اقش-تا 790 مىڭنان استام فرانچايزينگتىك كاسىپورىن 8,4 ملن جۇمىس ورنىن قۇرىپ, ءىجو-ءنىڭ 3%-ىن قامتاماسىز ەتەدى. بۇل – ەلدەگى شوب-تىڭ 10%-عا جۋىعى دەگەن ءسوز. ال رەسەيدە 70 مىڭنان كوپ ساۋدا نۇكتەسىن قالىپتاستىرىپ وتىرعان 3 000-نان استام فرانشيزا بار. شوب-تاعى فرانشيزا ۇلەسى 4-5% شاماسىندا. ەلىمىزدە 400-گە جۋىق فرانشيزا تىركەلىپتى. الايدا سونىڭ 100-120-سى عانا ناقتى جۇمىس ىستەپ تۇر. شوب-تاعى ۇلەسى 2%-عا جەتپەيدى, سول سەبەپتى ءوسۋ الەۋەتى تۋرالى ايتۋعا ءالى ەرتە.
بۇل باعىت بىزدە نەلىكتەن دامىماي جاتىر؟ مەنىڭشە, ادەپكى سەبەبى – زاڭنامالىق تەتىكتىڭ جوقتىعى. قازىرگى رەتتەۋ ازاماتتىق كودەكستەگى كەشەندى ليتسەنزيا تۋرالى باپپەن شەكتەلەدى. فرانچايزينگ جەكە بيزنەس ءتۇرى رەتىندە راسىمدەلمەگەن. ەكىنشىدەن, رەسمي ستاتيستيكا جوق. فرانچايزينگتىڭ جەكە ەقتجك (ەكونوميكالىق قىزمەت تۇرلەرىنىڭ جالپى كلاسسيفيكاتورى) كودى بولماعاندىقتان, ول ەسەپتىلىكتە «كورىنبەيدى». بۇل ونى قولداۋعا باعىتتالعان كەز كەلگەن تالپىنىستى تەجەيدى. ۇشىنشىدەن, جالعان فرانشيزا نارىعى بەلەڭ الدى. سوڭعى جىلدارى فرانشيزانى «ادال ەمەس» كۇيدە ۇسىنۋ جيىلەپ كەتتى. ءتورتىنشى سەبەپ – كاسىپكەرلىك ساۋاتتىڭ تومەندىگى. كوبى فرانشيزانى تولىق جابدىقتالعان بيزنەس دەپ تۇسىنەدى دە, ونىڭ ستاندارتى, ءتارتىبى جانە جەكە ءوزىنىڭ ارالاسۋ قاجەتتىلىگى تۋرالى ويلاي بەرمەيدى.
دەگەنمەن نارىقتا ءساتتى جۇمىس ىستەپ جاتقان فرانشيزالار دا جوق ەمەس. ولار – «Lanzhou» مەيرامحانالار جەلىسى, «EcoShop» دۇرىس تاماقتانۋ فورماتى, «Zebra Coffee», «Royal Flowers» گۇل بيزنەسى, «Olymp» فيتنەس-باعىتى, «Shonkar» ءبىلىم جوباسى, «Coffee Boom» «ChocoLove», «Sergek» جانە «Toi Dasterhan».
وزگە ەلدەردە دە ءبىزدىڭ فرانشيزالار جۇمىس ىستەيدى. ءبىزدىڭ برەندتەر وزبەكستان, قىرعىزستان, ءباا, تۇركيا, رەسەي نارىعىنا شىعىپ جاتىر. ولار ءالى كوپ ەمەس, دەگەنمەن بۇلاردىڭ ارقايسىسى – ۇلتتىق ەكسپورتتىق الەۋەتتى ورلەتەتىن مۇمكىندىك.
جاعداي قازىرگىدەن دە اۋقىمدى سيپات الىپ, فرانچايزينگتىڭ قارقىندى دامۋى ءۇشىن نە ىستەلۋى كەرەك؟ 2024 جىلدىڭ ناۋرىز-ساۋىرىندەگى زاڭنامالىق ۇسىنىستاردى تالداي وتىرا نارىق كەلەسى قادامدارعا مۇقتاج دەپ ايتۋعا بولادى:
ءبىرىنشى, فرانچايزينگتى كاسىپكەرلىكتىڭ جەكە ءتۇرى رەتىندە تانۋ, مويىنداۋ.
ەكىنشى, ەقتجك ارنايى كودىن جانە ستاتيستيكالىق ەسەپتىلىكتى ەنگىزۋ.
ءۇشىنشى, وتاندىق فرانشيزالاردى قولداۋعا باعىتتالعان مەملەكەتتىك باعدارلاما.
ءتورتىنشى, جالعان فرانشيزالاردان قورعاۋ ءۇشىن فرانچايزينگتىك سەرتيفيكاتتاۋ ينستيتۋتىن قۇرۋ.
بەسىنشى, فرانشيزا ءۇشىن ءبىلىم بەرۋ باعدارلامالارىن ەنگىزۋ.
التىنشى, وتاندىق فرانشيزالاردىڭ ەكسپورتى ءۇشىن ينفراقۇرىلىم قالىپتاستىرۋ, ياعني كاسىپكەرلىكتى قولداۋ سەرۆيس ورتالىعى, ۇلتتىق كاسىپكەرلىك پالاتا جانە حالىقارالىق كورمەلەر ارقىلى.
فرانشيزا – تابىسقا كەپىلدىك بەرۋ قۇرالى ەمەس, بۇل – جۇيەگە كەپىلدىك بەرۋ مۇمكىندىگى. ەگەر ءبىز ەلىمىزدە ورنىقتى جەلىلەردى, تىڭ جۇمىس ورىندارىن, زياتكەرلىك ونىمدەردىڭ ەكسپورتىن كورگىمىز كەلسە, وندا فرانچايزينگ كولەڭكەدەن شىعۋعا ءتيىس. ول داعدارىس, ينفلياتسيا جانە كادر تاپشىلىعى جاعدايىندا شوب ءۇشىن ءوسىم نۇكتەسى بولا الادى.
قازىرگى كەزەڭ – شيكىزاتتىق مودەلدەن ءونىم, مادەنيەت جانە برەند باعالاناتىن مودەلگە اۋىسۋدىڭ تاماشا ۋاقىتى. فرانشيزا – وسىعان باستايتىن جول. ءبىز بۇل باعىتتان الەۋەت كورىپ, ونى ءتيىمدى پايدالانا الامىز با, الدە تاماشا مۇمكىندىكتى ۋىستان شىعارىپ الامىز با – ماسەلە سوندا.
