وندىرىستىك جەلىلەر «الاتاۋ» ارنايى ەكونوميكالىق ايماعىندا ورنالاسقان. قازىرگى كەزدە كاسىپورىن RFID بەلگىلەرىمەن جابدىقتالعان العاشقى ءونىمىن شىعارا باستادى. تسيكل تسيفرلىق جۇيەمەن باسقارىلادى.
بۇعان دەيىن سۋ جۇيەسىنە ارنالعان بارلىق مەمبرانالار شەتەلدەن جەتكىزىلىپ كەلگەن بولسا, ەندى عىلىم مەن بيزنەستىڭ ىقپالداستىعى اياسىندا ءوز ەلىمىزدە مەمبرانالاردى شىعارۋ جولعا قويىلىپ, ماڭعىستاۋ سياقتى وڭىرلەردە سۋدى تازارتۋ مەن تۇشىتۋ بارىسىندا قولدانىلاتىن بولادى.
جاقىندا «سامۇرىق-قازىنا كونتراكت» اق ءوزارا مىندەتتەمەلەردىڭ ورىندالۋىنا قاتىستى جوسپارلى مونيتورينگ جۇرگىزىپ, كاسىپورىندا جوبانىڭ ءساتتى جۇزەگە اسىپ جاتقاندىعىن باعالادى. «سۋ تازارتاتىن وندىرىستىك تسيكل ەلىمىزدىڭ يندۋستريالىق الەۋەتىنىڭ دامۋىنا قوسقان زور ۇلەسىمىز بولماق. مونيتورينگتەن ءساتتى ءوتۋ – ۇلتتىق كومپانيالارمەن ءوزارا ارەكەتتىڭ اشىقتىعى مەن تيىمدىلىگىن قامتاماسىز ەتۋمەن قاتار ارى قاراي دا اۋقىمدى جوبالاردى جۇزەگە اسىرۋعا دايىندىعىمىزدى, قابىلەتىمىزدى كورسەتەدى», دەيدى «ەكوتەك ينجينيرينگ» كومپانياسىنىڭ باسشىسى انۋار دۋكۋمباەۆ.
ق.ساتباەۆ ۋنيۆەرسيتەتى عىلىمي ساراپتاما جاساپ, زەرتحانالىق بازا مەن وندىرىستىك الاڭداردى ۇسىنۋمەن قاتار كاسىپورىننىڭ تەڭ قۇرىلتايشىسى سانالادى. بۇل ۋنيۆەرسيتەتتىڭ عىلىمي الەۋەتىن, بيزنەسپەن ىنتىماقتاستىقتا باسەكەگە قابىلەتتى ءوندىرىستى ىسكە قوسىپ, تۇتاس سالانىڭ قۇرىلىمىن وزگەرتە الاتىندىعىن كورسەتەدى. ق.ساتباەۆ ۋنيۆەرسيتەتىنىڭ پرورەكتورى ساپار شالاباەۆ اتاپ وتكەندەي, بيزنەس پەن تەحنولوگيا توعىسىندا جۇزەگە اساتىن جوبالار ينجەنەرلىك ءبىلىم بەرۋ ەكوجۇيەسىنىڭ ماڭىزدى بولشەگىنە اينالىپ وتىر. مۇنداي قادام قازىرگى جۇمىس ىستەپ تۇرعان ءوندىرىس بازاسىندا مامانداردى دايارلاۋعا عانا ەمەس, سونداي-اق عىلىمي ينفراقۇرىلىمعا قوسىمشا ينۆەستيتسيا تارتۋعا مۇمكىندىك بەرەدى.
مونيتورينگتىك توپ جۇمىسىنىڭ قورىتىندىسى بويىنشا «سامۇرىق-قازىنا» اق-نىڭ ەنشىلەس كومپانيالارىنا جوبا وپەراتورىمەن وففتەيك-كەلىسىمشارتتار جاسالاتىن بولادى. ء«وندىرىس ەل اۋماعىنداعى سۋ قاۋىپسىزدىگىن قامتاماسىز ەتۋدەگى تەحنولوگيالىق الەۋەتتى نىعايتۋعا باعىتتالعان. بۇل ءبىر عانا ءوندىرىس ورنىن اشۋمەن شەكتەلمەيدى. بولاشاقتا ۇلت دەنساۋلىعىن جاقسارتۋعا, ەكولوگيالىق تۇراقتىلىققا جانە عىلىمي-تەحنيكالىق ۇدەرىستىڭ دامۋىنا ىقپال ەتەتىن بولادى», دەيدى «سامۇرىق-قازىنا كونتراكت» كومپانياسى وففتەيك-كەلىسىمشارتتار دەپارتامەنتىنىڭ جەتەكشى مەنەدجەرى دينارا تۇمەنوۆا.
قازىرگى تاڭدا ءوندىرىس كەلەسى كەزەڭنىڭ دايىندىعىنا كىرىسكەن. ءوندىرىس كولەمىن ۇلعايتۋدى كوزدەپ وتىرعان ماماندار سۇزگى تۇرلەرىن كوبەيتىپ, ءوز ءونىمىن ورتالىق ازيا, كاۆكاز, رەسەي مەن تۇركيا نارىعىنا ەكسپورتتاۋدى كوزدەپ وتىر.
الماتى
