فوتو: اشىق دەرەككوز
Labubu قالاي ترەندكە اينالدى؟
Labubu – جاي عانا ويىنشىق ەمەس, اۆتورلىق قيالدان تۋعان كەيىپكەر. ونىڭ ءتۇپ-توركىنى گونكونگتىك سۋرەتشى كاسينگ لۋنگتىڭ 2015 جىلى جارىق كورگەن The Monsters اتتى يلليۋستراتسيالىق كىتابىنان باستاۋ الادى. بۇل كىتاپتا لابۋبۋ وزگە دە عاجاپ كەيىپكەرلەرمەن بىرگە ءومىر سۇرەتىن, ءسال تەنتەك, بىراق جۇرەگى تازا ەلف-قىز رەتىندە بەينەلەنەدى. كىشكەنتاي مىسىقتاي عانا لابۋبۋ كەيىپكەرلەرىنىڭ باستى ەرەكشەلىگى ۇشكىر قۇلاقتارى مەن كۇلكىسى. اۆتوردىڭ ايتۋىنشا, لابۋبۋ وبرازى سكانديناۆيالىق ميفولوگيا مەن سولتۇستىكتىڭ تابيعاتىنان شابىت الىپ جاسالعان.
«ونىڭ تەنتەك بەينەسى قورقىنىشتى كورىنگەنىمەن, شىن مانىندە ول مەيىرىمدى. ءتىپتى كەيدە كومەكتەسەيىن دەگەن نيەتى ب ۇلىككە ۇلاسىپ كەتۋى مۇمكىن. بىراق ونىڭ جارقىن كۇلكىسى – قيىن ساتتەردە دە بويىمىزعا ءۇمىت سىيلاي الاتىن سيمۆول», دەيدى اۆتور ونىڭ مىنەزى جايلى.
لابۋبۋ العاشىندا بەيكوممەرتسيالىق يلليۋستراتسيا بولسا دا, 2019 جىلى كاسينگ لۋنگ قىتايلىق Pop Mart كومپانياسىمەن كەلىسىمشارتقا وتىرىپ, ونى ويىنشىققا اينالدىردى. Pop Mart – ايگىلى «سيۋرپريز-قوراپ» تۇجىرىمداماسىن پايدالاناتىن, كوللابوراتسيالارعا نەگىزدەلگەن ويىنشىق برەندى. جيناقتىق فورماتتاعى بۇل قوراپتاردا قايسى Labubu تۇسەتىنى بەلگىسىز, سول سەبەپتى ساتىپ الۋشىلار قىمبات ويىنشىقتى تابۋ ءۇشىن بىرنەشەۋىن قاتارىنان ساتىپ الۋعا ءماجبۇر.
بۇل ويىنشىققا دەگەن ناعىز قىزىعۋشىلىق BLACKPINK توبىنىڭ جۇلدىزى ليسا لابۋبۋدى Hermès سومكەسىنە تاعىپ شىققاندا باستالعان. ودان كەيىن بۇل ويىنشىقتار TikTok, Instagram جانە باسقا دا پلاتفورمالاردا ۆيرۋستاي تارالىپ, ءسان الەمىنە دە ەنگەن. ايتا كەتەيىك, ميلانداعى ءسان اپتالىعىندا «Pronounce» برەندى لابۋبۋ بەينەلەنگەن كيىمدەردى كورسەتىپ, بۇل كەيىپكەردىڭ ەندى سۋبمادەنيەتتەن مەينستريمگە وتكەنىن ايعاقتاعان.
قازاقستاندا دا Labubu-عا دەگەن قىزىعۋشىلىق كۇننەن كۇنگە ارتىپ كەلەدى. ءبىر قاراعاندا, بۇل بالالارعا ارنالعان جاي عانا ويىنشىق سەكىلدى كورىنگەنىمەن, ونىڭ ارتىندا تۇتاس ءبىر كوللەكتسيالىق مادەنيەت پەن ساۋدا فەنومەنى تۇر.
ويىنشىقتىڭ باعاسى دا ءارتۇرلى. ەلىمىزدەگى ساۋدا نۇكتەلەرىندە Labubu-دىڭ قاراپايىم تۇرلەرى 1 500-9000 تەڭگە ارالىعىندا, ال سيرەك ۇلگىلەرى 50-60 مىڭ تەڭگەگە دەيىن جەتەدى. بىراق بۇل نارىقتاعى قولجەتىمدى نۇسقالار عانا. شەتەلدىك كوللەكتسيونەرلەر اراسىنداعى سۇرانىس بويىنشا, تۇپنۇسقا سيرەك Labubu كەيىپكەرلەرىنىڭ قۇنى 200 000 تەڭگەگە دەيىن بارادى.
ساۋداگەرلەردىڭ ايتۋىنشا, كەي كۇندەرى Labubu-دىڭ 100-گە جۋىق داناسى بىرنەشە ساعات ىشىندە ساتىلىپ كەتەدى. دۇكەن سورەسىنە تۇسكەن بويدا جاپپاي ساتىپ الىناتىن بۇل ويىنشىق ەلدەگى سانقۇمار جاستار مەن بالالار اراسىندا جاڭا «ترەندكە» اينالعان.
ويىنشىق ءۇشىن ۇزىلگەن ءومىر
2025 جىلدىڭ شىلدەسىندە قىتايدىڭ شانحاي قالاسىندا بولعان وقيعا ەلدى ەلەڭ ەتكىزدى. ءجاسوسپىرىم قىز Labubu-دىڭ شەكتەۋلى شىعارىلىمداعى ءبىر نۇسقاسىن الا الماعان سوڭ ءوز-وزىنە قول جۇمساعان. ونىڭ ولىمىنەن كەيىنگى تەرگەۋ بارىسىندا قىزدىڭ ءبىراز ۋاقىت بويى ويىنشىق جيناۋعا قىزىققانى, الايدا قالاعان فيگۋراسىن تابا الماعانى بەلگىلى بولعان.
الەۋمەتتىك جەلىلەردە بۇل جاڭالىق قىزۋ تالقىلانىپ, اتا-انالار مەن پەداگوگتەر بالالاردىڭ پسيحيكالىق دەنساۋلىعىنا الاڭداۋشىلىق ءبىلدىردى. جاسوسپىرىمدەر اراسىنداعى ءسان, ترەندكە دەگەن ۇمتىلىس كەيدە تىم اۋىر سالدارعا اكەلۋى مۇمكىن ەكەنىن وسى ءبىر قايعىلى جاعداي انىق كورسەتكەندەي.
بالالار پسيحولوگى ەكاتەرينا يليچەۆانىڭ ايتۋىنشا, Labubu ويىنشىعىنىڭ تانىمالدىعىن تۇسىندىرەتىن تۇجىرىمداردىڭ ءبىرى ونىڭ قورعانىش بەينەسى رەتىندە قابىلدانۋى.
«Labubu بالالار ءۇشىن قورعانىش كەيىپكەرى. مىسالى, بالا قاراڭعىدان قورقادى, ال Labubu تىستەرى بار, كۇشتى, باتىل. ول مەنى قورعايدى دەپ ەلەستەتەدى. بالالار ونى «كۇلكىلى قويان» دەپ اتايدى جانە ونى قۇشاقتاۋ ارقىلى وزدەرىن قاۋىپسىز سەزىنەدى. قورقىنىشتى ويىنشىقتار مەن سيۋجەتتەر بالانىڭ ىشكى, جاسىرىن قورقىنىشتارىن جەڭىلدەتەتىن پسيحولوگيالىق قۇرال. بالالار كەيدە وزدەرى دە نە نارسەدەن قورقاتىنىن ايتا المايدى. بىراق وسىنداي كەيىپكەرلەر ارقىلى ولار قورقىنىشىن ويىن بارىسىندا جەڭىپ, ءوز ەموتسياسىن قاۋىپسىز تۇردە كورسەتەدى», دەيدى پسيحولوگ.
يليچەۆا Labubu-عا بايلانىستى ساقتىقتى ەسكەرۋ قاجەت ەكەنىن دە ايتادى.
«ەگەر بالا وتە سەزىمتال, ەموتسيالىق تۇرعىدا تۇراقسىز بولسا, ويىنشىق وعان كەرىسىنشە مازاسىزدىق تۋدىرىپ, ۇيقىنى بۇزسا بۇل جاعدايدا Labubu-دى الىپ تاستاعان ءجون», دەيدى ول.
ول سونداي-اق, بالالارداعى اگرەسسيا مەن پسيحيكالىق اۋىتقۋلار كوپ جاعدايدا ويىنشىقتارمەن تىكەلەي بايلانىستى ەمەس ەكەنىن اتاپ ءوتتى.
Labubu ويىنشىعىنا قاتىستى اتا-انالاردىڭ دا كوزقاراسى ارقيلى. ءبىرى مۇنى زامان تالابىنا ساي قالىپتاسقان كوللەكتسيالىق قىزىعۋشىلىق دەپ قابىلداسا, ەندى ءبىرى ونىڭ سىرتقى بەينەسى مەن ارتىنداعى بەلگىسىز يدەولوگيالىق استارعا الاڭدايدى.
«بالالارىم Labubu ويىنشىعىن الىپ بەرۋىمدى سۇرايدى. سەبەبى الەۋمەتتىك جەلىلەر مەن باسقا بالالاردان كورىپ, ترەند دەپ قىزىعىپ ءجۇر. بىراق ويىنشىقتىڭ ءتۇرىن العاش كورگەندە شوشىدىم. ۇسقىنسىز, ءتىسى اقسيعان بىردەڭە. سوسىن قاراپ كورسەم, راسىمەن دە بۇل قۇبىجىقتار الەمىنەن شىققان كەيىپكەر ەكەن. بالالارىما «ونى الساڭدار تۇندە قورقىپ ۇيىقتاي المايسىڭدار» دەپ سىلتاۋراتىپ, رۇقسات بەرمەدىم. ولار دا ءتۇسىندى. مەنىڭشە, سانگە ەمەس, ويىنشىقتىڭ مازمۇنى مەن مانىنە ءمان بەرۋ كەرەك», دەيدى ءۇش بالانىڭ اناسى.
الايدا بۇل پىكىرمەن بالالاردىڭ ءوزى كەلىسە بەرمەيدى. كوپتەگەن جاسوسپىرىمدەر ءۇشىن Labubu جاي عانا قىزىقتى, ەرەكشە ستيلدەگى ويىنشىق. ترەندكە ىلەسۋ, قۇرداستار ورتاسىندا قابىلدانۋدىڭ جولى ىسپەتتى. ولار ونى قورقىنىشتى ەمەس, كەرىسىنشە ەرەكشە ءارى ءساندى دەپ قابىلدايدى.
ارينە, اتا-انالاردىڭ الاڭداۋى ورىندى. بالانىڭ قىزىعۋشىلىعىن قاناعاتتاندىرۋمەن قاتار ونىڭ ەموتسيونالدى ساۋلىعىن ساقتاۋ دا ماڭىزدى. پسيحولوگ بۇل رەتتە بالاعا ومىردە ەڭ باستىسى ءسان مەن ترەند ەمەس ەكەنىن ءتۇسىندىرىپ, مەيىرىمگە بولەپ, شىنايى وتباسىلىق قۇندىلىقتى سەزىندىرۋ ارقىلى كەز-كەلگەن ويىنشىققا تاۋەلدىلىكتەن ارىلتۋعا بولاتىنىن ايتادى.
