باسقوسۋدا ازاماتتىق اۆياتسيانى دامىتۋ, جولاۋشىلار مەن جۇك تاسىمالىنىڭ ءوسۋ قارقىنى, جاڭا باعىتتاردىڭ اشىلۋى, اۋەجاي ينفراقۇرىلىمىن جاڭارتۋ, سونىمەن قاتار ۇلتتىق جۇك اۆياتاسىمالداۋشىنى قۇرۋ باستاماسى جان-جاقتى تالقىلاندى.
پرەمەر-ءمينيستردىڭ ايتۋىنشا, ەلدىڭ گەوگرافيالىق ورنالاسۋى – ترانزيتتىك جانە جۇك تاسىمالداۋ سالاسىندا ۇلكەن مۇمكىندىكتەرگە جول اشادى. وسى الەۋەتتى ءتيىمدى پايدالانۋ ءۇشىن ەلدە اۆياتسيا سالاسىن كەشەندى دامىتۋ كوزدەلىپ وتىر.
– «پرەزيدەنت قاسىم-جومارت توقاەۆ قازاقستاندى ايماقتاعى جەتەكشى اۆياتسيالىق حاب رەتىندە كۇشەيتۋ مىندەتىن قويدى. قازىر اۋەجاي ينفراقۇرىلىمىن جانە ىشكى تاسىمالداردى دامىتۋ بويىنشا كەشەندى جۇمىستار جۇرگىزىلۋدە. سونىڭ ىشىندە جۇك اۆياتاسىمالداۋشىنى قۇرۋ – نەگىزگى جوبالاردىڭ ءبىرى. ونى جۇزەگە اسىرۋ ترانزيتتىك جۇك اعىندارىن قازاقستانعا قاراي بۇرۋعا مۇمكىندىك بەرەدى جانە جۇك اۆياتاسىمالى نارىعىنداعى ءبىزدىڭ ۇستانىمىمىزدى كۇشەيتەدى», دەدى پرەمەر-مينيستر.
كولىك مينيسترلىگىنىڭ دەرەگى بويىنشا, 2025 جىلدىڭ العاشقى جارتىجىلدىعىندا وتاندىق اۆياكومپانيالار 7,2 ملن جولاۋشى تاسىمالداعان. بۇل كورسەتكىش وتكەن جىلدىڭ سايكەس كەزەڭىمەن سالىستىرعاندا 6%-عا كوپ. سونىمەن قاتار ەلدەگى اۋەجايلار ارقىلى قىزمەت كورسەتىلگەن جولاۋشىلار سانى 14,4 ملن ادامعا جەتكەن.
قازىر ىشكى اۆياتاسىمالدار اپتاسىنا 849 رەيس جيىلىگىمەن 61 باعىت بويىنشا ورىندالۋدا. بۇل ىشكى تۋريزم مەن وڭىرلىك بايلانىستىڭ ارتىپ كەلە جاتقانىن ايعاقتايدى.
كولىك ءمينيسترى نۇرلان ساۋرانباەۆتىڭ ايتۋىنشا, كەيىنگى جىلدارى ەلىمىزدە 20 ۇشۋ-قونۋ جولاعى مەن 19 اۋەجاي تەرمينالى رەكونسترۋكتسيالانعان. تۇركىستان قالاسىندا جاڭا اۋەجاي سالىندى. بيىل اۋە كەمەلەرى پاركىن 16 بىرلىككە تولىقتىرۋ جوسپارلانىپ وتىر, سونىڭ التاۋى قازىردىڭ وزىندە ساتىپ الىنعان.
جالپى العاندا, 2030 جىلعا دەيىن ەلىمىزدىڭ اۋە فلوتى 221 ۇشاققا دەيىن جەتكىزىلەدى. 2025 جىلى 36 جاڭا باعىتتى اشۋ ءارى قايتا جاڭعىرتۋ كوزدەلگەن.
ينۆەستيتسيالىق جوبالار شەڭبەرىندە اۆياتسيا سالاسىنا شامامەن 2,9 ملرد دوللار تارتىلماق. بۇل قاراجات كاتونقاراعاي, زايسان, كەندىرلى مەن ارقالىق سياقتى تۋريستىك ايماقتاردا جاڭا اۋەجاي سالۋعا, 10 ۇشۋ-قونۋ جولاعىن جانە 10 تەرمينالدى قايتا جاڭارتۋعا, ارنايى تەحنيكا پاركىن جاڭارتۋعا باعىتتالادى.
جيىننىڭ نەگىزگى تاقىرىپتارىنىڭ ءبىرى – ەلىمىزدە ۇلتتىق جۇك اۆياتاسىمالداۋشىنى قۇرۋ. بۇل باستاما الەمدىك نارىقتاعى جۇك تاسىمالى كولەمىنىڭ ۇنەمى ارتىپ كەلە جاتقانىمەن بايلانىستى.
بۇگىندە الەم بويىنشا اۋە جۇك تاسىمالىنىڭ كولەمى 57,7 ملن توننانى قۇرايدى. وسى كولەمنىڭ 15%-ى قازاقستاننىڭ اۋە كەڭىستىگى ارقىلى وتەتىنىن ەسكەرسەك, بۇل نارىققا بەلسەنە قاتىسۋ ەلىمىزدىڭ ترانزيتتىك الەۋەتىن ارتتىرارى ءسوزسىز.
«سامۇرىق-قازىنا» ۇلتتىق ءال-اۋقات قورىنىڭ باسقارما توراعاسى نۇرلان جاقىپوۆتىڭ ايتۋىنشا, جوبا بىرنەشە كەزەڭمەن جۇزەگە اسادى:
«الەمدىك تاجىريبەگە سۇيەنە وتىرىپ, باستاپقى كەزەڭدە ءۇش اۋە كەمەسىن جالعا الىپ, كەيىننەن فلوتتى ون بىرلىككە دەيىن كەڭەيتۋ كوزدەلىپ وتىر. ۇلتتىق جۇك اۆياتاسىمالداۋشىنىڭ العاشقى رەيسى 2026 جىلدىڭ باسىندا جۇزەگە اسادى. جوبا ءوزىن-ءوزى اقتاۋى ءۇشىن وتىنمەن قامتاماسىز ەتۋدىڭ كەپىلدەندىرىلگەن كولەمى قاراستىرىلىپ جاتىر», دەدى ول.
پرەمەر-مينيستر بۇل جوبانى ىسكە اسىرۋدا دايىندىق جۇمىستارىن جەدەلدەتۋدى تاپسىردى.
