قىزىلورداعا بارعان سەناتورلار قالا اكىمى نۇرجان احاتوۆپەن بىرگە بىرقاتار قالالىق نىساندى, ونىڭ ىشىندە پرەزيدەنت ساياباعىن, «قورقىت اتا» اللەياسىن, مەملەكەتتىك رامىزدەر الاڭىن ارالادى. بۇل نىسانداردىڭ اۋماعى مەملەكەت باسشىسىنىڭ جايلى قالا ورتاسىن قالىپتاستىرۋ جونىندەگى تاپسىرماسى اياسىندا اباتتاندىرىلعان ەدى.
دەپۋتاتتار جاڭارتىلعان كوشەلەردى, باقتار مەن كوپقاباتتى ۇيلەردىڭ اۋلالارىن, سپورت جانە ويىن الاڭدارىن, سونداي-اق جەرگىلىكتى كاسىپكەرلەردىڭ قولداۋىمەن جاڭارعان تۇرعىن ءۇي عيماراتتارىنىڭ قاسبەتتەرىن كوردى. كەيىنگى ءۇش جىلدا 400-دەن اسا جوبا جۇزەگە اسىپ, وبلىس ورتالىعىن كوگالداندىرۋ مەن ينفراقۇرىلىمدى جاقسارتۋ بويىنشا كەشەندى جۇمىستار جاسالعانى اتاپ ءوتىلدى.
سەناتورلار پرەزيدەنتتىڭ باستاماسى بويىنشا جۇزەگە اسقان «تازا قازاقستان» ەكولوگيالىق ءىس-شاراسى بۇگىندە جالپىۇلتتىق سيپاتقا يە بولعانىن اتاپ ءوتتى. ول ماڭىزدى تاربيەلىك ءمانى زور ءارى قوعامدى ىنتىماققا ۇيىستىراتىن قادام بولىپ وتىر.
«مەملەكەت باسشىسىنىڭ باستامالارى جەرگىلىكتى جەرلەردە ناقتى جۇزەگە اسقانىن قىزىلوردا قالاسىنان كورىپ وتىرمىز. وسى باعىتتاعى جۇيەلى جۇمىس جالعاسا بەرەرىنە, وبلىس ەكولوگيالىق تۇراقتىلىق پەن اباتتاندىرۋ ورتالىعىنىڭ ۇلگىسى رەتىندە دامي تۇسەتىنىنە سەنىمدىمىز», دەدى سەناتور ن.بايقاداموۆ.
دەپۋتات ر.رۇستەموۆ بيزنەستىڭ الەۋمەتتىك جاۋاپكەرشىلىگى اسا ماڭىزدى ەكەنىنە نازار اۋداردى. سونىڭ ارقاسىندا وبلىستا 80-نەن اسا سپورت نىسانى سالىنىپ, ونداعان تۇرعىن ءۇيدىڭ قاسبەتتەرى جوندەلگەن. سەناتورلار مەملەكەت باسشىسىنىڭ تاپسىرمالارى وڭىردە ساپالى جۇزەگە اسىپ جاتقانىن اتاپ ءوتتى. ءار ءىستىڭ تيىمدىلىگى جوعارى ەكەنىنە جانە جەرگىلىكتى تۇرعىنداردان قولداۋ تاۋىپ وتىرعانىنا كۋا بولدى.
ەلورداداعى ء«ۇمىت» داعدارىس ورتالىعىنا باس سۇققان دەپۋتات ا.لۋكين مەكەمەنىڭ ۇجىمىمەن جانە قامقورلىققا بولەنگەن جاندارمەن كەزدەسىپ, ولاردىڭ ءومىر ءسۇرۋ جاعدايىمەن, كورسەتىلەتىن الەۋمەتتىك جانە مەديتسينالىق قىزمەتتەر اۋقىمىمەن تانىستى. باسقوسۋدا زارداپ شەككەندەردى قورعاۋدىڭ زاڭنامالىق جانە ينستيتۋتسيونالدىق تەتىكتەرىن جەتىلدىرۋ, سالالىق مەكەمەلەر اراسىنداعى ۇيلەستىرۋدى كۇشەيتۋ, سونداي-اق قايتالانعان زورلىق-زومبىلىق جاعدايلارىنىڭ الدىن الۋدا تيىمدىلىكتى ارتتىرۋ ماسەلەلەرى تالقىلاندى. دەپۋتات بىلتىر ايەلدەر مەن بالالارعا قاتىستى زورلىق-زومبىلىق كورسەتكەندەرگە جازانى قاتاڭداتۋ, الدىن الۋ شارالارىن كەڭەيتۋ, سونداي-اق ازاماتتاردىڭ وسال ساناتتارىن قۇقىقتىق قورعاۋدى كۇشەيتۋ تۋرالى ماڭىزدى زاڭ قابىلدانعانىن ايتتى.
دەپۋتات جۇمىس ساپارى اياسىندا ەلوردالىق «سارىارقا» اۋدانىنىڭ اكتيۆىمەن دە كەزدەستى. الەۋمەتتىك-ەكونوميكالىق دامۋدىڭ وزەكتى ماسەلەلەرى, ونىڭ ىشىندە ءۇي ماڭىنداعى اۋماقتاردى اباتتاندىرۋ, تۇرعىن ءۇي-كوممۋنالدىق قىزمەتتەردىڭ ساپاسىن جاقسارتۋ, قالا تۇرعىندارىنا مەديتسينالىق كومەك پەن ءبىلىم بەرۋ ينفراقۇرىلىمىنىڭ قولجەتىمدىلىگى تالقىلاۋدىڭ نەگىزگى تاقىرىبى بولدى.
سەناتور مەملەكەت باسشىسىنىڭ باستاماسىمەن جۇزەگە اسىپ جاتقان «تازا قازاقستان» ءىس-شاراسى ەكولوگيالىق مادەنيەتتى قالىپتاستىرۋعا, اباتتاندىرۋ ماسەلەلەرىن شەشۋگە جانە ازاماتتاردىڭ ءومىر ءسۇرۋ ساپاسىن جاقسارتۋعا ىقپال ەتەتىن ماڭىزدى بىرىكتىرۋشى فاكتورعا اينالعانىن اتاپ ءوتتى.
«تازا قازاقستان» مەملەكەتتىك ورگانداردىڭ, جۇرتشىلىق پەن قاراپايىم ازاماتتاردىڭ كۇش-جىگەرىن بىرىكتىرە وتىرىپ, شىن مانىندە جالپىۇلتتىق سيپاتقا يە بولىپ وتىر. بۇل قورشاعان ورتاعا جاۋاپكەرشىلىكپەن قاراۋدى قالىپتاستىرۋدىڭ جانە ەلىمىزدىڭ بولاشاعى ءۇشىن ورتاق جاۋاپكەرشىلىك سەزىمىن كۇشەيتۋدىڭ ماڭىزدى قۇرالى», دەپ اتاپ ءوتتى ا.لۋكين.
