارى قاۋىمداستىعىنىڭ توراعاسى ۆيكتور پاك. ءىس-شارادا ۇلتتىق مادەني ورتالىقتار كوركەمونەرپازدار ۇجىمدارىنىڭ كونتسەرتتىك باعدارلاماسى دا كورسەتىلدى. سالتاناتتى جيىندا الىس-جاقىننان كەلگەن مارتەبەلى مەيماندار ءسوز سويلەپ, ىزگى باستامانىڭ مەرەيىن اسىردى.
