بۇگىندە قازاقستاندا 270-تەن استام مۋزەي جۇمىس ىستەيدى. ولار ەلىمىزدىڭ تاريحي-مادەني مۇراسىن ساقتاپ, جۇرتشىلىققا تانىستىراتىن ماڭىزدى ورتالىق سانالادى. 2025 جىلدىڭ العاشقى جارتىجىلدىعىندا مۋزەيلەر 817 ءىس-شارا وتكىزدى. ونىڭ ىشىندە:
- 28 حالىقارالىق جوبا,
- 154 رەسپۋبليكالىق دەڭگەيدەگى ءىس-شارا,
- 45 ءبىلىم بەرۋ سەمينارى.
مۋزەيلەر ءتۇرلى دوڭگەلەك ۇستەلدەر, كونفەرەنتسيالار, شەبەرلىك ساباقتارى مەن دارىستەر وتكىزەتىن الاڭعا اينالىپ, كاسىبي بىلىكتىلىكتى ارتتىرۋ مەن جاڭا اۋديتوريانى تارتۋعا باعىتتالادى.
وسى سالاداعى باستى وقيعالاردىڭ ءبىرى – ەكى جەتەكشى مەكەمەگە «ۇلتتىق مۋزەي» مارتەبەسى بەرىلدى. بۇل اتاققا قر ءابىلحان قاستەەۆ اتىنداعى مەملەكەتتىك ونەر مۋزەيى مەن قر ورتالىق مەملەكەتتىك مۋزەيى يە بولدى.
سونىمەن قاتار, استانادا وتكەن قازاقستان مۋزەيلەرىنىڭ ءىىى كونگرەسى مادەني مۇرانى ساقتاۋ, قالپىنا كەلتىرۋ جانە تسيفرلاندىرۋ ماسەلەلەرىن تالقىلايتىن ماڭىزدى پىكىرتالاس الاڭىنا اينالدى.
قازاقستاندىق مۋزەيلەر ءىرى مادەني باستامالاردى ۇيىمداستىرۋشى ءارى قاتىسۋشى رەتىندە بەلسەندى جۇمىس جۇرگىزۋدە. اتاپ ايتساق, ءا.قاستەەۆ مۋزەيىندە «تۇران تاۋلارى» اتتى حالىقارالىق كورمە-سيمپوزيۋم ءوتتى. قر ۇلتتىق مۋزەيى «ۇلتتىق قۇندىلىقتار: سالتتىڭ سىرلى بەينەسى» اتتى رەسپۋبليكالىق بايقاۋ ۇيىمداستىردى. «مادەني ديالوگ: قازاقستان – رەسەي» اتتى حالىقارالىق دوڭگەلەك ۇستەل گۋمانيتارلىق بايلانىستى نىعايتۋ الاڭىنا اينالدى. تۇركسوي ۇيىمىمەن ىنتىماقتاستىق اياسىندا الماتىدا « ۇلى دالانىڭ ۇلتتىق داستۇرلەرى» اتتى ءىىى حالىقارالىق عىلىمي فورۋم ءوتتى.
2025 جىلى قىتاي ونەرىنە ەرەكشە نازار اۋدارىلدى. قر ۇلتتىق مۋزەيىندە «قىتاي ونەرىنىڭ وي-ماقساتتارى» اتتى قىتاي ۇلتتىق ونەر مۋزەيىنىڭ جاۋھارلارى قويىلعان كورمە ۇيىمداستىرىلىپ, «جىبەك جانە جىبەك جولى: قىتايدان قازاقستانعا» اتتى قىتاي تۋريزم جىلى اياسىنداعى جوبا ءوتتى.
مادەنيەت سالاسىنداعى تاعى ءبىر جەتىستىك – قازاقستان پرەزيدەنتى قاسىم-جومارت توقاەۆتىڭ قىتايعا ساپارى اياسىندا جۇزەگە اسقان بەيجىڭدەگى قازاقستاننىڭ مادەنيەت ورتالىعىنىڭ رەسمي اشىلۋى. ورتالىق 2025 جىلعى ماۋسىمدا تىركەلىپ, قازاقستاننىڭ شەتەلدەگى العاشقى مادەني وكىلدىگىنە اينالدى.
ورتالىقتا كىتاپحانا, كورمە جانە كونفەرەنتس-زالدار, شىعارماشىلىق, قولونەر جانە قازاق ءتىلىن ۇيرەنۋگە ارنالعان ۇيىرمەلەر بار. ورتالىق قىتاي اۋديتورياسىنا ارنالعان كورمەلەر, كونتسەرتتەر, فيلم كورسەتىلىمدەرى, فەستيۆالدەر مەن دارىستەر وتەتىن مادەني ديالوگ الاڭىنا اينالماق.
مينيسترلىك استانادا قىتايدىڭ مادەنيەت ورتالىعىن اشۋ ماسەلەسىن دە قاراستىرىپ جاتىر. بۇل ءوزارا مادەني الماسۋدىڭ جانە ستراتەگيالىق سەرىكتەستىكتى نىعايتۋعا سەپ بولارى انىق.
2025 جىلدىڭ العاشقى جارتىجىلدىعى قازاقستان مادەنيەتىنىڭ ەل ىشىندە دە, حالىقارالىق دەڭگەيدە دە قارقىندى دامىپ كەلە جاتقانىن كورسەتتى. حالىقارالىق ارىپتەستىك كەڭەيىپ, مۋزەي تاجىريبەلەرى جاڭارىپ, مادەني ديپلوماتيا سىرتقى ساياساتتىڭ ماڭىزدى قۇرالىنا اينالىپ جاتىر.
