«وتباسى بانك» اق جەتىسۋ وبلىستىق فيليالىنىڭ ديرەكتورى جاسۇلان قۇرمانعاليەۆتىڭ ايتۋىنشا, ەندى تۇرعىن ءۇي كەزەگىنە قويۋ جانە ءۇي ءبولۋ ءراسىمى orken.otbasybank.kz پورتالى ارقىلى جۇرگىزىلەدى. بۇعان دەيىن قولدانىلىپ كەلگەن Kezekte.kz پلاتفورماسىنىڭ مالىمەتتەرى جاڭا جۇيەگە كوشىرىلىپ, تالداۋ جانە تەحنيكالىق جەتىلدىرۋ جۇمىستارى اياقتالۋعا جاقىن. جاڭا پورتال 1 تامىزدان باستاپ ىسكە قوسىلادى.
جاڭا جۇيە بويىنشا جالگەرلىك جانە نەسيەلىك تۇرعىن ۇيلەر بەرىلەدى. نەسيەلىك باسپانا بۇرىنعى ەرەجەلەرمەن ۇلەستىرىلسە, جالدامالى ءۇي الۋدا كەزەككە تۇرعان كۇن ەسەپكە الىنادى. ايتا كەتەرلىگى, جالگەرلىك باسپانا الۋشىلاردان تولەم قابىلەتتىلىگىن دالەلدەۋ تالاپ ەتىلمەيدى. مۇنداي ۇيلەردىڭ 70 پايىزى الەۋمەتتىك وسال توپتارعا, 20 پايىزى جەتىم بالالارعا, ال قالعان 10 پايىزى باسقا ازاماتتارعا بەرىلەدى.
الاكول اۋدانىندا بۇگىندە تۇرعىن ءۇي كەزەگىندە 1 674 ادام تۇر. وسى ماسەلەنى شەشۋ ءۇشىن بيىل الەۋمەتتىك وسال توپتارعا ارنالعان 100 جالدامالى ءۇيدىڭ قۇرىلىسى جۇرگىزىلۋدە. ولار جىل سوڭىنا دەيىن پايدالانۋعا بەرىلەدى.
تۇرعىندارعا ەندى اكىمدىكتەرگە جۇگىنۋدىڭ قاجەتى جوق, بارلىق مالىمەت پەن وتىنىشتەر «وتباسى بانك» ارقىلى ونلاين قابىلدانادى. جۇيەنىڭ تولىق ىسكە قوسىلۋىنا بايلانىستى بانك ماماندارى وڭىرلەردە ءتۇسىندىرۋ جۇمىستارىن باستايدى.
