سۋرەتتەردى تۇسىرگەن – ۆالەري بۋگاەۆ
باعدارلاما العاش ىسكە قوسىلعان 2020 جىلى پاۆلودارلىقتار ءوتىنىش بەرۋدە اسا بەلسەندىلىك تانىتا قويماعان. سوعان وراي العاشقى ەكى جىلدا ورتاشا العاندا 5-6 جوبا عانا ماقۇلداندى. 2022 جىلى قالا اكىمدىگى تۇرعىنداردى وسى ىسكە بەلسەنە قاتىسۋعا شاقىرىپ, وتىنىمدەردى قابىلداۋدىڭ ءۇش كەزەڭىن جاريالادى. اقىرىندا جۇرتتىڭ 300-گە جۋىق ءوتىنىشى ماقۇلداندى. بىراق ونىڭ بارلىعىن ومىرشەڭ ەتۋگە قىرۋار قاراجات قاجەت ەدى. 2024 جىلدىڭ ورتاسىندا ماقۇلدانسا دا ىسكە اسپاعان 159 ءوتىنىش تۇرىپ قالدى. رەسمي مالىمەتتەرگە سۇيەنسەك, ولاردىڭ سانى قازىر 94-كە دەيىن ازايعان.
«جۇزەگە اسپاي تۇرۋىنا ءتۇرلى سەبەپ بار: كەيبىرىن تەحنيكالىق تۇرعىدان ومىرشەڭ ەتۋ مۇمكىن ەمەس, ەندى بىرىنە قاجەتتى بوس اۋماق جوق. تاعى بىرنەشەۋىن «حالىق قاتىساتىن بيۋدجەت» جوباسى اياسىندا ىسكە اسىرۋعا كەلمەيدى. وزگە جوبالار بيۋدجەتتەن بولىنەتىن قاراجاتتاردىڭ شەگىنە قاراي بىرتىندەپ ىسكە اسادى», دەيدى شاھار باسشىسى حاسار حابىلبەكوۆ.
شەنەۋنىكتەر 55 جوبانى جارامسىز دەپ تانىعان. ولاردىڭ بارلىعى حالىق جاپپاي ۇسىنىس تاستاعان 2022 جىلى تىركەلگەن ەكەن. وسىلايشا, اكىمدىك وكىلدەرى «ارتىق قىلامىز دەپ, تىرتىق قىلدى». قازىر ىسكە اسۋعا تيىستىلەر تىزىمىندە 30 ءوتىنىم عانا قالعان. ماسەلەن, №41 مەكتەپ جانىنان «حالىق قاتىساتىن بيۋدجەت» باعدارلاماسى نەگىزىندە شاعىن سكۆەر جاسالۋى كەرەك ەدى. بىراق تۇرعىندار جوبانى ءالى كۇتىپ ءجۇر. كەلەشەكتە اۋماقتا سكۆەر ەمەس, ساياباق قۇرىلسا دا ارتىق بولمايتىنداي.
«بۇل ۇيدە تۇرىپ جاتقالى ءتورتىنشى جىلدان اسسا دا تۇرعىندارعا جاسالعان يگىلىكتەردى كورمەدىك. مۇندا اۆتوبۋس كەلەتىندەي مۇمكىندىك جاساسا, ساياباق سالسا قانداي تاماشا بولار ەدى. قولايلى ورتا جوق. ءۇي الدىندا بالالاردىڭ ويىن الاڭى بار, بىراق ءبىز سياقتى جاستار ءۇشىن سەرۋەندەيتىن ورىن تاپشى», دەيدى مالايسارى باتىر كوشەسىنىڭ تۇرعىنى باقىت راحىمجانوۆا.
ءماشھۇر ءجۇسىپ كوشەسى, 20/2 مەكەنجايىندا ورنالاسقان اۋلادا دا باعدارلاما بويىنشا جوبا ىسكە اسۋى كەرەك ەدى. زەينەتكەرلەر ءوز بەتىمەن اۋلاعا گۇل ەگىپ, كورىكتەندىرىپ قويعان. مۇندا شاعىن كولىك قوياتىن ورىن مەن ەسكى باسكەتبول شەڭبەرى عانا بار. ال جوبا بويىنشا ستريتبول الاڭى جاسالۋعا ءتيىس. «شەنەۋنىكتەردىڭ ءبىزدىڭ اۋلادا ەشتەڭە جاساعىسى كەلمەيتىنى بايقالادى. بىرنەشە مارتە سۇراپ باردىق, ناقتى جاۋاپ ايتپايدى. ءبىز سياقتى قاريالار ءوز بەتىمەن نە ىستەسىن», دەپ قىنجىلادى تۇرعىن يۋليا ەلەسەەۆا.
باعدارلاما ىسكە قوسىلعالى كوپشىلىكتەن 464 ءوتىنىم ءتۇسىپ, ونىڭ 322-ءسى ماقۇلدانعان جوبالار تىزىمىنە ەنگەن. الايدا شەنەۋنىكتەر وتكەن جىلداردان قوردالانىپ قالعان جوبالاردى اياقتاۋدىڭ ورنىنا ءوتىنىم قابىلداۋدىڭ جاڭا كەزەڭىن جاريالاپ, كەيبىرىن ماقۇلداپ جاتىر.
«2025 جىلعا داۋىستاردىڭ باسىم بولىگىن يەلەنگەن 6 جوبالىق ۇسىنىس ماقۇلداندى. بيىل 81,9 ملن تەڭگە قاراستىرىلىپ وتىر», دەپ حابارلادى قالالىق اكىمدىك.
شەنەۋنىكتەر بارلىق كەزەڭنەن وتكەن ءوتىنىم ءبىر جىلدان سوڭ ىسكە اسىرىلادى دەپ ۋادە ەتكەن. ياعني ماقۇلدانعان ۇسىنىستار بيۋدجەتكە ەنگىزىلىپ, ءتيىستى قاراجات ءبولىنۋى كەرەك. ال ءىس جۇزىندە مۇنداي ناقتىلانعان جوسپار كوزگە شالىنار ەمەس.
پاۆلودار
